Koʻchmas mulkka boʻlgan huquqlarni davlat roʻyxatidan oʻtkazish tartibini takomillashtirish toʻgʻrisida (1-son)

07.01.2014

Oʻzbekiston Respublikasi Vazirlar Mahkamasining

qarori

Ishbilarmonlik muhitini tubdan yaxshilash, tadbirkorlik faoliyatini amalga oshirish uchun yanada qulay shart-sharoitlar yaratish, koʻchmas mulkka boʻlgan huquqlarni davlat roʻyxatidan oʻtkazish bilan bogʻliq tartibotlar sonini va muddatlarini qisqartirish, shuningdek Oʻzbekiston Respublikasi Prezidentining “Ishbilarmonlik muhitini yanada tubdan yaxshilash va tadbirkorlikka yanada keng erkinlik berish chora-tadbirlari toʻgʻrisida” 2012-yil 18-iyuldagi PF-4455-son Farmoni ijrosini taʼminlash maqsadida Vazirlar Mahkamasi qaror qiladi:

1. Quyidagilar:

Tuman (shahar) yer kadastri daftarini yuritish tartibi toʻgʻrisidagi nizom 2-ilovaga muvofiq tasdiqlansin.

2. Shunday tartib oʻrnatilsinki, unga muvofiq vakolatli organlar, vazirliklar va idoralar tomonidan Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasining hududiy organlariga axborot tizimlari kompleksidan foydalangan holda:

amalga oshirilgan koʻchmas mulk bilan bogʻliq bitimlar toʻgʻrisida — notarial idoralar tomonidan, bitim rasmiylashtirilgandan soʻng ikki kun mobaynida;

buzib tashlanishi lozim boʻlgan uy-joylar, shuningdek boshqa binolar va inshootlar toʻgʻrisida — Oʻzbekiston Respublikasi Qurilish vazirligining hududiy organlari tomonidan, tegishli davlat organining uy-joylar, shuningdek boshqa binolar va inshootlar buzib tashlanishi toʻgʻrisidagi qarori qabul qilingandan soʻng ikki kun mobaynida;

koʻchmas mulkni oʻzgaga oʻtkazishga taqiqlar va unga nisbatan qoʻyilgan xatga olishlar toʻgʻrisida — Oʻzbekiston Respublikasi Bosh prokuraturasi huzuridagi Majburiy ijro byurosi, prokuratura, ichki ishlar va Davlat xavfsizlik xizmati organlari tomonidan, tegishli qaror qabul qilingandan soʻng ikki kun mobaynida;

mulk soligʻi va yer soligʻi (yagona yer soligʻi) boʻyicha soliq qarzdorligining holati toʻgʻrisida — Oʻzbekiston Respublikasi Davlat soliq qoʻmitasi tomonidan, axborotdan real vaqt rejimida foydalanishni cheklash boʻyicha belgilangan talablarga rioya qilgan holda axborot taqdim etiladi.

3. Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi:

bir oy muddatda — ushbu qarorning 2-bandida koʻrsatilgan vakolatli organlar, vazirliklar va idoralar bilan birgalikda, maʼlumotlarni axborot tizimi kompleksidan foydalangan holda taqdim etish boʻyicha oʻzaro hamkorlik qilish tartibini ishlab chiqsin va tasdiqlasin;

koʻchmas mulkka boʻlgan roʻyxatdan oʻtkazilgan huquqlar hamda ular bilan bogʻliq bitimlar toʻgʻrisidagi maʼlumotlar va koʻchmas mulk toʻgʻrisidagi maʼlumotlar bazasida mavjud boʻlgan boshqa maʼlumotlar manfaatdor vazirliklar va idoralarga taqdim etilishini qonun hujjatlarida belgilangan tartibda taʼminlasin;

2014-yilning 1-iyuligacha Oʻzbekiston Respublikasi Aloqa, axborotlashtirish va telekommunikatsiya texnologiyalari davlat qoʻmitasi bilan birgalikda amaldagi “bir oyna” prinsipi boʻyicha koʻchmas mulkka boʻlgan huquqlarni roʻyxatdan oʻtkazish boʻyicha amaldagi dasturiy taʼminotni ushbu qaror talablariga muvofiqlashtirsin;

er kadastri daftarini yuritish boʻyicha maʼlumotlar bazasi muntazam yangilanib borishini taʼminlovchi dasturiy taʼminot ishlab chiqsin va uni 2015-yil 1-yanvardan boshlab joriy qilsin;

bir oy muddatda — mutaxassislarni koʻchmas mulkka boʻlgan huquqlarni davlat roʻyxatidan oʻtkazish va yer kadastri daftarini yuritishning ushbu qaror bilan belgilangan tartibidan foydalangan holda oʻqitish guruhlar boʻyicha seminarlar oʻtkazsin;

ikki oy muddatda — Oʻzbekiston Respublikasi Adliya vazirligi bilan birgalikda ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

