“Oʻzbekiston havo yoʻllari” MAK Toshkent aeroportining “Toshkent-2” aerovokzali toʻgʻrisida (479-son)

26.10.1999

Oʻzbekiston Respublikasi Vazirlar Mahkamasining

qarori

“A” harfi bilan belgilangan parvozlarga hamda yuqori darajadagi rasmiy davlat, hukumat, parlament va boshqa xorijiy delegatsiyalarga “Toshkent-2” aerovokzalida koʻrsatiladigan xizmatlarni takomillashtirish maqsadida Vazirlar Mahkamasi qaror qiladi:

1. “Toshkent-2” aerovokzal terminalida quyidagilar xizmat koʻrsatilishi belgilansin:

Oʻzbekiston Respublikasi Prezidenti Administratsiyasining Moliya-xoʻjalik departamenti talabnomalari asosida Oʻzbekiston Respublikasi rahbarlarining “A” toifali parvozlari;

Bosh vazir tomonidan tasdiqlangan hamda Tashqi ishlar vazirligi va Davlat xavfsizlik xizmati bilan kelishilgan dasturlarga muvofiq, Oʻzbekiston Respublikasi Prezidentining taklifiga binoan mamlakatga tashrif buyuradigan quyidagilar: davlat va hukumat rahbarlari, parlamentlar va ularning palatalari rahbarlari, tashqi ishlar vazirlari boshchiligidagi xorijiy delegatsiyalar, ayrim xalqaro tashkilotlar rahbarlari, xorijiy davlatlar rahbarlarining maxsus vakillari, taniqli xorijiy davlat, siyosiy va jamoat arboblari;

Boshqa toifalardagi chet el fuqarolarining “Toshkent-2” aerovokzalida xizmat koʻrsatishdan foydalanishlari faqat Oʻzbekiston Respublikasi Tashqi ishlar vazirligi va Prezident Administratsiyasi bilan kelishilgan holda amalga oshirilishi mumkin.

2. Liter parvozlarning xavfsizligini taʼminlash, yoʻlovchilarga xizmat koʻrsatish, shuningdek havo kemalarini texnik jihatdan tayyorlash uchun “Oʻzbekiston havo yoʻllari” Milliy aviakompaniyasi Bosh direktori buyrugʻi bilan belgilangan mutaxassislar guruhi jalb etilsin.

3. “Toshkent-2” aerovokzali orqali oʻtuvchi yoʻlovchilarga xizmat koʻrsatish madaniyatini oshirish va ular uchun zarur qulayliklar yaratish maqsadida, “Oʻzbekiston havo yoʻllari” Milliy aviakompaniyasi Tashqi ishlar vazirligi, Davlat bojxona qoʻmitasi, Davlat chegaralarini qoʻriqlash qoʻmitasi, Milliy xavfsizlik xizmati va Prezident xavfsizlik xizmati bilan hamkorlikda maxsus parvozlarga xizmat koʻrsatish texnologiyasini ishlab chiqishi hamda jalb etilgan idoralar mutaxassislarini zarur shart-sharoitlar bilan taʼminlashi lozim.

4. “Oʻzbekiston havo yoʻllari” MAK Oʻzbekiston Respublikasi Milliy xavfsizlik xizmati bilan hamkorlikda “Toshkent-2” aerovokzali terminalining ishonchli himoyasi va xavfsizligini taʼminlash boʻyicha rejim choralarini qatʼiy amalga oshirishi lozim.

5. Ushbu qarorning bajarilishini nazorat qilish Oʻzbekiston Respublikasi Bosh vaziri U.T. Sultonov hamda Oʻzbekiston Respublikasi Prezidenti Devonining Ishlar boshqaruvchisi Z.X. Haydarov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1999-yil 26-oktabr,

479-son