Oʻzbekiston Respublikasi Oliy xoʻjalik sudi Plenumining ayrim qarorlariga oʻzgartish va qoʻshimchalar kiritish toʻgʻrisida (255-son)

05.12.2013

Oʻzbekiston Respublikasi Oliy xoʻjalik sudi Plenumining

Qarori

Oʻzbekiston Respublikasining ayrim qonun hujjatlariga oʻzgartish va qoʻshimchalar kiritilganligi munosabati bilan “Sudlar toʻgʻrisida”gi Oʻzbekiston Respublikasi Qonunining 47-moddasiga asoslanib, Oʻzbekiston Respublikasi Oliy xoʻjalik sudi Plenumi qaror qiladi:

I. Oʻzbekiston Respublikasi Oliy xoʻjalik sudi Plenumining “Xoʻjalik sudining qonuniy kuchga kirgan hujjatlarini yangi ochilgan holatlar boʻyicha qayta koʻrishda Oʻzbekiston Respublikasi Xoʻjalik protsessual kodeksining qoʻllanishi haqida”gi 2003-yil 25-iyuldagi 111-sonli qaroriga quyidagi oʻzgartish va qoʻshimchalar kiritilsin:

1) 1-bandning ikkinchi xatboshisi quyidagi jumla bilan toʻldirilsin:

“Bunday shaxslar yangi ochilgan holatlar boʻyicha ariza bilan murojaat etganlarida arizani qabul qilish XPK 117-moddasining 1-bandiga mos holda rad etiladi, agar ariza ish yuritishga qabul qilingan boʻlsa, u boʻyicha ish yuritish XPK 86-moddasining 1-bandiga mos holda tugatiladi”;

2) 12-bandning ikkinchi xatboshisi quyidagi tahrirda bayon etilsin:

“Sud hujjati bekor qilinib, ish yangidan koʻrilayotganda sud tarkibi toʻgʻrisidagi masalani hal qilish zaruriyati tugʻilsa, sudlar XPK 19-moddasi qoidalaridan kelib chiqishlari lozim”;

3) 13-bandning ikkinchi jumlasi quyidagi tahrirda bayon etilsin:

“Arizachi va ishda ishtirok etuvchi boshqa shaxslar sud muhokamasining vaqti va joyi toʻgʻrisida XPKning 124-moddasida nazarda tutilgan tartibda xabardor qilinadi”.

II. Oʻzbekiston Respublikasi Oliy xoʻjalik sudi Plenumining “Qishloq xoʻjaligida qonuniylikni taʼminlash va yerdan foydalanishdagi suiisteʼmolchiliklarning oldini olishda xoʻjalik sudlarining rolini oshirish toʻgʻrisida” 2004-yil 12-martdagi 115-son qaroriga quyidagi oʻzgartish va qoʻshimchalar kiritilsin:

1) 1-bandning ikkinchi xatboshisidagi “aybdor shaxslarga nisbatan jinoyat ishlari qoʻzgʻatish” degan soʻzlar “aybdor shaxslarga nisbatan jinoyat ishini qoʻzgʻatish toʻgʻrisidagi masalani hal qilish uchun tegishli materiallarni ilova qilgan holda bu haqda prokurorga xabar qilish” degan soʻzlar bilan almashtirilsin;

2) 2-band quyidagi tahrirda bayon etilsin:

“Xoʻjalik sudlarining eʼtibori qishloq xoʻjalik mahsulotlari yetishtiruvchilar ishtirokidagi nizolarni hal etishda Oʻzbekiston Respublikasining Yer kodeksi, “Fermer xoʻjaligi toʻgʻrisida”gi, “Dehqon xoʻjaligi toʻgʻrisida”gi, “Qishloq xoʻjalik kooperativi (shirkat xoʻjaligi) toʻgʻrisida”gi qonunlari, Oʻzbekiston Respublikasi Prezidentining 2003-yil 24-martdagi “Qishloq xoʻjaligida islohotlarni chuqurlashtirishning eng muhim yoʻnalishlari toʻgʻrisida”gi va 2003-yil 27-oktabrdagi “2004 — 2006-yillarda fermer xoʻjaliklarini rivojlantirish konsepsiyasi toʻgʻrisida”gi, Oʻzbekiston Respublikasi Prezidentining 2012-yil 22-oktabrdagi “Oʻzbekistonda fermerlik faoliyatini tashkil qilishni yanada takomillashtirish va uni rivojlantirish chora-tadbirlari toʻgʻrisida”gi PF-4478-son farmonlari, Oʻzbekiston Respublikasi Vazirlar Mahkamasining 2002-yil 5-yanvardagi “Qishloq xoʻjalik korxonalarini fermer xoʻjaliklariga aylantirish chora-tadbirlari toʻgʻrisida”gi 8-son, 2003-yil 4-sentabrdagi “Qishloq xoʻjaligi ishlab chiqarishida shartnomaviy munosabatlarni takomillashtirish va majburiyatlar bajarilishi uchun tomonlarning javobgarligini oshirish chora-tadbirlari toʻgʻrisida”gi 383-son, 2003-yil 5-noyabrdagi “Qishloq xoʻjaligida ijara munosabatlarini yanada rivojlantirish chora-tadbirlari toʻgʻrisida”gi 486-son qarorlari, 2003-yil 30-oktabrdagi 476-son qarori bilan tasdiqlangan “Yer uchastkalarini fermer xoʻjaliklariga uzoq muddatli ijaraga berish tartibi toʻgʻrisida”gi nizom, Oʻzbekiston Respublikasi Vazirlar Mahkamasining 2013-yil 31-yanvardagi “Fermer xoʻjaligi yer maydonini maqbullashtirish va uni tugatish tartibi toʻgʻrisidagi nizomni tasdiqlash haqida”gi 22-sonli qarori va boshqa qonun hujjatlari talablariga qatʼiy rioya etilishi lozimligiga qaratilsin”;

