Engil sanoat mollari ishlab chiqarish Oʻzbekiston Davlat uyushmasi (“Oʻzbekyengilsanoat”) masalalari haqida (139-son)

20.05.1991

Oʻzbekiston SSJ Prezidenti huzuridagi Vazirlar Mahkamasining

qarori

Oʻzbekiston SSJ Prezidentining “Engil sanoat mollari ishlab chiqarish Oʻzbekiston Davlat uyushmasini tuzish toʻgʻrisida” 1991-yil 6-maydagi Farmoniga muvofiq hamda tashkil etilgan konsernlar, ishlab turgan birlashmalar va korxonalarning barqaror ishlashini taʼminlash va ularning faoliyatini muvofiqlashtirish maqsadida Vazirlar Mahkamasi qaror qiladi:

1. Belgilansinki, yengil sanoat mollari ishlab chiqarish Oʻzbekiston davlat uyushmasi (“Oʻzbekyengilsanoat”):

mustaqil ishlab chiqarish-xoʻjalik kompleksi boʻlib, oʻz faoliyatida Oʻzbekiston SSJ qonunlariga, Oʻzbekiston SSJ Prezidentining farmonlariga hamda Oʻzbekiston SSJ Prezidenti huzuridagi Vazirlar Mahkamasi tomonidan tasdiqlanadigan uyushma toʻgʻrisidagi Ustavga amal qiladi;

oʻz zimmasiga yuklangan vazifalar va funksiyalarning bajarilishi yuzasidan Oʻzbekiston SSJ Prezidenti huzuridagi Vazirlar Mahkamasi, ilovaga binoan uyushma tarkibiga kiruvchi konsernlar, korxonalar va tashkilotlar oldida javob beradi;

konsernlar va uyushmalar tarkibiga kiruvchi korxonalar va tashkilotlarning davlat mulkini boshqaradi, ularni xususiylashtirishni amalga oshiradi, belgilangan tartibda davlat korxonalari va tashkilotlarini barpo etadi, qayta tashkil qiladi va tugatadi.

2. Kengash uyushmaning yuqori boshqaruv organi hisoblanadi. Oʻnga konsernlar, shuningdek koʻrsatilgan konsernlar tarkibiga kirmaydigan konsernlar, birlashmalar, korxonalar va tashkilotlarning rahbarlari kiradi. Uyushma Kengashi uning boshqaruvini, raisini saylaydi, ishchi apparatining tuzilmasi tarkibini va xodimlari sonini, fondini, mehnatga haq toʻlash shartlarini, tizimini va uning xodimlari mehnatini ragʻbatlantirish shartlarini belgilaydi. Uyushma boshqaruvining raisi va uning oʻrinbosarlari Uyushma Kengashi tomonidan tayinlanadi va Oʻzbekiston SSJ Prezidenti huzuridagi Vazirlar Mahkamasi tomonidan tasdiqlanadi. Konsernlar boshqaruvlarining raislari lavozimiga koʻra uyushma boshqaruvi tarkibiga kiradi.

Konsernlar va uyushma tarkibiga kiradigan korxonalar hamda tashkilotlarning bosh direktorlari, shuningdek uyushma taftish komissiyasining aʼzolari va uning raisi uyushma boshqaruvi tomonidan tasdiqlanadi.

Uyushma boshqaruvi va ishchi apparati birlashmalar va korxonalarning foydadan ajratadigan mablagʻlari hisobiga saqlanadi.

3. Belgilansinki, konsernlar tarkibiga kirmaydigan konsernlar, mustaqil birlashmalar, korxonalar va tashkilotlarning faoliyati hamda uyushma boshqaruvi bilan oʻzaro munosabatlari uyushma Ustavi va taʼsis shartnomalari tomonidan, ularning yuridik va xoʻjalik mustaqilligini saqlab qolgan holda reglamentga solinadi.