4. Mazkur qarorning bajarilishini nazorat qilish Oʻzbekiston Respublikasi Vazirlar Mahkamasining Qishloq va suv xoʻjaligi, qishloq xoʻjaligi mahsulotlarini qayta ishlash va isteʼmol tovarlari masalalari axborot-tahlil departamentiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2014-yil 7-yanvar,

1-son

Vazirlar Mahkamasining 2014-yil 7-yanvardagi 1-son qaroriga 2-ILOVA

Tuman (shahar) yer kadastri daftarini yuritish tartibi toʻgʻrisida

NIZOM

I. Umumiy qoidalar

1. Mazkur Nizom “Davlat yer kadastri toʻgʻrisida”gi Oʻzbekiston Respublikasi Qonuniga muvofiq yer kadastri daftarining tuzilishi, mazmunini hamda uni tumanlarda va viloyatga boʻysunuvchi shaharlarda yuritish tartibini belgilaydi

2. Tuman (shahar) yer kadastri daftari (keyingi oʻrinlarda yer kadastri daftari deb ataladi) yerlarni hisobga olish va ularni baholash boʻyicha asosiy hujjat boʻlib, u yer uchastkalariga boʻlgan huquqlarni davlat roʻyxatidan oʻtkazish uchun zarur maʼlumotlarni, yer uchastkasining joylashgan oʻrnini, qaysi maqsadda foydalanish moʻljallanganligini, unga egalik qilish, undan foydalanish, uni ijaraga olish huquqlarini va unga boʻlgan mulk huquqini hamda ushbu maʼlumotlarning oʻzgarishi toʻgʻrisidagi maʼlumotlarni oʻz ichiga oladi, yer uchastkasining miqdor va sifat holati toʻgʻrisidagi axborot manbai hisoblanadi.

Yer kadastri daftari shakllarini toʻldirish tartibi “Yergeodezkadastr” davlat qoʻmitasi tomonidan belgilanadi.

3. Yer kadastri daftari maʼlumotlari yerlardan foydalanish, ularni tiklash va muhofaza qilish, yerlarni berish (sotish) va olib qoʻyish, yer uchun haq toʻlash miqdorini aniqlashda, yer tuzishda, xoʻjalik faoliyatini baholashda hamda yerlardan foydalanish va ularni muhofaza qilish bilan bogʻliq boʻlgan boshqa chora-tadbirlarni amalga oshirishda foydalanilishi shart.

4. Yer kadastri daftari “Yergeodezkadastr” davlat qoʻmitasining tuman (shahar) boʻlinmalari tomonidan davlat budjeti hisobiga yuritiladi.

5. Yer kadastri daftarida asosiy hisob tariqasida oldingi yil maʼlumotlari qabul qilinadi.

Yer uchastkalarining egalari, foydalanuvchilari, ijarachilari va mulkdorlari (keyingi oʻrinlarda yerdan foydalanuvchilar deb ataladi) yer kadastri maʼlumotlari oʻzgargandan keyin oʻn kun muddatda “Yergeodezkadastr” davlat qoʻmitasining tegishli tuman (shahar) boʻlinmalariga yer uchastkalarining huquqiy holati, yerlarning miqdor va sifat boʻyicha holati, yerlardan foydalanilishi, ularning baholanishidagi oʻzgarishlar toʻgʻrisida axborot berishga majburdirlar.

Zaxira va aholi punktlarining umumiy foydalanishdagi yerlari toʻgʻrisidagi maʼlumotlarning oʻzgarishi “Yergeodezkadastr” davlat qoʻmitasining tuman (shahar) boʻlinmalari tomonidan mavjud hujjatlar va materiallar asosida aniqlanadi.