3) 3-bandning ikkinchi xatboshisidagi “Oʻzbekiston Respublikasi “Fermer xoʻjaligi toʻgʻrisida”gi Qonunining 7-moddasi 5-qismiga” degan soʻzlar “Oʻzbekiston Respublikasi “Fermer xoʻjaligi toʻgʻrisida”gi Qonunining 7-moddasi 3-qismiga” degan soʻzlar bilan almashtirilsin;

4) 3-band quyidagi mazmundagi toʻrtinchi xatboshi bilan toʻldirilsin:

“Sudlarning eʼtibori Oʻzbekiston Respublikasi Prezidentining “Oʻzbekistonda fermerlik faoliyatini tashkil qilishni yanada takomillashtirish va uni rivojlantirish chora-tadbirlari toʻgʻrisida” 2012-yil 22-oktabrdagi PF-4478-sonli Farmoniga asosan Fermerlar kengashlari fermer xoʻjaliklari manfaatlarini koʻzlab sudga daʼvo arizalarini taqdim etish, davlat va xoʻjalik boshqaruvi organlari, mahalliy davlat hokimiyati organlarining qarorlari, ularning mansabdor shaxslari xatti-harakatlari (harakatsizliklari) ustidan shikoyat qilishlari mumkinligiga qaratilsin”;

toʻrtinchi xatboshi beshinchi xatboshi deb hisoblansin.

5) 14-band “qishloq xoʻjalik mahsulotlarini yetishtiruvchilar manfaatlarini koʻzlab kiritiladigan daʼvo arizalari boʻyicha” degan soʻzlardan keyin “29-bandiga muvofiq Oʻzbekiston Fermerlar kengashi, Qoraqalpogʻiston Respublikasi, viloyatlar va tumanlar fermerlar kengashlari fermer xoʻjaliklarining manfaatlarini koʻzlab qilingan daʼvolar yuzasidan, shuningdek davlat va xoʻjalik boshqaruvi, mahalliy davlat hokimiyati organlarining qarorlari, ular mansabdor shaxslarining harakatlari (harakatsizligi) ustidan fermer xoʻjaliklarining manfaatlarini koʻzlab qilingan shikoyatlar yuzasidan” degan soʻzlar bilan toʻldirilsin.

III. Oʻzbekiston Respublikasi Oliy xoʻjalik sudi Plenumining “Kassatsiya instansiyasida ishlarni koʻrishda Oʻzbekiston Respublikasi Xoʻjalik protsessual kodeksining qoʻllanilishi toʻgʻrisida” 2005-yil 23-dekabrdagi 136-sonli qaroriga quyidagi oʻzgartish va qoʻshimchalar kiritilsin:

1) 4-band quyidagi mazmundagi ikkinchi xatboshi bilan toʻldirilsin:

“Kassatsiya shikoyati va unga ilova qilinadigan hujjatlar xoʻjalik sudiga axborot tizimi orqali elektron shaklda yuborilishi mumkin”;

ikkinchi xatboshi uchinchi xatboshi deb hisoblansin;

2) 7-band quyidagi tahrirda bayon etilsin:

“7. Sudlar shuni eʼtiborga olishlari kerakki, XPK 180-moddasining birinchi qismida koʻrsatilgan kassatsiya shikoyatini (protestini) qaytarish asoslari roʻyxati qatʼiy hisoblanadi va kengaytirilgan tarzda talqin qilinmaydi.

Bir vaqtning oʻzida bir necha ishlar boʻyicha qabul qilingan hal qiluv qarorlari, qarorlar, shuningdek qonuniy kuchga kirmagan hal qiluv qarori ustidan berilgan kassatsiya shikoyati (protesti)ni qabul qilish XPKning 117-moddasi birinchi qismi 1-bandiga mos holda rad etiladi. Agar koʻrsatilgan holatlar kassatsiya shikoyati (protesti) ish yuritishga qabul qilingandan keyin aniqlansa, shikoyat (protest) boʻyicha kassatsiya instansiyasida ish yuritish XPK 86-moddasining 1-bandiga mos holda tugatiladi.

