Yuridik shaxslarning bojxona tashuvchisi sifatidagi faoliyati ustidan nazorat olib borish tartibi toʻgʻrisidagi nizomni tasdiqlash haqida (2555-son)

13.01.2014

OʻZBEKISTON RESPUBLIKASI DAVLAT BOJXONA QOʻMITASI OʻZBEKISTON AVTOMOBIL VA DARYo TRANSPORTI AGENTLIGINING

Qarori

[Oʻzbekiston Respublikasi Adliya vazirligi tomonidan 2014-yil 13-yanvarda roʻyxatdan oʻtkazildi, roʻyxat raqami 2555]

Oʻzbekiston Respublikasi Bojxona kodeksi (Oʻzbekiston Respublikasi Oliy Majlisining Axborotnomasi, 1998-y., 2-son, 36-modda) va Oʻzbekiston Respublikasi “Davlat bojxona xizmati toʻgʻrisida”gi Qonunining (Oʻzbekiston Respublikasi Oliy Majlisining Axborotnomasi, 1997-y., 9-son, 230-modda) 6-moddasiga muvofiq Oʻzbekiston Respublikasi Davlat bojxona qoʻmitasi va Oʻzbekiston avtomobil va daryo transporti agentligi qaror qiladi:

1. Yuridik shaxslarning bojxona tashuvchisi sifatidagi faoliyati ustidan nazorat olib borish tartibi toʻgʻrisidagi nizom ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga kiradi.

Davlat bojxona qoʻmitasi raisi Z. DUSANOV

Toshkent sh.,

2013-yil 10-dekabr,

01-02/12-31-son

Oʻzbekiston avtomobil va daryo transporti agentligi boshligʻi v.b. Sh. ShOVAHOBOV

Toshkent sh.,

2013-yil 10-dekabr,

15-son

Oʻzbekiston Respublikasi Davlat bojxona qoʻmitasi va Oʻzbekiston avtomobil va daryo transporti agentligining 2013-yil 10-dekabrdagi 01-02/12-31, 15-son qaroriga ILOVA

Yuridik shaxslarning bojxona tashuvchisi sifatidagi faoliyati ustidan nazorat olib borish tartibi toʻgʻrisidagi

nizom

Mazkur Nizom Oʻzbekiston Respublikasi Bojxona kodeksining (Oʻzbekiston Respublikasi Oliy Majlisining Axborotnomasi, 1998-y., 2-son, 36-modda) 64-moddasiga muvofiq yuridik shaxslarning bojxona tashuvchisi sifatidagi faoliyati ustidan nazorat olib borish tartibini belgilaydi.

I bob. Umumiy qoidalar

1. Yuridik shaxslarning bojxona tashuvchisi sifatidagi faoliyati ustidan nazorat davlat bojxona xizmati organlari tomonidan Oʻzbekiston Respublikasi Bojxona kodeksining 39-moddasiga muvofiq bojxona nazorati shakllarini qoʻllash va bojxona tashuvchilari reyestriga kiritish yoʻli bilan olib boriladi.

2. Bojxona tashuvchilarining hisobini yuritish va faoliyati monitoringini olib borish uchun davlat bojxona xizmati organlari tomonidan elektron avtomatlashtirilgan axborot tizimi qoʻllaniladi.

3. Bojxona tashuvchisi Oʻzbekiston Respublikasi Bojxona kodeksi asosida tashuvchiga nisbatan qoʻyiladigan talablarga rioya etishi shart.

II bob. Bojxona tashuvchilari reyestri

4. Yuridik shaxs bojxona tashuvchisi sifatida Oʻzbekiston Respublikasi Davlat bojxona qoʻmitasini (bundan buyon matnda DBQ deb yuritiladi) ushbu Nizomning 1-ilovasida keltirilgan shaklga muvofiq xabarnoma orqali yozma ravishda xabardor qiladi.

