Bir talabani oʻqitish xarajatlaridan kelib chiqib budjet mablagʻlari hisobiga oliy taʼlim muassasalarining xarajatlarini normativ rejalashtirish va moliyalashtirish tartibi toʻgʻrisidagi nizomga oʻzgartirish va qoʻshimchalar kiritish haqida (2136-3-son)

06.03.2014

OʻZBEKISTON RESPUBLIKASI MOLIYA VAZIRLIGI OʻZBEKISTON RESPUBLIKASI OLIY VA OʻRTA MAXSUS TAʼLIM VAZIRLIGINING

Qarori

[Oʻzbekiston Respublikasi Adliya vazirligi tomonidan 2014-yil 6-martda roʻyxatdan oʻtkazildi, roʻyxat raqami 2136-3]

Oʻzbekiston Respublikasi Prezidentining 2013-yil 15-apreldagi PQ-1954-son “Buxoro muhandislik-texnologiya institutini tashkil etish toʻgʻrisida”gi va 2013-yil 28-iyundagi PQ-1990-son “Yuridik kadrlar tayyorlash tizimini yanada takomillashtirish chora-tadbirlari toʻgʻrisida”gi (Oʻzbekiston Respublikasi qonun hujjatlari toʻplami, 2013-y., 29-son, 372-modda) qarorlari hamda Oʻzbekiston Respublikasi Vazirlar Mahkamasining 2010-yil 16-avgustdagi 178-sonli “Respublikaning oliy taʼlim muassasalarini moliyalashtirish tartibini yanada takomillashtirish chora-tadbirlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2010-y., 33-son, 276-modda) muvofiq Oʻzbekiston Respublikasi Moliya vazirligi va Oliy va oʻrta maxsus taʼlim vazirligi qaror qiladilar:

1. Oʻzbekiston Respublikasi Moliya vazirligi va Oliy va oʻrta maxsus taʼlim vazirligining 2010-yil 20-avgustdagi 67 va 329-son qarori (roʻyxat raqami 2136, 2010-yil 26-avgust) (Oʻzbekiston Respublikasi qonun hujjatlari toʻplami, 2010-y., 34-son, 296-modda) bilan tasdiqlangan Bir talabani oʻqitish xarajatlaridan kelib chiqib budjet mablagʻlari hisobiga oliy taʼlim muassasalarining xarajatlarini normativ rejalashtirish va moliyalashtirish tartibi toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

Moliya vaziri R. AZIMOV

Toshkent sh.,

2014-yil 11-fevral,

7-son

Oliy va oʻrta maxsus taʼlim vaziri B. XODIYEV

Toshkent sh.,

2014-yil 11-fevral,

5-QQ-son

Oʻzbekiston Respublikasi Moliya vazirligi, Oliy va oʻrta maxsus taʼlim vazirligining 2014-yil 11-fevraldagi 7, 5-QQ-son qaroriga ILOVA

Bir talabani oʻqitish xarajatlaridan kelib chiqib budjet mablagʻlari hisobiga oliy taʼlim muassasalarining xarajatlarini normativ rejalashtirish va moliyalashtirish tartibi toʻgʻrisidagi nizomga kiritilayotgan oʻzgartirish va qoʻshimchalar

1. 2-banddagi “Oʻzbekiston Respublikasi oliy va oʻrta maxsus taʼlim muassasalarida oʻqitishning toʻlov-kontrakt shakli va tushgan mablagʻlarni taqsimlash tartibi haqidagi nizomga (roʻyxat raqami 795, 1999-yil 6-avgust)” degan soʻzlar “Oliy va oʻrta maxsus, kasb-hunar taʼlimi muassasalarida oʻqitishning toʻlov-kontrakt shakli va undan tushgan mablagʻlarni taqsimlash tartibi toʻgʻrisidagi nizomga (roʻyxat raqami 2431, 2013-yil 26-fevral) (Oʻzbekiston Respublikasi qonun hujjatlari toʻplami, 2013-y., 9-son, 120-modda)” degan soʻzlar bilan almashtirilsin.

2. 6-bandda:

a) ikkinchi xatboshi quyidagi tahrirda bayon qilinsin:

“BSV = (BNZ1 * K1 * (N + Nko)) + ((BNZ2 * K2 + BNZ3) * (N + Nko)) + (BND1 * (Nds – Ndsv) + BND2 * Ndsv) + (OTsns * Nsns), bunda:”;

b) quyidagi mazmundagi oʻn beshinchi xatboshi bilan toʻldirilsin:

“Nko — OTMning klinik ordinaturasida oʻqiyotgan shaxslarning oʻrtacha yillik soni (tibbiyot OTMlari uchun);”;

v) oʻn beshinchi — yigirmanchi xatboshilar tegishincha oʻn oltinchi — yigirma birinchi xatboshilar deb hisoblansin;

g) quyidagi mazmundagi xatboshlar bilan toʻldirilsin:

“OTsns — joriy moliya yilidagi katta ilmiy xodim-izlanuvchining mehnatiga haq toʻlash jamgʻarmasi, yagona ijtimoiy toʻlovni hisobga olgan holda (joriy moliya yilining 1-yanvar holatidagi katta ilmiy xodim-izlanuvchining lavozim maoshidan kelib chiqqan holda hisoblanadi);

Nsns — OTMning oliy oʻquv yurtidan keyingi taʼlim institutlarida oʻqiyotgan katta ilmiy xodim-izlanuvchilarning oʻrtacha yillik soni.”.

3. 10-band quyidagi mazmundagi xatboshi bilan toʻldirilsin:

“Bunda, qoida tariqasida, OTMlariga ish haqi va yagona ijtimoiy toʻlovlar uchun ajratilayotgan budjet mablagʻlarining hajmi, davlat granti asosida taʼlim olayotgan talabalar ulushiga mos ravishda nazarda tutiladi.”.

4. Quyidagi mazmundagi 131-band bilan toʻldirilsin:

“131. Oʻzbekiston Respublikasi Prezidenti yoki Oʻzbekiston Respublikasi Vazirlar Mahkamasining qarorlariga asosan alohida OTMlariga xarajatlarning bazaviy normativlari va ularga tuzatish koeffitsiyentlarini qoʻllash yoʻli bilan hisoblangan IV guruh xarajatlari uchun budjet mablagʻlari hajmiga qoʻshimcha ravishda budjetdan ajratiladigan mablagʻlar nazarda tutilishi mumkin.

Oʻzbekiston Respublikasi Prezidenti yoki Oʻzbekiston Respublikasi Vazirlar Mahkamasining qarorlarini bajarish uchun OTMlari uchun qoʻshimcha budjetdan ajratiladigan mablagʻlar, tasarrufida OTMlari mavjud boʻlgan vazirliklar, davlat qoʻmitalari va idoralarning asoslangan hisob-kitoblariga koʻra nazarda tutiladi va oʻrnatilgan tartibda OTMlarning xarajatlar smetasini tuzish jarayonida yoki tegishli moliya yili davomida nazarda tutilishi mumkin (xarajatlar smetasiga tegishli oʻzgartirishlar kiritish orqali).”.

5. 2-ilovada:

a) 1-guruhdagi “Toshkent davlat yuridik instituti” degan soʻzlar “Toshkent davlat yuridik universiteti” degan soʻzlar bilan almashtirilsin;

b) 3-guruhdagi “Buxoro yuqori texnologiyalar muhandislik-texnika instituti” degan soʻzlar “Buxoro muhandislik-texnologiya instituti” degan soʻzlar bilan almashtirilsin.