Kassatsiya shikoyati (protesti) xoʻjalik sudiga oʻtkazib yuborilgan apellatsiya shikoyati (protesti)ni berish muddatini tiklash toʻgʻrisidagi iltimosnoma bilan apellatsiya shikoyati (protesti) berilgandan keyin kelib tushgan va bu iltimosnoma qanoatlantirilgan hollarda kassatsiya shikoyati (protesti)ni qabul qilish XPK 117-moddasi birinchi qismining 3-bandiga mos holda rad etiladi. Kassatsiya shikoyati (protesti)ning qabul qilishni rad etilishi shikoyat (protest) beruvchiga apellatsiya instansiyasida qaror (ajrim) qabul qilingandan soʻng kassatsiya shikoyati (protesti) bilan xoʻjalik sudiga qayta murojaat etishiga toʻsqinlik qilmaydi, agar shikoyat (protest)ni berish asoslari yoʻqolmagan boʻlsa.

Kassatsiya shikoyatini (protestini) qaytarish yoki qabul qilishni rad etish haqidagi birinchi instansiya sudi sudyasining ajrimi bir oylik muddat ichida kassatsiya instansiyasi sudiga shikoyat (protest) qilinishi mumkin”;

3) 9-bandning ikkinchi xatboshisi quyidagi tahrirda bayon etilsin:

“Ajrimda kassatsiya shikoyatini (protestini) koʻrish vaqti va joyi koʻrsatiladi. Ajrim ishda ishtirok etuvchi shaxslarga, kassatsiya protestini keltirgan prokurorga, shuningdek XPK 188-moddasi uchinchi qismining 5-bandiga muvofiq shikoyat bergan shaxsga XPKning 124-moddasida nazarda tutilgan tartibda yuboriladi”;

4) 17-band quyidagi mazmundagi uchinchi xatboshi bilan toʻldirilsin:

“Agar ijro etilmagan sud hujjati bekor qilinib yoki oʻzgartirilib, daʼvoni toʻla yoki qisman rad etish toʻgʻrisida yangi sud hujjati qabul qilinsa yoxud ish yuritish tugatilsa yoxud daʼvo toʻla yoki qisman koʻrmasdan qoldirilsa, kassatsiya instansiyasi sudi qarorining xulosa qismida bekor qilingan yoki tegishli qismi oʻzgartirilgan sud hujjati boʻyicha undirishni toʻla yoki qisman bekor qilish toʻgʻrisida koʻrsatiladi”;

5) 19-bandning ikkinchi xatboshisi quyidagi tahrirda bayon etilsin:

“Jinoyat alomatlari aniqlanganda kassatsiya instansiyasi sudi jinoyat ishini qoʻzgʻatish toʻgʻrisidagi masalani hal qilish uchun tegishli materiallarni ilova qilgan holda bu haqda prokurorga xabar qilishga haqli”.

IV. Oʻzbekiston Respublikasi Oliy xoʻjalik sudi Plenumining “Bankrotlik toʻgʻrisida”gi Oʻzbekiston Respublikasi Qonunini xoʻjalik sudlari tomonidan qoʻllashning ayrim masalalari haqida” 2006-yil 27-yanvardagi 142-sonli qaroriga quyidagi oʻzgartish va qoʻshimchalar kiritilsin:

1) 2-bandning birinchi xatboshisidagi “Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasi” degan soʻzlar “Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi” degan soʻzlar bilan almashtirilsin;

2) 6-bandning uchinchi xatboshisi quyidagi tahrirda bayon etilsin:

“Agar koʻrsatilgan holatlar daʼvo ariza (ariza) ish yurituvga qabul qilingandan keyin aniqlansa, u holda XPKning 86-moddasi 1-bandiga asosan ish boʻyicha ish yuritish tugatiladi”;

3) 7-bandining ikkinchi jumlasi quyidagi tahrirda bayon etilsin:

“Agar bunday hujjatlar taqdim etilmagan boʻlsa, arizani qabul qilish Qonun 45-moddasining beshinchi qismi va XPK 117-moddasi birinchi qismining 1-bandiga asosan rad etiladi”;

4) 8-bandning ikkinchi xatboshisi quyidagi mazmundagi uchinchi jumla bilan toʻldirilsin:

“Bunday holatda kuzatuv taomilini joriy etish va muvaqqat boshqaruvchini tayinlash masalasi Qonun 48-moddasining ikkinchi qismiga muvofiq qarzdorni bankrot deb topish toʻgʻrisidagi ariza tushgan kundan eʼtiboran oʻn kundan kechiktirmay hal qilinadi”;

5) 13-band ikkinchi xatboshisining uchinchi jumlasi quyidagi tahrirda bayon etilsin:

“Ushbu sud majlisining oʻzida yangi sud boshqaruvchisini tayinlash, vazifasidan ozod etilgan sobiq sud boshqaruvchisini maʼmuriy va (yoki) moddiy javobgarlikka tortish, uning harakatlarida jinoyat alomatlari aniqlanganda esa, XPKning 152–moddasi tartibida bu haqda prokurorga xabar qilish masalalari koʻrib chiqilishi mumkin”;