5. Xabarnomaga yuridik shaxs rahbari tomonidan imzolangan va muhr bilan tasdiqlangan quyidagi hujjatlarning nusxalari ilova qilinadi:

a) yuridik shaxsning davlat roʻyxatidan oʻtganligi toʻgʻrisida guvohnoma;

b) Oʻzbekiston Respublikasi Bojxona kodeksi 62-moddasining ikkinchi qismida nazarda tutilgan hollarda fuqarolik javobgarligini sugʻurtalash haqida shartnoma tuzilganligini tasdiqlovchi sugʻurta polisi. Bunda, sugʻurta polisi boʻyicha umumiy qiymat 50000 (ellik ming) AQSh dollaridan kam boʻlmasligi lozim;

v) Oʻzbekiston Respublikasi Vazirlar Mahkamasining 2006-yil 14-iyuldagi 138-son qarori (Oʻzbekiston Respublikasi qonun hujjatlari toʻplami, 2006-y., 28-29-son, 272-modda) bilan tasdiqlangan Avtomobil transportida yoʻlovchilarni va yuklarni shaharda, shahar atrofida, shaharlararo va xalqaro yoʻnalishlar boʻyicha tashish faoliyatini litsenziyalash toʻgʻrisidagi nizomga muvofiq Oʻzbekiston avtomobil va daryo transporti agentligi tomonidan berilgan litsenziya;

g) Yuklarni xalqaro yoʻllarda tashish kitobchasini qoʻllagan holda yuklarni xalqaro tashish bojxona Konvensiyasining (1975-yil, Jeneva) 2-ilovasi talablariga muvofiq maxsus jihozlangan, bojxona tashuvchisi sifatida yuklarni tashishda foydalanadigan avtotransport vositalari roʻyxati.

6. Agar taqdim etilgan hujjatlar toʻliq hajmda boʻlmasa, taqdim etilgan hujjatlardagi maʼlumotlar shubhali boʻlsa yoki yetarli boʻlmasa, hujjatlar taqdim etilgan kundan boshlab 5 kun ichida, DBQ tomonidan bojxona tashuvchisiga asos boʻlgan sabablarni koʻrsatgan holda yozma xabarnoma yuboriladi.

7. Ushbu Nizom talablariga muvofiq talab etilgan barcha hujjatlar taqdim qilingandan soʻng bojxona tashuvchisi bojxona tashuvchilari reyestriga kiritiladi. Reyestr ushbu Nizomning 2-ilovasidagi shaklda DBQ tomonidan elektron tarzda yuritiladi va DBQning rasmiy saytida eʼlon qilinadi.

8. DBQ davlat bojxona xizmati organlarining hududiy boshqarmalarini bojxona tashuvchisi bojxona tashuvchilari reyestriga kiritilganligi toʻgʻrisidagi maʼlumotlar haqida xat orqali xabardor qiladi va ushbu xatning nusxasini bojxona tashuvchisiga yuboradi.

9. Mazkur Nizomning 5-bandida qayd etilgan hujjatlarga oʻzgartirishlar kiritilishi kutilayotganda, bojxona tashuvchisi ushbu oʻzgartirishlar kiritilgandan soʻng 3 kun davomida DBQga xabar berishi shart.

III bob. Yakuniy qoida

10. Ushbu Nizom talablarini buzilishida aybdor boʻlgan shaxslar qonunchilikda belgilangan tartibda javobgarlikka tortiladilar.

Yuridik shaxslarning bojxona tashuvchisi sifatidagi faoliyati ustidan nazorat olib borish tartibi toʻgʻrisidagi nizomga 1-ILOVA

Yuridik shaxslarning bojxona tashuvchisi sifatidagi faoliyati ustidan nazorat olib borish tartibi toʻgʻrisidagi nizomga 2-ILOVA

(Oʻzbekiston Respublikasi qonun hujjatlari toʻplami, 2014-y., 3-son, 36-modda)