Oʻzbekiston Respublikasining xalqaro Fuqaro aviatsiyasi tashkilotining ochiq kalitlar direktoriyasiga qoʻshilishiga doir tashkiliy chora-tadbirlar toʻgʻrisida (4-son)

07.01.2014

Oʻzbekiston Respublikasi Vazirlar Mahkamasining

qarori

Xorijiy mamlakatlar vakolatli organlarining Oʻzbekiston Respublikasining biometrik hujjatlariga boʻlgan ishonch darajasini oshirish, ushbu hujjatlar egalarining xalqaro chegara nazorati punktlarida pasport nazoratidan oʻtish tartib-taomillarini soddalashtirish hamda milliy va xorijiy biometrik hujjatlarning haqiqiyligini tasdiqlovchi elektron sertifikatlarning tezkor almashinuvini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Tashqi ishlar vazirligi, Ichki ishlar vazirligi, Milliy xavfsizlik xizmati, Milliy xavfsizlik xizmatining Davlat chegaralarini himoya qilish qoʻmitasi, Parvozlar xavfsizligini nazorat qilish davlat inspeksiyasi, Aloqa, axborotlashtirish va telekommunikatsiya texnologiyalari davlat qoʻmitasi va Oʻzbekiston Respublikasi Vazirlar Mahkamasi huzuridagi Davlat personallashtirish markazining (keyingi oʻrinlarda DPM deb ataladi) Oʻzbekiston Respublikasi Xalqaro fuqaro aviatsiyasi tashkiloti Ochiq kalitlar direktoriyasiga (keyingi oʻrinlarda IKAO DOK deb ataladi) qoʻshilishi toʻgʻrisidagi taklifiga rozilik berilsin.

2. Oʻzbekiston Respublikasining IKAO DOK bilan hamkorlik qilish boʻyicha vakolatli organi etib DPM belgilansin.

3. Oʻzbekiston Respublikasi Vazirlar Mahkamasi huzuridagi DPM tomonidan quyidagilar taʼminlansin:

Oʻzbekiston Respublikasi IKAO DOKga qoʻshilishi boʻyicha zarur tartib-taomillarni amalga oshirish;

Oʻzbekiston Respublikasining biometrik hujjatlari sertifikatlarini IKAO DOKga yuborish;

IKAO DOKdan xorijiy mamlakatlarning biometrik hujjatlari sertifikatlarini olish va keyinchalik ularni Oʻzbekiston Respublikasining tegishli vakolatli organlariga yuborish.

4. Oʻzbekiston Respublikasi Moliya vazirligi 2014-yildan boshlab, belgilangan tartibda DPMga tasdiqlangan budjet mablagʻlari doirasida IKAO DOK budjetiga Oʻzbekiston Respublikasining roʻyxatdan oʻtkazish va har yilgi ulush badallarini toʻlash uchun mablagʻlar ajratilishini nazarda tutsin.

5. Oʻzbekiston Respublikasi Aloqa, axborotlashtirish va telekommunikatsiya texnologiyalari davlat qoʻmitasi DPMning IKAO DOK axborot kompleksi bilan oʻzaro hamkorligini tashkil etish uchun belgilangan tartibda himoyalangan aloqa kanali taqdim etilishini taʼminlasin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2014-yil 7-yanvar,

4-son