Umumxalq bayrami Navroʻz munosabati bilan “Mustaqillik, tinchlik, mehr-shafqat” xayriya hasharini va telemarafonini oʻtkazish toʻgʻrisida (99-son)

05.03.1992

Oʻzbekiston Respublikasi Prezidenti huzuridagi Vazirlar Mahkamasining

qarori

Milliy qadriyatlarning tiklanishida Navroʻz bayramining ahamiyatini eʼtiborga olib Vazirlar Mahkamasi qaror qiladi:

1. Oʻzbekiston Respublikasi Yoshlar Ittifoqi, “Foton” ishlab chiqarish birlashmasi, Yoʻldosh Oxunboboyev nomidagi toʻqimachilik va yengil sanoat instituti, Toshkent shahar Oktabr nohiyasi “Yangi shahar” mahallasi jamoasi, Chortoq shahar tikuvchilik fabrikasi jamoalarining 1992-yil 14-mart kuni “Navroʻz” umumxalq xayriya hasharini oʻtkazish toʻgʻrisidagi hamda Oʻzbekiston Respublikasi Davlat teleradio kompaniyasi jamoasi, “El” xalqaro uyushmasi, Oʻzbekiston bolalar jamgʻarmasi, “Mehr-shafqat va salomatlik” jamgʻarmasi, Respublika Nogironlar jamiyati, Qizil Yarim oy jamiyati jamoalarining 1992-yil 21-mart kuni “Mustaqillik, tinchlik va mehr-shafqat” xayriya telemarafonini oʻtkazish toʻgʻrisidagi takliflari maʼqullansin.

2. Mehnat jamoalarining “Mustaqillik, tinchlik va mehr-shafqat” shiori ostida oʻtkaziladigan umumxalq xayriya hashari va telemarafoniga rahbarlik qilish umumxalq bayrami Navroʻzga tayyorgarlik koʻrish va oʻtkazish komissiyasiga yuklatilsin. Xayriya tadbirlarini oʻtkazish yuzasidan respublika viloyatlari, shahar, qishloq, mahalla kengashlari, vazirliklar, birja va barcha turdagi korxona va tashkilotlar aniq reja asosida tashkiliy va amaliy tadbirlarni ishlab chiqsinlar.

Xayriya hasharidan yigʻilgan va ishlab topilgan mablagʻlar “Navroʻz” xayriya jamgʻarmasiga topshirilsin.

3. Shahar va qishloqlarni obodonlashtirish, koʻkalamzorlashtirish, koʻchat oʻtqazish, bogʻlar yaratish, qabristonlarni sarishtalash ishlariga alohida eʼtibor berilsin.

4. Oʻzbekiston Respublikasi Aloqa vazirligi, Davlat banki telemarafon oʻtkazilayotgan paytda bir kecha-kunduz davomida mablagʻlarni qabul qilib olish uchun navbatchilik ishlarini tashkil etsinlar.

5. Oʻzbekiston Respublikasi Tashqi ishlar vazirligi Madaniyat vazirligi bilan birgalikda chet ellik ishbilarmonlardan, madaniyat xodimlaridan iborat barcha mehmonlarning umumxalq xayriya ishlarida, bayramida va telemarafonida ishtirok etishlari uchun qulay shart-sharoitlar yaratsinlar.

6. Oʻzbekiston Davlat teleradio kompaniyasi, Madaniyat vazirligi va Davlat matbuot qoʻmitasi umumxalq xayriya ishlari, Navroʻz tantanalarini va telemarafonining maʼnaviy va tarbiyaviy, badiiy jihatdan yuksak saviyada oʻtishi uchun barcha ijodiy kuchlarni safarbar etsinlar.

Oʻzbekiston Respublikasining Bosh vaziri A. MUTALOV

Toshkent sh.,

1992-yil 5-mart,

99-son