6. “Yergeodezkadastr” davlat qoʻmitasining tuman (shahar) boʻlinmalari yerdan foydalanuvchilardan yer uchastkalarining huquqiy holati, tarkibi va foydalanilishi oʻzgarganligi toʻgʻrisidagi maʼlumotlarni oladilar va ularni uch kun muddatda joyida tekshirgandan keyin joriy oʻzgarishlarni yer kadastri daftariga kiritadilar.

7. Yer kadastri daftari maxsus dasturiy mahsulot boʻyicha ishlab chiqilgan elektron shaklda yuritiladi. Yer kadastri daftarining maʼlumotlari qogʻoz shaklida foydalanish va saqlash uchun nusxasi bosib chiqariladi, tegishli imzolar bilan rasmiylashtiriladi va maxsus yigʻmajildga tikib qoʻyiladi.

2021-yil 1-yanvardan boshlab yer kadastri daftari faqat Milliy geoaxborot tizimida elektron shaklda yuritiladi.

8. Yer kadastri daftari maʼlumotlari umuman tuman (viloyatga boʻysunuvchi shahar) boʻyicha oʻtgan yil boʻyicha yerlarning hajmi va ulardan foydalanish toʻgʻrisida har yilgi hisobotni tuzishga asos boʻladi.

9. Yer kadastri daftari quyidagi boʻlimlardan tashkil topadi:

yerdan foydalanuvchilar toʻgʻrisidagi umumiy maʼlumotlar;

erlarning miqdorini hisobga olish;

yerlarning sifatini hisobga olish (tuproqlarning bonitirovkasi toʻgʻrisidagi maʼlumotlar);

erlarning qiymatini baholash.

II. Yerdan foydalanuvchilar va yer uchastkalariga boʻlgan huquqni davlat roʻyxatidan oʻtkazilganligi toʻgʻrisidagi umumiy maʼlumotlar

10. Yer fondi maʼlumotlarini har xil koʻrsatkichlar boʻyicha dasturiy mahsulot asosida tahlil qilish imkonini taʼminlash maqsadida yer kadastri daftariga ushbu Nizomga 1-ilovaga muvofiq shakl boʻyicha yuridik shaxslarning yer toifalari boʻyicha yer uchastkalari toʻgʻrisidagi asosiy maʼlumotlar kiritiladi.

11. Yerdan foydalanuvchilarning yer uchastkalariga boʻlgan huquqlarini davlat roʻyxatidan oʻtkazish koʻchmas mulkka boʻlgan huquqlarni va ular bilan bitimlarni davlat roʻyxatidan oʻtkazuvchi organlar tomonidan qonun hujjatlarida belgilangan tartibda amalga oshiriladi.

III. Yerlarning miqdorini hisobga olish tartibi

12. Yerlarning miqdori har bir yerdan foydalanuvchi tomonidan foydalanilayotgan yer uchastkalarining maydonlari toʻgʻrisida aniq maʼlumotlarni olish maqsadida yerlarning toifalari boʻyicha ushbu Nizomga 2-ilovaga muvofiq shakl boʻyicha hisobga olinadi. Bunda yerlarni toifalarga taqsimlash, ularning xususiyatlarini hisobga olib, ham qishloq joylardagi yerlar, ham aholi punktlarining yerlari uchun yagona tamoyil boʻyicha amalga oshiriladi.

13. Yerlarning maydoni 0,001 gektargacha aniqlikda hisobga olinadi.

14. Yerlarning miqdori yer uchastkalaridan foydalanuvchi yuridik va jismoniy shaxslar boʻyicha yer uchastkalariga boʻlgan huquqlar davlat roʻyxatidan oʻtkazilganligi yoki oʻtkazilmaganligidan qatʼi nazar, ushbu Nizomga 2-ilovaga muvofiq shakl boʻyicha hisobga olinadi.

15. Fuqarolarga dehqon xoʻjaligini (shaxsiy yordamchi) xoʻjalikni yuritish, yakka tartibda uy-joy qurish va uy-joyni obodonlashtirish, shuningdek jamoat bogʻdorchiligi va uzumchiligini yuritish uchun berilgan yer uchastkalari toʻgʻrisidagi maʼlumotlar yerdan foydalanuvchilar sifatida alohida satrda umumiy soni va ular tomonidan foydalanilayotgan maydonlar koʻrsatilib, har bir fuqaro boʻyicha hisobga olish asosida 3-ilovaga muvofiq yoziladi.