6) 15-band uchinchi xatboshisining birinchi jumlasi chiqarib tashlansin;

7) 19-bandning yettinchi xatboshisi quyidagi tahrirda bayon etilsin:

“Qarzdorning chet el valyutasida qarzi mavjud boʻlganda, agar kreditor va qarzdor oʻrtasida tuzilgan shartnomada boshqacha tartib nazarda tutilgan boʻlmasa, kreditorlarning birinchi yigʻilishini oʻtkazish uchun kreditorlarning talablari reyestriga kiritiladigan kreditorlarning talablari miqdori qarzdorni bankrot deb topish toʻgʻrisidagi ariza xoʻjalik sudi tomonidan qabul qilingan sanadagi rasmiy kurs bilan, keyingi taomillarda esa “Chet el valyutasidagi operatsiyalarning buxgalteriya hisobida aks ettirish tartibi toʻgʻrisida”gi nizomda nazarda tutilgan tartibda (Oʻzbekiston Respublikasi Adliya vazirligi tomonidan 2013-yil 30-iyulda 1411-1-son bilan roʻyxatga olingan) belgilanadi”;

8) 30-bandning ikkinchi xatboshisidagi “ushbu muddat bir yildan oshmagan muddatga” degan soʻzlar chiqarib tashlansin;

9) 34-bandning beshinchi xatboshisidagi “Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasi” degan soʻzlar “Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi” degan soʻzlar bilan almashtirilsin;

10) 36-bandning ikkinchi va uchinchi xatboshilari chiqarib tashlansin;

11) 38-band quyidagi tahrirda bayon etilsin:

“38. Oʻzbekiston Respublikasi Vazirlar Mahkamasining “Amalga oshirilayotgan iqtisodiy nochor korxonalarni tarkibiy oʻzgartirish va moliyaviy sogʻlomlashtirish samaradorligini oshirish chora-tadbirlari toʻgʻrisida” 2003-yil 18-apreldagi 188-sonli qarorining 4-bandiga muvofiq qarzdor korxona bankrot deb eʼlon qilinib, tugatish ishlari boshlanganda, 70 va undan ortiq foizlik talabga ega kreditor boʻlmish tijorat banki qarzdor korxona (mol-mulki)ni, garov predmeti hisoblangan mol-mulkdan tashqari, tugatish qiymati boʻyicha oʻz mulkiga oʻtkazish toʻgʻrisida sudga ariza bilan murojaat qilish huquqiga ega. Bunda bank:

Qonun 134-moddasining birinchi qismida nazarda tutilgan sarf-xarajatlarni toʻlash va talablarni qondirish hamda ish haqi boʻyicha qarzlarni toʻlash;

bankrot korxona sotilgandan keyin bankrot korxonaning boshqa kreditorlik qarzdorligini toʻlash boʻyicha majburiyatlarni qabul qiladi.

Bank tomonidan Qonunning 134-moddasining birinchi qismida nazarda tutilgan sarf-xarajatlar va talablarni qondirish hamda ish haqi boʻyicha qarzdorlikni toʻlanishi muddati sud tomonidan bankrot korxonaning mol-mulkini bankka berish toʻgʻrisidagi qarori qabul qilingan paytdan boshlab bir oydan oshmasligi kerak.

Qarzdorning mol-mulki sud boshqaruvchisi tomonidan bankning mulkiga sudning ajrimi asosida bank tomonidan Qonun 134-moddasining birinchi qismida nazarda tutilgan sarf-xarajatlar va talablar qondirilganda hamda ish haqi boʻyicha qarzdorlik toʻlanganda oʻtkaziladi.

12) 41-bandda:

ikkinchi jumla quyidagi tahrirda bayon etilsin:

“Tugatish boshqaruvchisining hisoboti asosli deb topilganda, xoʻjalik sudi tugatishga doir ish yuritish tamomlanganligi haqida ajrim chiqaradi, hisobot asossiz deb topilganda esa — sud tugatishga doir ish yuritishni tamomlashni rad etish haqida ajrim chiqaradi”;

quyidagi mazmundagi uchinchi jumla bilan toʻldirilsin:

“Ushbu holatda tugatishga doir ish yuritishni tamomlash masalasi kamchiliklar bartaraf etilganidan va yangi hisobot taqdim etilgandan soʻng koʻrib chiqiladi”.