4. Engil sanoat mollari ishlab chiqarish Oʻzbekiston Davlat uyushmasi:

konsernlar, birlashmalar va korxonalarning kooperatsiya asosida mahsulot yetkazib berishini rivojlantirish, moddiy-texnika taʼminoti, mahsulot sotishga doir ishlarini muvofiqlashtirishni taʼminlaydi;

ular bilan birgalikda tarmoqni iqtisodiy va ijtimoiy rivojlantirishning, fan-texnika taraqqiyotining istiqbolli va joriy rejalarini ishlab chiqadi va belgilaydi, kadrlar siyosatini amalga oshiradi;

uning tarkibiga kiruvchi konsernlar va korxonalar bilan kelishgan holda belgilangan tartibda normativ hujjatlarga muvofiq ishlaydigan tijorat banklarini, qoʻshma korxonalar, birlashmalar va tashkilotlarni (jumladan, xorijiy sheriklar bilan birga) tuzadi, firma savdosini tashkil etadi, “Oʻzbekyengilsanoat” uyushmasining tashqi iqtisodiy firmasi orqali asbob-uskunalar, xomashyo, materiallar va xalq isteʼmoli mollarini eksport va import qilish yuzasidan mustaqil operatsiyalarni amalga oshiradi;

birlashmalar va korxonalar tomonidan kapital qurilishga, qayta tiklash va texnika jihatidan jihozlashga, atrof-muhitni muhofaza qilishga, tarmoqlararo ilmiy-texnikaviy yechimlarni ishlab chiqishga ixtiyoriy ravishda ajratiladigan kapital mablagʻlarni, pudrat ishlarining limitlarini markazlashtirilgan tartibda taqsimlaydi;

konsernlar bilan birgalikda xomashyo va materiallarni xarid qilish va sotish yuzasidan toʻgʻridan toʻgʻrishartnomalar tuzadi, xomashyo va moddiy resurslarni taqsimlash ishlarini amalga oshiradi;

konsernlarga marketing, lizing xizmatlari, boshqaruv, shartnomaviy-huquqiy masalalar, mahsulotni reklama qilish va sotish, yarmarkalarda, koʻrgazmalarda qatnashish va boshqa masalalar yuzasidan yordam koʻrsatadi;

ajratiladigan chet el valyuta mablagʻlarini, shuningdek korxonalarning ular uchun import boʻyicha xomashyo, materiallar, asbob-uskunalar va ehtiyot qismlar sotib olishiga ixtiyoriy ravishda ajratadigan valyuta mablagʻlarini markazlashgan tartibda taqsimlaydi;

shartnoma majburiyatlarining, mahsulot sifatiga talablarning va xoʻjalik faoliyatini amalga oshirishning boshqa qoidalarining buzilishi bilan bogʻliq boʻlgan hakamlik masalalarini koʻrib chiqadi.

5. “Oʻzbekyengilsanoat” konsernlari va uyushmasi korxonalariga:

“Oʻzbekyengilsanoat” uyushmasi boshqaruvi bilan kelishilgan roʻyxat boʻyicha zarur asbob-uskunalar, xomashyo va moddiy resurslarga almashish sharti bilan tovar birjasiga yoki barter asosida shartnoma narxlari boʻyicha tuzilgan shartnomalardan ortiq ishlab chiqarilgan mahsulotni sotishga ruxsat berilsin;

mehnat jamoalarining xalq isteʼmoli mollarini ishlab chiqarishni koʻpaytirishdan moddiy manfaatdorligini oshirish va ularning kadrlarini barqarorlashtirish maqsadida, istisno tariqasida, 1991-1992-yillar uchun mehnatga haq toʻlash bazaviy fondi tuzilsin, u isteʼmol fondini (chakana narxlarning oshganligi munosabati bilan kompensatsiyani hisobga olgan holda) 400 soʻm darajasida hisoblab chiqarishda qabul qilinadi;

“Oʻzbekyengilsanoat” konsernlariga va uyushmasiga kiruvchi korxonalarga xomashyo va materiallar yetkazib beruvchilar hamda ulgurji va chakana savdo korxonalari bilan hisob-kitob qilish uchun limitlangan chek daftarchalarining hisob-kitob cheklaridan foydalanish huquqi berilsin.