16. Fuqarolarga dehqon xoʻjaligini (shaxsiy yordamchi xoʻjalikni) yuritish va yakka tartibda uy-joy qurish uchun qishloq xoʻjaligi va oʻrmon xoʻjaligi va boshqa tashkilotlarning yerlari berilgan yer uchastkalari ushbu tashkilotlarning yerlari tarkibidan chiqariladi va dehqon xoʻjaligini (shaxsiy yordamchi xoʻjalikni) yuritish va yakka tartibda uy-joy qurish uchun berilgan yerlar tarkibida aks ettiriladi.

17. Aholi punktlarining yerlari ushbu Nizomning 18-bandiga muvofiq yerlarning toifalariga taqsimlanadi.

Bunda tashkilotlarning aholi punktlarida joylashgan yer uchastkalari tegishli yer toifalari va kichik toifalari boʻyicha aks ettiriladi. Aholi punktlari yerlari tarkibida faqat uy-joy qurilishi yerlari aks ettiriladi. Umumiy yer fondining toifalar va turlarga taqsimlanishi toʻgʻrisidagi hisobotda qoʻshimcha axborot tariqasida aholi punktlari ekinzorlari maydonlarining soni, umumiy maydoni va tarkibi keltiriladi.

18. Yerlarning miqdori hisobi quyidagi toifalar va kichik toifalar boʻyicha yuritiladi:

1. Qishloq xoʻjaligiga moʻljallangan yerlar:

1.1. Qishloq xoʻjaligi kooperativlarining (shirkatlarning) yerlari;

1.2. Fermer xoʻjaliklarining yerlari;

1.3. Qishloq xoʻjaligi ilmiy-tadqiqot tashkilotlari va oʻquv-tajriba xoʻjaliklarining yerlari;

1.4. Yordamchi qishloq xoʻjaliklarining yerlari;

1.5. Boshqa qishloq xoʻjaligi tashkilotlarining yerlari;

1.6. Dehqon xoʻjaliklarining (shaxsiy yordamchi xoʻjaliklarning) yerlari;

1.7. Jamoa bogʻdorchiligi va uzumchiligini yurituvchi fuqarolarning yerlari;

1.8. Yakka tartibda bogʻdorchilik, sabzavotchilik va chorvachilikni yurituvchi fuqarolarning yerlari;

1.9. Yuridik va jismoniy shaxslarga berilmagan yerlar.

2. Aholi punktlarining (shaharlar, posyolkalarning va qishloq aholi punktlarining) yerlari:

2.1. Shaharlar va posyolkalarning yerlari;

2.2. Qishloq aholi punktlarining yerlari.

2.3. Uy-joy qurilishi yerlari:

2.3.1. Koʻp qavatli uylar bilan band boʻlgan yerlar;

2.3.2. Yakka tartibdagi uylar bilan band boʻlgan yerlar.

3. Sanoat, transport, aloqa, mudofaa yerlari va boshqa maqsadlarga moʻljallangan yerlar:

3.1. Sanoat yerlari;

3.2. Temir yoʻllar yerlari;

3.3. Avtomobil yoʻllari yerlari;

3.4. Quvur transporti yerlari;

3.5. Aloqa yerlari;

3.6. Mudofaa yerlari;

3.7. Boshqa maqsadlarga moʻljallangan yerlar.

4. Tabiatni muhofaza qilish, sogʻlomlashtirish, rekreatsiya yerlari va tarixiy-madaniy maqsadlarga moʻljallangan yerlar:

4.1. Tabiatni muhofaza qilish maqsadlariga moʻljallangan yerlar;

4.2. Sogʻlomlashtirish maqsadlariga moʻljallangan yerlar;

4.3. Rekreatsiya maqsadlariga moʻljallangan yerlar;

4.4. Tarixiy-madaniy maqsadlarga moʻljallangan yerlar.

5. Oʻrmon fondi yerlari:

5.1. Oʻrmon xoʻjaliklari yerlari;

5.2. Boshqa oʻrmon xoʻjaligi tashkilotlari yerlari.

6. Suv fondi yerlari.

7. Zaxira va umumiy foydalanishdagi yerlar

7.1. Zaxira yerlar;

7.2. Aholi punktlarining umumiy foydalanishdagi yerlari.

19. Yuridik va jismoniy shaxslarning har xil maqsadlarga moʻljallangan yer uchastkalari mavjud boʻlganda, ushbu yer uchastkalari toʻgʻrisidagi maʼlumotlar tegishli toifa va kichik toifalar boʻyicha keltiriladi.

