Haj ziyoratini tashkil etish toʻgʻrisida (172-son)

29.03.1994

Oʻzbekiston Respublikasi Vazirlar Mahkamasining

qarori

Oʻzbekiston Respublikasining “Vijdon erkinligi va diniy tashkilotlar toʻgʻrisida”gi Qonuniga binoan, mamlakatimiz musulmonlaridan tushayotgan koʻplab arizalar, xohish va istaklarni inobatga olgan holda, 1994-yil Saudiya Arabistoniga muborak haj safarini tashkil etish maqsadida Vazirlar Mahkamasi qaror qiladi:

1. Movarounnahr musulmonlari idorasining 1994-yil haj ziyoratini tashkil etish toʻgʻrisidagi taklifi qabul qilinsin.

2. 1994-yil haj ziyoratini uyushtirish boʻyicha respublika tashkiliy qoʻmitasi tarkibi ilovaga muvofiq tasdiqlansin hamda mazkur qoʻmita haj ziyoratini tashkil etish yuzasidan zarur chora-tadbirlarni ishlab chiqib, ularni joriy qilishga kirishsin.

3. Qoraqalpogʻiston Respublikasi Vazirlar Kengashi, Toshkent shahri va barcha viloyat hokimliklari joylarda tashkiliy qoʻmitalar tuzib, musulmonlarning hajga borishlarini tashkil etish bilan bogʻliq barcha masalalarni Vazirlar Mahkamasi huzuridagi Diniy ishlar qoʻmitasi bilan birgalikda hal etsinlar.

4. “Oʻzbekiston havo yoʻllari” milliy aviakompaniyasi (Gʻ. Rafiqov) ga:

ziyoratchilarni 1994-yil may oyining boshlarida har ikkala tomonning texnik imkoniyatlarini hisobga olgan holda Jidda (Saudiya Arabistoni) shahriga olib borish va qaytarib olib kelish;

ziyoratchilar uchun qulay sharoitlar yaratish, ularning xarajatlarini qisqartirish maqsadida samolyotlar bilan joʻnash va qaytishning Toshkent, Samarqand va Fargʻona shaharlaridagi punktlarini tashkil etish topshirilsin.

5. Oʻzbekiston Respublikasi Ichki ishlar vazirligi (Z. Almatov), Tashqi ishlar vazirligi (S. Saidqosimov), Davlat soliq qoʻmitasi Bojxona Bosh boshqarmasi (Y. Sheraliyev) Diniy ishlar qoʻmitasining taqdimiga koʻra ziyoratchilarning safar hujjatlarini belgilangan muddatga rasmiylashtirishni taʼminlasinlar.

6. Oʻzbekiston Respublikasi Sogʻliqni saqlash vazirligi (Sh. Karimov) ziyoratchilarni Saudiya Arabistonining iqlimiy sharoitini hisobga olgan holda tibbiy koʻrikdan oʻtkazib, tegishli xulosa berishni va haj mavsumida tibbiy yordam koʻrsatishni tashkil etsin.

7. Milliy xavfsizlik xizmati (Gʻ. Aliyev) ziyoratchilarning umumiy xavfsizligini taʼminlash boʻyicha chora-tadbirlar belgilasin.

8. “Oʻzbeksavdo” davlat uyushmasi (U. Nabiyev) Toshkent shahri va viloyatlar tashkiliy qoʻmitalarining buyurtmalariga binoan joylarda ziyoratchilar uchun kerakli buyumlar savdosini tashkil qilsin.

9. Oʻzbekiston Respublikasi Tashqi iqtisodiy faoliyat milliy banki (R. Azimov) ga Vazirlar Mahkamasi huzuridagi Diniy ishlar qoʻmitasi va Movarounnahr musulmonlari idorasi bilan birgalikda tasdiqlangan Oʻzbekiston Respublikasidan haj ziyoratiga boruvchilarning roʻyxati asosida har bir ziyoratchi uchun 500 AQSh dollarini imtiyoz bilan (8 ming soʻm-kuponga 1 AQSh dollari hisobida) almashtirib berishni tashkil etish topshirilsin.

Oʻzbekiston Respublikasi Moliya vazirligi (B. Hamidov) Tashqi iqtisodiy faoliyat milliy bankiga respublika valyuta jamgʻarmasidan 2,0 mln AQSh dollari ajratsin.

Ziyoratchilarga AQSh dollari sotishdan tushgan soʻm-kuponlarning Tashqi iqtisodiy faoliyat milliy bankidagi Moliya vazirligining maxsus hisobiga oʻtkazilishi belgilab qoʻyilsin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari M. Qoraboyev zimmasiga yuklatilsin.

Vazirlar Mahkamasining Raisi I. KARIMOV

Toshkent sh.,

1994-yil 29-mart,

172-son

Vazirlar Mahkamasining 1994-yil 29-martdagi 172 sonli qaroriga ILOVA

1994-yil haj ziyoratini tashkil etish boʻyicha respublika tashkiliy qoʻmitasining

TARKIBI