6. 1991-1992-yillarda “Oʻzbekyengilsanoat” uyushmasiga kiruvchi konsernlar, birlashmalar va korxonalarning mahsulot ishlab chiqarish hajmini koʻpaytirish hisobiga oladigan foydasining (xomashyo va materiallar yetkazib berish yuzasidan tuzilgan shartnomalarga nisbatan yillar boʻyicha) Oʻzbekiston SSJ jumhuriyat budjetiga oʻtkazilishi lozim boʻlgan qismi soliq olishdan ozod etilsin.

OʻzSSJ Moliya vazirligi “Oʻzbekyengilsanoat” uyushmasi ishtirokida bir oy muddat ichida koʻrsatilgan foydani hisoblab chiqarish metodikasini ishlab chiqsin va tasdiqlasin.

7. “Oʻzbekyengilsanoat” uyushmasiga va uning konsernlariga yangidan kiruvchi korxonalar foydasining Oʻzbekiston SSJ jumhuriyat budjetiga oʻtkazilishi lozim boʻlgan qismiga loyihadagi quvvatlarni oʻzlashtirish davrida, ammo koʻpi bilan ikki yilda soliq solinmasin.

8. Korxonalarning tashqi iqtisodiy aloqalarni rivojlantirishdan manfaatdorligini oshirish maqsadida OʻzSSJ Iqtisodiyot qoʻmitasi “Oʻzbekyengilsanoat” uyushmasiga har yili belgilangan tartibda tarmoq korxonalari tomonidan ishlab chiqariladigan, litsenziya beriladigan mahsulotni eksportga chiqarishga kvota ajratsin.

9. OʻzSSJ Iqtisodiyot qoʻmitasi, OʻzSSJ Moddiy-texnika taʼminoti davlat-kooperativ qoʻmitasi, Oʻzbekiston SSJ vazirliklari, idoralari “Oʻzbekyengilsanoat” uyushmasiga 1992-yil uchun ishlab chiqarish, ekspluatatsiya ehtiyojlari, kapital qurilish va ilmiy-tadqiqot ishlari olib borish uchun moddiy-xomashyo resurslari va moliya mablagʻlari ajratishni nazarda tutsinlar va uning uchun OʻzSSJ Engil sanoat vazirligi uchun amal qilib kelgan taʼminot tartibini saqlab qolsinlar.

10. “Oʻzglavlegsnabsbit” birkitilgan nomenklatura boʻyicha uyushma uchun xomashyo, materiallar va komplektlovchi buyumlarni markazlashgan tartibda yetkazib berish va xarid qilishni amalga oshirsin va uyushmaga guruhli naryadlar bersin.

11. “Oʻzbekyengilsanoat” davlat uyushmasi bir oy muddat ichida uyushma Ustavi loyihasini Vazirlar Mahkamasi tasdigʻiga taqdim etsin.

12. Tuzilayotgan uyushma apparati Paradlar xiyoboni koʻchasi, 5-uydagi OʻzSSJ Engil sanoat vazirligi egallab kelgan xonalarga joylashtirilsin.

13. OʻzSSJ Moliya vazirligi va OʻzSSJ Aloqa vazirligi 1991-yilda OʻzSSJ Engil sanoat vazirligi uchun belgilangan transport vositalaridan foydalanishning barcha limitlarini, aloqalar va telefon turlarini “Oʻzbekyengilsanoat” uyushmasi uchun saqlab qolsinlar.

14. Qoraqalpogʻiston MSSJ Vazirlar Kengashi, viloyat ijroiya qoʻmitalari, Toshkent shahar ijroiya qoʻmitasi, jumhuriyat vazirliklari va idoralari “Oʻzbekyengilsanoat” Oʻzbekiston davlat uyushmasining birlashmalari va korxonalari faoliyatini rivojlantirishning oʻz kompetensiyalariga kiruvchi masalalarini oʻz vaqtida hal etishga yordam bersinlar va uni taʼminlasinlar.

Vazirlar Mahkamasining Rais I. KARIMOV

Toshkent sh.,

1991-yil 20-may,

139-son

Vazirlar Mahkamasining 1991-yil 20-maydagi 139-sonli qaroriga ILOVA

Engil sanoat mollari ishlab chiqarish “Oʻzbekyengilsanoat” Oʻzbekiston davlat uyushmasi tarkibiga bevosita kiruvchi korxonalar va tashkilotlarning

ROʻYXATI