Ekinzorlarining umumiy maydoni amaldagi holati boʻyicha keltiriladi, sugʻoriladigan yerlarning maydoni alohida satrlarda keltiriladi.

Agar yuridik va jismoniy shaxsning foydalanishida bir nechta yer uchastkasi mavjud boʻlsa, u holda maʼlumotlar ushbu yer uchastkalarining har biri boʻyicha keltiriladi.

20. Yer kadastri daftarini yuritishda har bir yer uchastkasiga qonun hujjatlarida belgilangan tartibda kadastr raqami beriladi.

21. Yerlarni hisobga olish asosiy va joriy turlarni oʻz ichiga oladi.

Yerlarni asosiy turda hisobga olishda yer kadastri daftariga yuridik va jismoniy shaxslarning joriy yilning 1-yanvaridagi holatiga koʻra barcha yerlari kiritiladi.

Ushbu daftarga vakolatli organlar tomonidan tugatilishi toʻgʻrisida qaror qabul qilingan yuridik shaxslar ham kiritiladi, agar ular keyingi yilning 1-yanvarigacha korxona va tashkilotlarning yagona davlat registridan chiqarilmagan boʻlsa.

Hisobot yilining 1-yanvarigacha boshqa yuridik shaxslarni qayta tashkil etish natijasida yangi tashkil etilgan yuridik shaxslar hisobga olishning asosiy turi tariqasida hisobga olinadi.

Fuqaroga yer uchastkasi berilgan, keyinchalik u ushbu yer uchastkasida qurilgan bino va inshootlar bilan birgalikda xususiy korxona yoki boshqa tashkiliy-huquqiy shakldagi korxona tashkil etgan hollarda ushbu yer uchastkasi yer kadastri daftarida tashkil etilgan yuridik shaxsga tegishli yer uchastkasi sifatida yoziladi.

Yerlarni joriy hisobga olishda yer kadastri daftarida faqat yangi tashkil etilgan yuridik va jismoniy shaxslar, shuningdek hisobot yilining 1-yanvaridan keyin nomida, yer uchastkasining umumiy maydoni va ekinzorlarida oʻzgarishlar yuz bergan yuridik va jismoniy shaxslar aks ettiriladi. Bunda maydonlar yuz bergan oʻzgartirishlar hisobga olingan holda ekinning barcha turlari boʻyicha keltiriladi.

22. Yerdan foydalanuvchilar va ekinzorlar tarkibidagi joriy oʻzgartirishlar yer kadastri daftariga muntazam ravishda ham yuridik va jismoniy shaxslarning maʼlumotlariga, ham “Yergeodezkadastr” davlat qoʻmitasining tegishli tuman (shahar) boʻlinmalari ixtiyorida boʻlgan hujjatlarga asosan kiritiladi.

Joriy oʻzgarishlar yerlarni hisobga olishni yuritishga masʼul boʻlgan shaxsning imzosi bilan, oʻzgartirishlar uchun asoslarni, oʻzining lavozimini, familiyasini va oʻzgartirish kiritilgan sanani koʻrsatib tasdiqlanadi.

Muhofaza zonalariga kiritilgan yer uchastkalari toʻgʻrisidagi maʼlumotlar, ularni belgilash toʻgʻrisida davlat organlarining qabul qilingan qarorlariga asosan kiritiladi.

Yerlarning miqdorini hisobga olish maʼlumotlari boʻyicha tuman (shahar), Qoraqalpogʻiston Respublikasi, viloyatlar va Toshkent shahri hamda umuman Oʻzbekiston Respublikasining ekinzorlari toifalari va turlari boʻyicha umumiy yer fondi va alohida sugʻoriladigan yerlar fondi toʻgʻrisida ushbu Nizomga 3-ilovaga muvofiq shaklga binoan hisobotlar tuziladi.

23. Yer kadastri daftari bilan bir vaqtning oʻzida tuman (shahar)ning yer kadastri navbatchi xaritasi belgilangan tartibda, elektron shaklida yuritiladi.

Yer kadastrining navbatchi xaritasiga barcha yer uchastkalarining chegaralari, ularning tarkibida yuz berayotgan oʻzgartirishlar muntazam ravishda kiritiladi va u yer kadastri boʻyicha geoaxborot tizimini tashkil etish uchun asos boʻlib xizmat qiladi.

