Ishlovchi pensionerlarga pensiya toʻlash tartibi toʻgʻrisidagi nizomga oʻzgartirish va qoʻshimchalar kiritish haqida (2222-2-son)

10.02.2014

OʻZBEKISTON RESPUBLIKASI MOLIYA VAZIRLIGI OʻZBEKISTON RESPUBLIKASI IChKI IShLAR VAZIRLIGI OʻZBEKISTON RESPUBLIKASI MUDOFAA VAZIRLIGI OʻZBEKISTON RESPUBLIKASI FAVQULODDA VAZIYATLAR VAZIRLIGI OʻZBEKISTON RESPUBLIKASI MILLIY XAVFSIZLIK XIZMATI OʻZBEKISTON RESPUBLIKASI DAVLAT BOJXONA QOʻMITASINING

Qarori

[Oʻzbekiston Respublikasi Adliya vazirligi tomonidan 2014-yil 10-fevralda roʻyxatdan oʻtkazildi, roʻyxat raqami 2222-2]

Oʻzbekiston Respublikasi Prezidentining 2013-yil 26-dekabrdagi “Oʻzbekiston Respublikasi Prezidentining ayrim farmonlariga oʻzgartishlar kiritish toʻgʻrisida” PF-4589-son Farmoniga (Oʻzbekiston Respublikasi qonun hujjatlari toʻplami, 2013-y., 52-son, 689-modda) muvofiq Oʻzbekiston Respublikasi Moliya vazirligi, Ichki ishlar vazirligi, Mudofaa vazirligi, Favqulodda vaziyatlar vazirligi, Milliy xavfsizlik xizmati va Davlat bojxona qoʻmitasi qaror qiladilar:

1. Oʻzbekiston Respublikasi Moliya vazirligi, Ichki ishlar vazirligi, Mudofaa vazirligi, Favqulodda vaziyatlar vazirligi, Milliy xavfsizlik xizmati va Davlat bojxona qoʻmitasining 2011-yil 30-martdagi 27, 26, 2, 84, 126, 01-02/5-31-son qarori (roʻyxat raqami 2222, 2011-yil 30-aprel) (Oʻzbekiston Respublikasi qonun hujjatlari toʻplami, 2011-y., 18-son, 183-modda) bilan tasdiqlangan Ishlovchi pensionerlarga pensiya toʻlash tartibi toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

Moliya vaziri R. AZIMOV

Toshkent sh.,

2014-yil 28-yanvar,

5-son

Ichki ishlar vaziri A. AXMEDBAYEV

Toshkent sh.,

2014-yil 28-yanvar,

2-son

Mudofaa vaziri K. BERDIYEV

Toshkent sh.,

2014-yil 28-yanvar,

1-son

Favqulodda vaziyatlar vaziri T. XUDAYBERGENOV

Toshkent sh.,

2014-yil 28-yanvar,

1-son

Milliy xavfsizlik xizmati raisi R. INOYATOV

Toshkent sh.,

2014-yil 28-yanvar,

2-son

Davlat bojxona qoʻmitasi raisi Z. DUSANOV

Toshkent sh.,

2014-yil 28-yanvar,

01-02/5-02-son

Oʻzbekiston Respublikasi Moliya vazirligi, Ichki ishlar vazirligi, Mudofaa vazirligi, Favqulodda vaziyatlar vazirligi, Milliy xavfsizlik xizmati va Davlat bojxona qoʻmitasining 2014-yil 28-yanvardagi 5, 2, 1, 1, 2, 01-02/5-02-son qaroriga ILOVA

Ishlovchi pensionerlarga pensiya toʻlash tartibi toʻgʻrisidagi nizomga kiritilayotgan oʻzgartirish va qoʻshimchalar

1. Quyidagi mazmundagi 21-band bilan toʻldirilsin:

“21. 2014-yil 1-yanvaridan boshlab fuqarolik-huquqiy tarzidagi shartnomalar boʻyicha ishlaydigan va qonun hujjatlari bilan belgilangan yoshga doir pensiyalarning minimal miqdoridan past daromad (gonorar, mukofot va boshqalar) oladigan pensionerlarga pensiya toʻliq miqdorda toʻlanadi.”.

