Oʻzbekiston Respublikasining Samarqand, Buxoro va Urganch shaharlaridagi uchta aeroportni modernizatsiya qilish uchun qoʻshimcha kreditga xizmat koʻrsatish chora-tadbirlari toʻgʻrisida (394-son)

17.08.1999

Oʻzbekiston Respublikasi Vazirlar Mahkamasining

qarori

Samarqand, Buxoro va Urganch shaharlaridagi aeroportlarni modernizatsiya qilish loyihasini amalga oshirish uchun Xorijiy iqtisodiy hamkorlik jamgʻarmasi (OECF) tomonidan taqdim etiladigan 2,871 milliard yen miqdoridagi qoʻshimcha imtiyozli kreditdan foydalanish maqsadida Vazirlar Mahkamasi qaror qiladi:

1. Oʻzbekiston Respublikasi Bosh vazirining oʻrinbosari L.A. Axmedovga imtiyozli kredit olish boʻyicha Rozilik xatini imzolash vakolati berilsin.

2. Moliya vazirligi uchta aeroportni rekonstruksiya qilish loyihasini amalga oshirish uchun OECF qoʻshimcha imtiyozli krediti boʻyicha Oʻzbekiston Respublikasi Hukumati nomidan qarz oluvchi etib belgilansin.

3. Moliya vaziriga imtiyozli kredit olish boʻyicha Kredit shartnomasini Oʻzbekiston Respublikasi Hukumati nomidan imzolash vakolati berilsin.

4. Oʻzbekiston Respublikasi Moliya vazirligi va Adliya vazirligi Kredit bitimini imzolash va unga xizmat koʻrsatish bilan bogʻliq barcha zarur hujjatlarni rasmiylashtirsin.

5. Quyidagilar:

Moliya vazirligiga — Oʻzbekiston Respublikasi Hukumati nomidan Kredit bitimini bajarish uchun zarur boʻlgan hujjatlarni tayyorlash, imzolash va ijro etish vazifasi;

Oʻzbekiston Respublikasi Tashqi iqtisodiy faoliyat Milliy bankiga — kreditga xizmat koʻrsatish boʻyicha moliyaviy agent vazifasi;

“Oʻzbekiston havo yoʻllari” milliy aviakompaniyasiga — loyihani amalga oshirish boʻyicha ijrochi agentlik vazifasini bajarish zimmasiga yuklansin.

6. Oʻzbekiston Respublikasi Moliya vazirligi, Tashqi iqtisodiy aloqalar vazirligi, “Oʻzbekiston havo yoʻllari” milliy aviakompaniyasi va Tashqi iqtisodiy faoliyat milliy banki:

Yaponiya tomoni bilan kelishilgan muddatlarda OESFning qoʻshimcha imtiyozli kreditini olish uchun nazarda tutilgan barcha tartib-qoidalarni bajarishni;

Rozilik notasi va Kredit bitimida koʻzda tutilgan qoida va tartibotlarni soʻzsiz amalga oshirishni;

Loyihani amalga oshirish jarayonidagi ishlar borishi haqidagi zarur xabar va maʼlumotlar belgilangan tartibda Yaponiya Hukumati, OESF va uning huquqiy vorislariga taqdim etilishini taʼminlasin.

7. Kreditga xizmat koʻrsatish va uni qaytarish bilan bogʻliq xarajatlar ilovadagi jadvalga muvofiq “Oʻzbekiston havo yoʻllari” MAK mablagʻlari hisobidan amalga oshirilishi belgilab qoʻyilsin.

8. Quyidagilar Oʻzbekiston Respublikasi budjeti daromadiga undiriladigan barcha soliqlar, bojxona bojlari va yigʻimlardan ozod etilsin:

Kredit bitimi, shuningdek, unga hisoblangan foizlarning barcha toʻlovlari boʻyicha Yaponiya tashqi iqtisodiy hamkorlik jamgʻarmasi (OECF) va uning huquqiy vorislari;

kredit mablagʻlari hisobiga tovarlar yetkazib berish yoki xizmatlar koʻrsatishdan oladigan daromadlariga nisbatan pudratchi yoki maslahatchi sifatida faoliyat yurituvchi xorijiy kompaniyalar;

loyihani amalga oshirish uchun zarur boʻlgan oʻz materiallari yoki asbob-uskunalarini import va reeksport qilishda kontrakt tuzuvchi yoki maslahatchi sifatida ish yurituvchi xorijiy kompaniyalar;

kontrakt tuzuvchi sifatida ish yurituvchi kompaniyalardan olinadigan daromadlar boʻyicha loyihani amalga oshirishda band boʻlgan xorijiy xizmatchilar;

kredit mablagʻlari hisobiga Oʻzbekiston Respublikasiga olib kelinadigan asbob-uskunalar, mahsulotlar va xizmatlar.

9. Oʻzbekiston Respublikasi Ichki ishlar vazirligi “Oʻzbekiston havo yoʻllari” milliy aviakompaniyasining soʻrovnomalari asosida mazkur loyiha ishtirokchilariga vaqtinchalik propiska berilishini, shuningdek, koʻp martalik vizalar va yashash joyidagi vaqtinchalik propiska muddatini uzaytirishni taʼminlasin hamda ularni davlat bojlari toʻlashdan ozod etsin.

10. Oʻzbekiston Respublikasi Tashqi ishlar vazirligi “Oʻzbekiston havo yoʻllari” milliy aviakompaniyasining soʻrovnomalari asosida mazkur loyiha ishtirokchilariga konsullik va boshqa yigʻimlar olinmagan holda koʻp martalik vizalar berilishini taʼminlasin.

11. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari L.A. Axmetov zimmasiga yuklatilsin.

Vazirlar Mahkamasining Raisi I. KARIMOV

Toshkent sh.,

1999-yil 17-avgust,

394-son

Vazirlar Mahkamasining 1999-yil 17-avgustdagi 394-son qaroriga ILOVA

Uchta aeroportni (II) (Samarqand, Buxoro, Urganch) modernizatsiya qilish loyihasini amalga oshirish uchun berilgan Xorijiy iqtisodiy hamkorlik jamgʻarmasi (XIHJ) kreditini qaytarish

JADVALI