Jaloliddin Manguberdi tavalludining 800 yilligini nishonlash toʻgʻrisida (408-son)

24.09.1998

Oʻzbekiston Respublikasi Vazirlar Mahkamasining

qarori

Vatan ozodligi yoʻlida jonini fido qilgan dovyurak kurashchi, milliy qahramon, jahon xalqlari tarixida oʻchmas iz qoldirgan Jaloliddin Manguberdi tavalludiga 800 yil toʻlishi munosabati bilan uning xotirasini abadiylashtirish va tarixiy adolatni qaror toptirish maqsadida Vazirlar Mahkamasi qaror qiladi:

1. Oʻzbekiston Respublikasi Fanlar akademiyasi, Xorazm viloyati hokimligi, Madaniyat ishlari vazirligining 1999-yilda Jaloliddin Manguberdi tavalludining 800 yilligini keng nishonlash haqidagi takliflari maʼqullansin.

2. Jaloliddin Manguberdi tavalludining 800 yilligiga tayyorgarlik koʻrish va uni oʻtkazish tashkiliy qoʻmitasi tarkibi ilovaga muvofiq tasdiqlansin.

Tashkiliy qoʻmita bir oy muddatda mazkur sanaga tayyorgarlik koʻrish va uni oʻtkazish tadbirlarini ishlab chiqsin hamda uni bajarishga kirishsin.

3. Oʻzbekiston Respublikasi Fanlar akademiyasi:

tegishli vazirliklar, idoralar, hokimliklar, jamoat tashkilotlari bilan birgalikda 1999-yilda “Jaloliddin Manguberdining dunyo tarixida tutgan oʻrni” mavzuida xalqaro konferensiya oʻtkazsin;

ilmiy-ijodiy uyushmalar, jamoat tashkilotlari va “Oltin meros” jamgʻarmasi bilan birgalikda bir oy muddatda Jaloliddin Manguberdining Markaziy Osiyo xalqlari tarixida tutgan oʻrnini xolis oʻrganish va targʻib qilish boʻyicha dastur ishlab chiqsin va amalga oshirsin;

xorazmshohlar zamonida yozilgan qoʻlyozma asarlarning chet ellarda saqlanayotgan nusxalari roʻyxatini tuzsin va ularni (mikrofilmlarni) olib kelish uchun xorijga mutaxassislarning ilmiy safarini tashkil qilsin;

Xorazm viloyati hokimligi bilan birgalikda xorazmshohlar davri tarixi, ilm-fani, madaniyati va sanʼatiga oid adabiyotlarni rasmiy tantanalargacha chop etishni rejalashtirsin.

4. Xorazm viloyati hokimligi Oʻzbekiston Respublikasi Madaniyat ishlari vazirligi bilan birgalikda qadimiy meʼmorchilik anʼanalari bilan uygʻunlashgan Jaloliddin Manguberdi yodgorlik majmuasini Urganch shahrida 1999-yilda barpo etish masalasini hal etsin.

Oʻzbekiston Badiiy akademiyasi bir oy muddatda Jaloliddin Manguberdi qiyofasini yaratish boʻyicha respublika ochiq tanlovini oʻtkazsin.

5. Oʻzbekiston teleradiokompaniyasi Jaloliddin Manguberdi yashagan davr va uning Vatan ozodligi yoʻlidagi jasoratli hayotini aks ettiruvchi turkum koʻrsatuv, eshittirishlar dasturini tayyorlasin va amalga oshirsin.

Xalq qahramonining hayoti va oʻlmas jasoratlari matbuot vositalarida keng yoritilsin.

6. “Oʻzbekkino” kompaniyasi Jaloliddin Manguberdi hayotiga bagʻishlangan badiiy film yaratishni rejalashtirsin.

7. Oʻzbekiston Respublikasi Markaziy Banki va Moliya vazirligi 1999-yilda Jaloliddin Manguberdi tavalludining 800 yilligi munosabati bilan esdalik yubiley tangasini muomalaga chiqarsin.

8. Ushbu qarorda koʻrsatilgan va tashkiliy qoʻmita tasdiqlaydigan tadbirlarni amalga oshirish xarajatlari teng ulushlarda respublika budjeti va mahalliy budjetlar hisobidan qoplanishi belgilab qoʻyilsin.

Bu ishga homiylar, shu jumladan xorijiy homiylarning oʻz ulushlarini qoʻshish haqidagi taklif-istaklari qoʻllab-quvvatlansin.

9. Ushbu qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari I.H. Joʻrabekov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1998-yil 24-sentabr,

408-son

Vazirlar Mahkamasining 1998-yil 23-sentabrdagi 408-son qaroriga ILOVA

Jaloliddin Manguberdi tavalludining 800 yilligini nishonlashga tayyorgarlik koʻrish va uni oʻtkazish boʻyicha respublika tashkiliy qoʻmitasi

TARKIBI