2. 6-bandning birinchi xatboshisi “(pensiyalarini toʻliq miqdorda olish huquqiga ega pensionerlardan tashqari)” degan soʻzlar bilan toʻldirilsin.

3. 22-bandning birinchi xatboshisi “(pensiyalarini toʻliq miqdorda olish huquqiga ega pensionerlardan tashqari)” degan soʻzlar bilan toʻldirilsin.

4. 24-band “(pensiyalarini toʻliq miqdorda olish huquqiga ega pensionerlardan tashqari)” degan soʻzlar bilan toʻldirilsin.

5. 26-band quyidagi tahrirda bayon etilsin:

“26. Ishlovchi pensionerlarga ularga tayinlangan pensiyaning 50 foiz miqdorida pensiyalar faqat pensioner shartnoma boʻyicha ishlagan kunlar uchun toʻlanadi. Pensioner shartnoma tuzmagan qolgan kunlarda pensiyalar qonun hujjatlarida oʻrnatilgan tartibda toʻliq miqdorda toʻlanadi.

Toʻlanayotgan pensiya miqdorini hisoblash misollari:

1-misol — 2014-yil 15-yanvarda yoshga doir pensiya oluvchi ishlamaydigan pensioner ishga qabul qilindi. Pensionerning har oylik pensiya miqdori 380 800 soʻm 00 tiyinni tashkil qiladi. 2014-yil 1-yanvardan 14-yanvargacha boʻlgan davr uchun pensiya 100 foiz miqdorida (380 800 : 31 x 14 = 171 974 soʻm 19 tiyin), 15-yanvardan 31-yanvargacha boʻlgan davr uchun 50 foiz miqdorida (380 800 : 31 x 17 x 50% = 104 412 soʻm 90 tiyin) toʻlanadi. 2014-yil yanvar oyi uchun pensiya toʻlovi miqdori 279 387 soʻm 09 tiyinni (171 974 soʻm 19 tiyin + 104 412 soʻm 90 tiyin) tashkil qiladi;

2-misol — 2014-yil 2-yanvarda yoshga doir pensiya oluvchi ishlamaydigan pensioner bir martalik fuqarolik-huquqiy shartnomasini 150,0 ming soʻm miqdorida tuzdi va u boʻyicha majburiyatlar pensioner tomonidan yanvar oyi davomida bajarildi. Pensionerning har oylik pensiya miqdori 380 800 soʻm 00 tiyinni tashkil qiladi. Yanvar oyi uchun yoshga doir pensiyaning eng kam miqdori 187 970 soʻm 00 tiyin miqdorini tashkil etadi. Yanvar oyi uchun pensiya 380 800 soʻm 00 tiyin miqdorida toʻlanishi lozim.

3-misol — 2014-yil 2-yanvarda yoshga doir pensiya oluvchi ishlamaydigan pensioner bir martalik fuqarolik-huquqiy shartnomasini 600,0 ming soʻm miqdorida tuzdi va u boʻyicha majburiyatlar pensioner tomonidan 3 oy davomida bajarildi. Pensionerning oʻrtacha oylik daromadi 200 ming soʻmni tashkil etadi. Pensionerning har oylik pensiya miqdori 380 800 soʻm 00 tiyinni tashkil qiladi. Yanvar, fevral va mart oylari uchun yoshga doir pensiyaning eng kam miqdori 187 970 soʻm 00 tiyin miqdorini tashkil etadi. Yanvar, fevral va mart oylari uchun pensiya har oyda 190 400 soʻm 00 tiyin miqdorida toʻlanishi lozim.

4-misol — 2014-yil 15-yanvarda yoshga doir pensiya oluvchi ishlamaydigan pensioner ommaviy axborot vositalarida maqola chop etish uchun bir martalik fuqarolik-huquqiy shartnomasini 150,0 ming soʻm miqdorida tuzdi va u boʻyicha majburiyatlar pensioner tomonidan shu kunning oʻzida bajarildi. 2014-yil yanvar oyi uchun pensiya toʻliq miqdorda toʻlanishi lozim.”.