V. Oʻzbekiston Respublikasi Oliy xoʻjalik sudi Plenumining “Birinchi instansiya sudida ishlarni koʻrishda Oʻzbekiston Respublikasi xoʻjalik protsessual kodeksining qoʻllanilishi toʻgʻrisida” 2007-yil 15-iyundagi 162-sonli qaroriga quyidagi oʻzgartish va qoʻshimchalar kiritilsin:

1) 9-bandda:

birinchi xatboshisi quyidagi tahrirda bayon etilsin:

“XPKning 23-moddasida xoʻjalik sudiga taalluqli nizolar kelib chiqishi mumkin boʻlgan huquqiy munosabatlar qatnashchilarining subyektli tarkibi belgilangan. U eng avvalo, yuridik shaxslarni va yuridik shaxs tuzmagan holda tadbirkorlik faoliyatini amalga oshirayotgan va yakka tartibdagi tadbirkor maqomini qonunda belgilangan tarzda olgan fuqarolarni hamda XPK 23-moddasi birinchi qismining 4-bandida nazarda tutilgan ishlar boʻyicha fuqarolar — jismoniy shaxslarni oʻz ichiga oladi. Sudlar nazarda tutishlari kerakki, agar daʼvo bilan yuridik shaxsning oʻzi emas, balki uning alohida boʻlinmasi (filiali, vakolatxonasi) ishonchnoma asosida murojaat etsa, xoʻjalik sudi daʼvo arizasini qabul qilishni rad etishga haqli emas. Bunda bunday ishlar boʻyicha vakil sifatida ishtirok etayotgan alohida boʻlinma emas, balki u manfaatlarini koʻzlab harakat qilayotgan yuridik shaxs daʼvogar hisoblanadi”;

toʻrtinchi xatboshisidagi “XPKning 23-moddasiga muvofiq” degan soʻzlar “XPK 23-moddasi birinchi qismining 1-bandiga muvofiq” degan soʻzlar bilan almashtirilsin;

2) 13-bandning ikkinchi xatboshisi quyidagi tahrirda bayon etilsin:

“XPK 49-moddasining uchinchi qismiga muvofiq fuqarolar oʻz ishlarini xoʻjalik sudlarida shaxsan oʻzlari yoki vakillari orqali yuritishlari mumkin. XPK 49-moddasining uchinchi qismida koʻrsatilgan fuqarolar deganda, yuridik shaxs tuzmagan holda tadbirkorlik faoliyatini amalga oshirayotgan va yakka tartibdagi tadbirkor maqomini qonunda belgilangan tarzda olgan fuqarolar, shuningdek XPK 23-moddasi birinchi qismining 4-bandida nazarda tutilgan nizolar ishtirokchilari — jismoniy shaxslar tushunilishi lozim”;

3) 21-bandning:

birinchi xatboshisi quyidagi mazmundagi uchinchi jumla bilan toʻldirilsin:

“Sud buyrugʻi berish toʻgʻrisidagi arizalar XPKning 14-bobida belgilangan tartibda koʻrib chiqiladi”;

ikkinchi — yettinchi xatboshilari chiqarib tashlansin;

4) 26-band quyidagi mazmundagi ikkinchi xatboshi bilan toʻldirilsin:

“Oʻzbekiston Respublikasi Savdo-sanoat palatasi va uning hududiy boshqarmalarining daʼvo arizasi (arizasi)ga Oʻzbekiston Respublikasi Savdo-sanoat palatasi va daʼvogar oʻrtasida tuzilgan aʼzolik shartnomasi ilova qilinishi lozim. Mazkur talabga rioya qilinmaganda daʼvo arizasi (ariza) XPK 118-moddasi birinchi qismining 2-bandiga mos holda qaytariladi, ushbu holat daʼvo arizasi ish yuritishga qabul qilinganidan keyin aniqlansa, daʼvo XPK 88-moddasining 3-bandiga mos holda koʻrmasdan qoldiriladi”;

5) 29-bandning birinchi xatboshisi quyidagi tahrirda bayon etilsin:

“Ishni sudda koʻrishga tayyorlashda xoʻjalik sudi manfaatdor shaxslarni ish boʻyicha ish yuritish haqida XPK 124-moddasida nazarda tutilgan tartibda xabardor qiladi”;

6) 35-band uchinchi xatboshisining birinchi jumlasi quyidagi tahrirda bayon etilsin:

“Ishni koʻrishni keyinga qoldirish toʻgʻrisidagi ajrim ishda ishtirok etuvchi shaxslarga ushbu Kodeksning 124-moddasida nazarda tutilgan tartibda yuboriladi”;

7) 44-bandning ikkinchi jumlasi quyidagi tahrirda bayon etilsin:

“Ishlarni koʻrish jarayonida qonun buzilishi yoxud xoʻjalik yurituvchi subyektlar, shuningdek ular mansabdor shaxslarining faoliyatida jiddiy kamchiliklar aniqlangan hollarda xoʻjalik sudlari XPKning 152-moddasi asosida xususiy ajrimlar chiqarishga, jinoyat alomatlari aniqlanganda esa — jinoyat ishlarini qoʻzgʻatish toʻgʻrisidagi masalani hal qilish uchun tegishli materiallarni ilova qilgan holda bu haqda prokurorga xabar qilishga haqli”.

