1994-yilda eksport qilinadigan resurslarni taqsimlash toʻgʻrisida (184-son)

05.04.1994

Oʻzbekiston Respublikasi Vazirlar Mahkamasining

qarori

Davlat ehtiyojlari uchun import mahsulotlarni yetkazib berishni oʻz vaqtida amalga oshirish hamda xorijiy kreditlarni toʻlashni taʼminlash maqsadida Vazirlar Mahkamasi qaror qiladi:

1. Quyidagilar:

1994-yilda import mahsulotlarni markazlashtirilgan tartibda yetkazib berishni bajarish, kreditlarni toʻlash, transportga sarflangan kira haqlarini toʻlash uchun eksport, resurslari kvotalarning taqsimlanishi 1-ilovaga* muvofiq;

1994-yilda Oʻzbekiston Respublikasi boʻyicha asosiy oziq-ovqat mahsulotlari resurslarining balanslari 2-ilovaga* muvofiq;

1994-yilda Oʻzbekiston Respublikasi isteʼmolchilari boʻyicha paxta tolasi limitlari 3-ilovaga* muvofiq;

1994-yilda MDH mamlakatlariga va boltiqboʻyi respublikalariga paxta tolasi yetkazib berish limitlari 4-ilovaga* muvofiq tasdiqlansin.

* Ilovalar berilmaydi.

2. “Oʻzistiqbolstat” davlat qoʻmitasi Oʻzbekiston Respublikasi Tashqi iqtisodiy aloqalar vazirligi bilan birgalikda bir hafta muddatda tasdiqlangan eksport resurslari kvotalarining taqsimlanishini hisobga olgan holda tovarlar (ishlar, xizmatlar)ni eksport qilish hajmlarining prognozi va 1994-yilda chet el valyutasidagi mablagʻlarning xarajatlari prognozi boʻyicha Vazirlar Mahkamasiga takliflar kiritsin.

3. Vazirliklar va idoralar, xoʻjalik yurituvchi birlashmalar korxonalarning ishlab chiqarish imkoniyatlarini sinchiklab tahlil qilish asosida Oʻzbekiston Respublikasi Tashqi iqtisodiy aloqalar vazirligiga eksport qilinadigan tovarlar, ishlar va xizmatlar hajmini koʻpaytirish va ularning nomenklaturasini kengaytirishga oid takliflar kiritsinlar.

4. “Oʻzistiqbolstat” davlat qoʻmitasi Oʻzbekiston Respublikasi Moliya vazirligi, Tashqi iqtisodiy aloqalar vazirligi, “Oʻzdavpaxtasanoatsotish” uyushmasi, boshqa vazirliklar va idoralar, xoʻjalik yurituvchi birlashmalar bilan birgalikda davlat ehtiyojlari uchun oziq-ovqat mahsulotlari importini taʼminlash maqsadida eksportga tovar yetkazib berishni bajarish yuzasidan zarur choralar koʻrsin.

5. “Oʻzdavpaxtasanoatsotish” uyushmasi umuman jahon bozori, shu jumladan, MDH mamlakatlari bozorlaridagi konyunkturaning oʻzgarishlarini hisobga olgan holda paxta tolasining belgilangan limitlarga muvofiq oʻz vaqtida yuklab joʻnatilishini taʼminlasin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1994-yil 5-aprel,

184-son