Oʻzbekiston Respublikasi sportchilarining 2006-yil Doha shahridagi (Qatar) XV yozgi Osiyo oʻyinlariga tayyorgarlik koʻrishi va qatnashishi toʻgʻrisida (PQ-504-son)

06.11.2006

Oʻzbekiston Respublikasi Prezidentining

Qarori

Oʻzbekiston sportchilarini 2006-yil Doha shahridagi (Qatar) XV yozgi Osiyo oʻyinlariga sifatli tayyorlash va muvaffaqiyatli ishtirok etishini taʼminlash maqsadida:

1. Oʻzbekiston Respublikasi Madaniyat va sport ishlari vazirligi Milliy olimpiya qoʻmitasi bilan birgalikda:

sportchilarning nufuzli xalqaro musobaqalarda erishgan shaxsiy natijalari hamda ularning maʼnaviy-irodali sifatlaridan kelib chiqib, mamlakat terma jamoalarining Osiyo oʻyinlarida ishtirok etishi uchun sport turlari boʻyicha jamlanishini;

oʻquv-mashgʻulot yigʻinlarining yakunlovchi bosqichida mamlakat terma jamoalarining sifatli tayyorgarligini taʼminlasin.

2. Oʻzbekiston sport delegatsiyasining 340 kishidan iborat tarkibi 1-ilovaga* muvofiq tasdiqlansin.

3. Oʻzbekiston Respublikasi Moliya vazirligi Oʻzbekiston Respublikasi madaniyat va sport ishlari vazirligiga mamlakatimiz sport delegatsiyasining Doha shahridagi (Qatar) XV yozgi Osiyo oʻyinlarida qatnashishi bilan bogʻliq sarf-xarajatlarni 2-ilovaga* muvofiq qoplash uchun moliyaviy mablagʻlarning oʻz vaqtida ajratilishini taʼminlasin.

* 1 va 2-ilovalar berilmaydi.

Oʻzbekiston sportchilarining 150 kishilik delegatsiyasi qatnashishi bilan bogʻliq sarf-xarajatlar Milliy olimpiya qoʻmitasi, sport federatsiyalari va homiylar hisobidan 2-ilovaga muvofiq qoplanishi maʼlumot uchun qabul qilinsin.

4. Oʻzbekiston Respublikasi Markaziy banki mazkur oʻyinlarda Oʻzbekiston sport delegatsiyasi qatnashishi bilan bogʻliq boʻlgan xarajatlarni qoplash uchun Madaniyat va sport ishlari vazirligi va Milliy olimpiya qoʻmitasi mablagʻlarini oʻz vaqtida erkin muomaladagi valyutaga belgilangan tartibda almashtirilishini taʼminlasin.

5. 2006-yil Doha shahridagi (Qatar) XV yozgi Osiyo oʻyinlariga Oʻzbekiston sport delegatsiyasini tayyorlash va unda qatnashish uchun rasmiy-parad formasi, sport ekipirovkasi, maxsus sport formasi, inventar hamda uskunalarni respublikaga olib kirishda bojxona toʻlovlari (bojxona rasmiylashtiruvi yigʻimlaridan tashqari) toʻlashdan ozod etilsin.

6. Belgilansinki, yuridik shaxslarning soliqqa tortiladigan daromadi daromad (foyda) soligʻi toʻlashda 2006-yil Doha shahridagi (Qatar) XV yozgi Osiyo oʻyinlarida Oʻzbekiston sport delegatsiyasining tayyorgarlik koʻrishi va qatnashishiga yoʻnaltirilgan mablagʻlarga teng summa kamaytiriladi.

7. Oʻzbekiston Respublikasi Mudofaa vazirligi, Ichki ishlar vazirligi, Oliy va oʻrta maxsus taʼlim vazirligi, Xalq taʼlimi vazirligi, Kasaba uyushmalari Federatsiyasi Kengashi mamlakatning terma jamoalari tarkibiga kiritilgan harbiy xizmatchilar, talabalar hamda oʻquvchilarning 2006-yilgi XV Osiyo oʻyinlariga tayyorgarlik koʻrishi va qatnashishi uchun zarur shart-sharoitlar yaratsin.

8. Oʻzbekiston Respublikasi Ichki ishlar vazirligi, Tashqi ishlar vazirligi mamlakat sport delegatsiyasi aʼzolari — XV Osiyo oʻyinlari ishtirokchilarining chiqish hujjatlari oʻz vaqtida rasmiylashtirilishini taʼminlasin.

9. “Oʻzbekiston havo yoʻllari” Milliy aviakompaniyasi:

Oʻzbekiston terma jamoalarining Toshkent-Sharja-Toshkent yoʻnalishida imtiyozli shartlar boʻyicha uchishini;

Oʻzbekiston sport delegatsiyalari ishtirokchilarining Toshkent aeroportidagi SIP zalidan xizmat uchun toʻlov undirilmagan holda oʻtishini taʼminlasin.

10. Oʻzbekiston milliy teleradiokompaniyasi, Milliy axborot agentligi 2006-yil Doha shahridagi (Qatar) XV Osiyo oʻyinlariga Oʻzbekiston sportchilarining tayyorgarlik jarayoni va unda qatnashish natijalarini ommaviy axborot vositalarida belgilangan tartibda keng yoritilishini taʼminlasin.

11. “Sovplastital” QK, “Oniks” IChB, “Fonon” AJ Oʻzbekiston Respublikasi Madaniyat va sport ishlari vazirligi hamda Oʻzbekiston MOQ eskizlari boʻyicha XV Osiyo oʻyinlariga joʻnab ketadigan Oʻzbekiston sport delegatsiyasi uchun sovgʻa mahsulotlari va zarur atributlarni imtiyozli shartlar asosida tayyorlab bersin.

12. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

Oʻzbekiston sport delegatsiyasining XV Osiyo oʻyinlariga tayyorgarlik koʻrishi va qatnashishi bilan bogʻliq masalalarni hal etishda faol ishtirok etsin;

mamlakat terma jamoalariga idoraviy mansubligidan qatʼi nazar, respublikaning barcha sport bazalarida ijara toʻlovlari undirilmagan holda oʻquv-mashgʻulotlarini oʻtkazishlari uchun keng imkoniyatlar yaratib bersin.

13. Mazkur qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.

Oʻzbekiston Respublikasi Prezidenti I. KARIMOV

Toshkent sh.,

2006-yil 6-noyabr,

PQ-504-son