VI. Oʻzbekiston Respublikasi Oliy xoʻjalik sudi Plenumining “Xoʻjalik sudining xususiy ajrimi toʻgʻrisida” 2007-yil 28-dekabrdagi 172-sonli qaroriga quyidagi oʻzgartirishlar kiritilsin:

1) 9-band quyidagi tahrirda bayon etilsin:

“XPK 152-moddasining toʻrtinchi qismiga muvofiq, agar sud xoʻjalik nizosini koʻrayotganida shaxslarning xatti-harakatlarida jinoyat alomatlarini aniqlasa, u jinoyat ishini qoʻzgʻatish toʻgʻrisidagi masalani hal qilish uchun tegishli materiallarni ilova qilgan holda bu haqda prokurorga xabar qiladi.

Sudlarga tushuntirilsinki, shaxslarning xatti-harakatlarida jinoyat alomatlarining mavjudligi haqidagi xabar xususiy ajrimda koʻrsatilishi lozim”;

2) 9.1 — 9.8-bandlar chiqarib tashlansin;

3) 10.2-bandidagi “yoxud JPK” degan soʻzlar chiqarib tashlansin;

4) 10.3-bandida:

birinchi xatboshisining ikkinchi jumlasidagi “jinoyat ishini qoʻzgʻatish” va “JPK” degan soʻzlar chiqarib tashlansin;

uchinchi xatboshisining ikkinchi jumlasidagi “shuningdek jinoyat ishi qoʻzgʻatish toʻgʻrisidagi xususiy ajrimda” va “(jinoyat)” degan soʻzlar chiqarib tashlansin.

VII. Oʻzbekiston Respublikasi Oliy xoʻjalik sudi Plenumining “Apellatsiya instansiyasi sudida ishlarni koʻrishda Oʻzbekiston Respublikasi Xoʻjalik protsessual kodeksini qoʻllash haqida” 2007-yil 28-dekabrdagi 173-sonli qarori 4-bandning beshinchi xatboshisi “tilxat olib topshirilishi lozim” degan soʻzlardan keyin “ularning elektron manzillari mavjud boʻlgan taqdirda esa, ajrim axborot tizimi orqali elektron shaklda yuborilishi mumkin” degan soʻzlar bilan toʻldirilsin.

VIII. Oʻzbekiston Respublikasi Oliy xoʻjalik sudi Plenumining “Xoʻjalik sudlari tomonidan davlat boji toʻgʻrisidagi qonun hujjatlarini qoʻllashning ayrim masalalari haqida” 2008-yil 18-apreldagi 180-sonli qaroriga quyidagi oʻzgartish va qoʻshimchalar kiritilsin:

1) 4.6-band quyidagi mazmundagi ikkinchi xatboshi bilan toʻldirilsin:

“Sud hujjati faqatgina davlat bojini undirish qismida shikoyat qilinayotgan holda, davlat boji toʻlanmaydi”;

2) quyidagi mazmundagi 4.7-band bilan toʻldirilsin:

“4.7. XPK 106-moddasiga koʻra sud buyrugʻini berish toʻgʻrisidagi ariza uchun sudga daʼvo bilan umumiy tartibda murojaat qilganda nizolashilayotgan summa asosida hisoblab chiqilgan stavkaning ellik foizi miqdorida davlat boji toʻlanadi.

Sudlarga tushuntirilsinki, sud buyrugʻini berish toʻgʻrisidagi ariza boʻyicha toʻlanadigan (undiriladigan) davlat boji miqdori eng kam ish haqining 50 foizidan kam boʻlmasligi lozim”;

3) 9-bandning uchinchi jumlasi “boshqa shaxs tomonidan toʻlangan boʻlsa” degan soʻzlardan keyin “(korxona uchun uning rahbari yoki taʼsischisi tomonidan davlat boji toʻlangan hollar bundan mustasno)” degan soʻzlar bilan toʻldirilsin;

4) 26-band quyidagi mazmundagi ikkinchi — toʻrtinchi xatboshilari bilan toʻldirilsin:

“Kichik biznes va xususiy tadbirkorlik subyektlari amalga oshiradigan tadbirkorlik faoliyati doirasida sudga murojaat qilishda belgilangan stavkaning 50 foizi miqdorida davlat boji toʻlaydilar. Bunda kichik biznes subyektlarining maqomi daʼvo arizasiga ilova qilinadigan statistika organining maʼlumotnomasi bilan tasdiqlanishi lozim.

Agar xoʻjalik sudiga murojaat qilishda kichik biznes va xususiy tadbirkorlik subyekti tomonidan belgilangan stavkaning 50 foizi miqdorida davlat boji toʻlangan boʻlib daʼvo talablari qanoatlantirilganda ishni koʻrish natijasi boʻyicha javobgardan undiriladigan davlat bojining miqdori daʼvogar tomonidan toʻlab chiqilgan summa bilan chegaralanadi. Daʼvo rad etilgan holda, davlat boji daʼvogardan qoʻshimcha ravishda undirilmaydi.