IV. Yerlarning sifati hisobga olinishini yuritish tartibi

24. Yerlarning sifatini hisobga olish qishloq xoʻjaligiga moʻljallangan sugʻoriladigan va lalmi yerlar tuproqlarining unumdorligi (bonitet ballarida), ularning tavsifi toʻgʻrisida har bir yerdan foydalanuvchi boʻyicha aniq maʼlumotlar olish maqsadida ushbu Nizomga 4-ilovaga muvofiq shakl boʻyicha yuritiladi.

Yerlarning sifatini hisobga olish shakli alohida mazkur Nizomning 18-bandida belgilangan yerlarni toifalar va kichik toifalarga boʻlgan holda sugʻoriladigan va lalmi yerlarga alohida tuziladi.

25. Sugʻoriladigan va lalmi yerlarning sifatini hisobga olish shaklida tuproqlarning bonitet ballari tuproq bonitirovkasi natijalari va yerlarning tavsifi boʻyicha sinflarga boʻlinib, yerlarning agronomik, ekologik va texnologik xususiyatlarining tavsifi boʻyicha aks ettiriladi.

26. Yerlarning sifatini hisobga olish asosiy va joriy turlarni oʻz ichiga oladi.

Yerlarning sifatini hisobga olishning asosiy turi sifatida yer kadastri daftariga joriy yilning 1-yanvaridagi mavjud maʼlumotlar kiritiladi.

Tuproqlarning yangi bonitirovkasi amalga oshirilganda ushbu maʼlumotlar hisobga olishning asosiy turi sifatida kiritiladi.

Yerlarning sifatini joriy hisobga olishda yer kadastri daftarida faqat yangi tashkil etilgan yuridik v jismoniy shaxslar hamda hisobot yilining yanvaridan keyin yerlarning tarkibi, maydoni va sifatida oʻzgarish yuz bergan yuridik va jismoniy shaxslar aks ettiriladi.

27. Yerlarning sifatida yuz bergan joriy oʻzgarishlar yer kadastri daftariga muntazam ravishda ham yuridik va jismoniy shaxslarning maʼlumotlariga, ham “Yergeodezkadastr” davlat qoʻmitasining tegishli tuman (shahar) boʻlinmalari ixtiyorida boʻlgan hujjatlarga asosan kiritiladi.

Joriy oʻzgartirishlar yerlarni hisobga olishni yuritishga boʻlgan shaxsning imzosi bilan, oʻzgartirishlar uchun asoslarni, oʻzining lavozimini, familiyasini va oʻzgartirish kiritilgan sanani koʻrsatib tasdiqlanadi.

V. Yerlarning qiymatini baholashni hisobga olish tartibi

28. Yer kadastri daftarida yerlarning qiymatini baholash sifatida qishloq xoʻjaligi tovar ishlab chiqaruvchilarining qishloq xoʻjaligi yerlarining qonun hujjatlarida belgilangan tartibda aniqlangan normativ qiymati toʻgʻrisidagi maʼlumotlar keltiriladi.

29. Qishloq xoʻjaligi ekinzorlarining meʼyoriy qiymatini hisobga olish har bir yerdan foydalanuvchi boʻyicha ushbu Nizomga 5-ilovaga muvofiq shaklga binoan yuritiladi.

30. Qishloq xoʻjaligi ekinzorlarining normativ qiymatini hisobga olish ushbu Nizomning 18-bandida nazarda tutilgan yerlar toifalari va kichik toifalariga boʻlingan holda yuritiladi.

Hisobga olish shaklida qishloq xoʻjaligi ekinzorlarining maydonlari turlari boʻyicha 1 gektar erning oʻrtacha normativ qiymati va ekinzorlarining umumiy normativ qiymati aks ettiriladi, xoʻjalikning qishloq xoʻjaligi ekinzorlari boʻyicha yakun chiqariladi.

31. Qishloq xoʻjaligi ekinzorlarining normativ qiymatini hisobga olish asosiy va joriy turlarni oʻz ichiga oladi.

Hisobga olishning asosiy turi sifatida yer kadastri daftariga joriy yilning 1-yanvaridagi mavjud qishloq xoʻjaligi ekinzorlarining normativ qiymati toʻgʻrisidagi maʼlumotlar kiritiladi.