Ushbu ishlar boʻyicha apellatsiya va kassatsiya shikoyatlari uchun birinchi instansiya sudiga toʻlangan (undirilgan) davlat bojining 50 foizi miqdorida boj toʻlanadi”;

5) 28-banddagi “monopoliyadan chiqarish, raqobat va tadbirkorlikni qoʻllab-quvvatlash” degan soʻzlar “xususiylashtirish, monopoliyadan chiqarish va raqobatni rivojlantirish” degan soʻzlar bilan almashtirilsin;

6) 29-bandning birinchi xatboshisi “daʼvo rad etilganda” degan soʻzlardan keyin “(ish yuritish tugatilganda, daʼvo koʻrmasdan qoldirilganda)” degan soʻzlar bilan toʻldirilsin.

IX. Oʻzbekiston Respublikasi Oliy xoʻjalik sudi Plenumining “Xoʻjalik sudlari tomonidan bojxona haqidagi qonun hujjatlarini qoʻllashning ayrim masalalari toʻgʻrisida” 2009-yil 24-apreldagi 197-sonli qaroriga quyidagi oʻzgartishlar kiritilsin:

1) 14.1-bandning:

birinchi xatboshisidagi “113-moddasida” degan soʻzlar “113-moddasining birinchi qismida” degan soʻzlar bilan almashtirilsin;

uchinchi xatboshisi quyidagi tahrirda bayon etilsin:

“Agar toʻlovchi sudga daʼvo arizasi berilgunga qadar pul mablagʻlarini qaytarish (hisobga oʻtkazish) toʻgʻrisidagi ariza bilan bojxona organlariga bir yil ichida murojaat qilmagan boʻlsa, ish boʻyicha ish yuritish XPK 86-moddasining 8-bandiga asosan tugatiladi”;

2) 14.2-banddagi “BK 113-moddasining ikkinchi qismiga” va “ulardan” degan soʻzlar tegishincha “BK 113-moddasining uchinchi qismiga” va “ular uchun” degan soʻzlar bilan almashtirilsin;

3) 16-band quyidagi tahrirda bayon etilsin:

“Xorijiy investitsiyalar ishtirokidagi korxonalar tomonidan oʻz ishlab chiqarish ehtiyojlari uchun import qilingan mol-mulk uchun toʻlangan bojxona bojini qaytarish bilan bogʻliq nizolarni hal etishda sudlar mahsulotning oʻz ehtiyojlari uchun import qiladigan mahsulot toifasiga kiritilishi holati Oʻzbekiston Respublikasi Vazirlar Mahkamasining 2011-yil 16-maydagi 136-sonli qarori bilan tasdiqlangan “Xorijiy investitsiyalar ishtirokidagi korxonalar tomonidan oʻz ishlab chiqarish ehtiyojlari uchun olib kelinayotgan mol-mulkni aniqlash tartibi toʻgʻrisida”gi nizomga muvofiq beriladigan sertifikat bilan tasdiqlangan boʻlishini eʼtiborga olishlari lozim”;

4) 16.1-band quyidagi tahrirda bayon etilsin:

“Bunda “Chet el investitsiyalari toʻgʻrisida”gi Oʻzbekiston Respublikasi Qonuni 12-moddasining oltinchi qismiga koʻra, ustav fondida chet el investitsiyalarining ulushi kamida 33 foiz boʻlgan chet el investitsiyalari ishtirokidagi korxonalar tomonidan ular davlat roʻyxatidan oʻtkazilgan paytdan eʼtiboran ikki yil davomida oʻz ishlab chiqarish ehtiyojlari uchun Oʻzbekiston Respublikasiga olib kiriladigan mol-mulk boj undirishdan qonun hujjatlarida belgilangan tartibda ozod qilinishi inobatga olinishi lozim”;

5) 19-band quyidagi tahrirda bayon etilsin:

“Sudlar BKning 112-moddasiga asosan inkasso topshiriqnomalari qoʻyilganda bojxona organi Oʻzbekiston Respublikasi Adliya vazirligida 2013-yil 3-iyunda 2465-son bilan roʻyxatga olingan “Oʻzbekiston Respublikasida naqd pulsiz hisob-kitoblar toʻgʻrisida”gi nizomning 61-bandi ikkinchi xatboshisiga muvofiq toʻlov maqsadlarida soʻzsiz tartibda undirilishiga asos boʻlgan hujjatning (BYuD, tekshirish dalolatnomasi, bojxona organi xulosasi) raqami va sanasini koʻrsatishi majburligini inobatga olishlari kerak”.

X. Oʻzbekiston Respublikasi Oliy xoʻjalik sudi Plenumining “Kelishuv bitimini tasdiqlashda Oʻzbekiston Respublikasi Xoʻjalik protsessual kodeksi normalarining qoʻllanilishi haqida” 2009-yil 18-dekabrdagi 204-sonli qarorining 3, 16-bandlari va 23-bandning ikkinchi xatboshisi chiqarib tashlansin.

XI. Oʻzbekiston Respublikasi Oliy xoʻjalik sudi Plenumining “Xoʻjalik sudlari tomonidan Oʻzbekiston Respublikasi Soliq kodeksi umumiy qismini qoʻllashning ayrim masalalari haqida” 2010-yil 18-iyundagi 210-sonli qaroriga quyidagi oʻzgartish va qoʻshimchalar kiritilsin:

1) 1.1-banddagi “14-moddasining uchinchi qismiga” degan soʻzlar “16-moddasining uchinchi qismiga” degan soʻzlar bilan almashtirilsin;

2) 1.2-banddagi “14-moddasida” degan soʻzlar “16-moddasi” degan soʻzlar bilan almashtirilsin;

3) 8-bandning ikkinchi xatboshisi chiqarib tashlansin;

4) 13-bandning birinchi xatboshisi chiqarib tashlansin;

5) quyidagi mazmundagi 13.1-band bilan toʻldirilsin:

“13.1. Davlat soliq xizmati organi undiruvni soliq toʻlovchining mol-mulkiga qaratish toʻgʻrisida ariza bilan murojaat qilganda soliq qarzdorligining miqdori qonun hujjatlarida belgilangan miqdordan kam boʻlmasligi lozim. Agar qarzdorlik summasi belgilangan miqdordan kam boʻlsa, arizani qabul qilish XPK 117-moddasi birinchi qismining 1-bandiga mos ravishda rad etiladi, ushbu holat ariza ish yuritishga qabul qilinganidan keyin aniqlansa, ish yuritish XPK 86-moddasining 1-bandiga muvofiq tugatiladi”;

6) 16 — 16.2-bandlar chiqarib tashlansin;

7) 18-bandning birinchi xatboshisidagi “0,05” raqami “0,033” raqami bilan almashtirilsin;

8) 28.1-bandning birinchi xatboshisidan “115” raqami chiqarib tashlansin;

9) 29-band quyidagi tahrirda bayon etilsin:

“Davlat soliq xizmati organlari mansabdor shaxslarining SKning 92 — 104 moddalarida nazarda tutilgan qoidalarga rioya etmaganligi davlat soliq xizmati organining qarori davlat soliq xizmatining yuqori turuvchi organi tomonidan bekor qilinishi yoki mazkur qarorning sud tomonidan haqiqiy emas deb topilishi uchun asos boʻlishi mumkin”;

10) 32-bandidagi “117” raqami chiqarib tashlansin;

11) 37-band quyidagi tahrirda bayon etilsin:

“Soliq kodeksi 53-moddasining birinchi qismiga muvofiq banklar soliq toʻlovchining soliqni va (yoki) boshqa majburiy toʻlovni oʻtkazishga doir toʻlov topshiriqnomalarini, shuningdek tegishli vakolatli organning soliqlar va boshqa majburiy toʻlovlarni undirish toʻgʻrisidagi inkasso topshiriqnomalarini “Xoʻjalik yurituvchi subyektlarning bank hisob raqamlaridan pul mablagʻlarini hisobdan chiqarish tartibi toʻgʻrisida”gi yoʻriqnomada (Oʻzbekiston Respublikasi Adliya vazirligida 2012-yil 15-martda 2342-son bilan roʻyxatga olingan), “Oʻzbekiston Respublikasida naqd pulsiz hisob-kitoblar toʻgʻrisida”gi nizom (Oʻzbekiston Respublikasi Adliya vazirligida 2013-yil 3-iyunda 2465-son bilan roʻyxatga olingan) hamda “Oʻzbekiston Respublikasi davlat budjetining kassa ijrosi toʻgʻrisida”gi yoʻriqnomada (Oʻzbekiston Respublikasi Adliya vazirligida 2012-yil 1-fevralda 2320-son bilan roʻyxatga olingan) belgilangan navbatda bajarishlari shart”;

12) 38.1-band quyidagi mazmundagi ikkinchi xatboshisi bilan toʻldirilsin:

“Chakana savdo faoliyati bilan shugʻullanadigan yakka tartibdagi tadbirkorlar uchun daromadlar va tovar operatsiyalarini hisobga olish registrlari chakana savdo faoliyati bilan shugʻullanadigan yakka tartibdagi tadbirkorning daromadlar va tovar operatsiyalarini hisobga olish daftari va tovar cheklari daftarchasi hisoblanadi. Daromadlar va tovar operatsiyalarini hisobga olish registrlari yakka tartibdagi tadbirkor roʻyxatdan oʻtkazilgan joydagi davlat soliq xizmati organlari tomonidan roʻyxatdan oʻtkaziladi”;

ikkinchi xatboshi uchinchi xatboshi deb hisoblansin;

13) 39-band chiqarib tashlansin.

XII. Oʻzbekiston Respublikasi Oliy xoʻjalik sudi Plenumining “Mulk huquqini tan olish toʻgʻrisidagi ishlarni koʻrishda qonun hujjatlarini qoʻllashning ayrim masalalari haqida” 2010-yil 19-noyabrdagi 220-sonli qarorining 12.1-bandi chiqarib tashlansin.

Oliy xoʻjalik sudi raisi K. KAMILOV

Oliy xoʻjalik sudi Plenumining kotibi, sudya M. IZRAILBEKOVA

Toshkent sh.,

2013-yil 5-dekabr,

255-son