Qishloq xoʻjaligi ekinzorlarining normativ qiymati yangidan aniqlangan holatlarda, ushbu maʼlumotlar hisobga olishning asosiy turi sifatida kiritiladi.

Ekinzorlarning normativ qiymatini hisobga olishning joriy turida yer kadastri daftarida faqat yangi tashkil etilgan yuridik va jismoniy shaxslar hamda hisobot yilining 1-yanvaridan keyin qishloq xoʻjaligi ekinzorlarining tarkibi va maydoni oʻzgargan yuridik va jismoniy shaxslar aks ettiriladi. Bunda normativ qiymat qishloq xoʻjaligi ekinzorlari har bir turining oʻrtacha normativ qiymatidan kelib chiqib ularning normativ qiymatini qayta hisoblab chiqqan holda qishloq xoʻjaligi ekinzorlarining barcha turlari boʻyicha keltiriladi.

32. Qishloq xoʻjaligi ekinzorining normativ qiymati toʻgʻrisidagi maʼlumotlarning joriy oʻzgartirishlari hisobga olish shakliga muntazam ravishda ham yuridik va jismoniy shaxslarning maʼlumotlariga, ham “Yergeodezkadastr” davlat qoʻmitasining tegishli tuman (shahar) boʻlinmalari ixtiyorida boʻlgan hujjatlarga asosan kiritiladi.

Joriy oʻzgartirishlar yerlarni hisobga olishni yuritishga masʼul boʻlgan shaxsning imzosi bilan, oʻzgartirishlar uchun asoslarni, oʻzining lavozimini, familiyasini va oʻzgartirish kiritilgan sanani koʻrsatib tasdiqlanadi.

VI. Yakunlovchi qoida

33. “Yergeodezkadastr” davlat qoʻmitasining tegishli tuman (shahar) boʻlinmalari yer kadastri daftarining aniq va muntazam yuritilishi uchun qonun hujjatlariga muvofiq javob beradilar.

Tuman (shahar) yer kadastri daftarini yuritish tartibi toʻgʻrisidagi nizomga 1-ILOVA

Yer uchastkalarining egalari, foydalanuvchilari, ijarachilari va mulkdorlari toʻgʻrisida umumiy

MAʼLUMOTLAR

Izohlar:

1. Shakl ushbu Nizomning 18-bandiga muvofiq yerlarning toifalari va kichik toifalari boʻyicha yer uchastkalarining egalari, foydalanuvchilari, ijarachilari va mulkdorlari boʻyicha toʻldiriladi.

2. STIR (soliq toʻlovchining identifikatsiya raqami) tuman (shahar) davlat soliq xizmati organlarining maʼlumotlari boʻyicha qabul qilinadi.

Tuman (shahar) yer kadastri daftarini yuritish tartibi toʻgʻrisidagi nizomga 2-ILOVA

_____________________ tumani (shahri) yer fondining yer uchastkalari egalari, foydalanuvchilari, ijarachilari va mulkdorlariga

TAQSIMLANIShI

Izoh: shakl ushbu Nizomning 18-bandiga muvofiq yerlarning toifalari va kichik toifalari boʻyicha yer uchastkalarining egalari, foydalanuvchilari, ijarachilari va mulkdorlari boʻyicha toʻldiriladi.

Tuman (shahar) yer kadastri daftarini yuritish tartibi toʻgʻrisidagi nizomga 3-ILOVA

____________________ tumanining (shahrining) umumiy yer fondini toifalar va turlar boʻyicha taqsimlash toʻgʻrisida

HISOBOT

Tuman (shahar) yer kadastri daftarini yuritish tartibi toʻgʻrisidagi nizomga 4-ILOVA

Sugʻoriladigan va lalmi yerlarning sifati

Izoh: shakl ushbu Nizomning 18-bandiga muvofiq yerlarning toifalari va kichik toifalari boʻyicha yer uchastkalarining egalari, foydalanuvchilari, ijarachilari va mulkdorlari boʻyicha toʻldiriladi.

Tuman (shahar) yer kadastri daftarini yuritish tartibi toʻgʻrisidagi nizomga 5-ILOVA

Qishloq xoʻjaligi ekinzorlarining normativ qiymati

Izoh: shakl ushbu Nizomning 18-bandiga muvofiq yerlarning toifalari va kichik toifalari boʻyicha yer uchastkalarining egalari, foydalanuvchilari, ijarachilari va mulkdorlari boʻyicha toʻldiriladi.