Oʻzbekiston davlat jahon tillari universiteti huzurida Chet tillarini oʻqitishning innovatsiyaviy metodikalarini rivojlantirish respublika ilmiy-amaliy markazi faoliyatini tashkil etish chora-tadbirlari toʻgʻrisida (331-son)

17.12.2013

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Oʻzbekiston davlat jahon tillari universitetining faoliyatini takomillashtirish chora-tadbirlari toʻgʻrisida” 2013-yil 23-maydagi PQ-1971-son qaroriga muvofiq, shuningdek Oʻzbekiston davlat jahon tillari universiteti huzurida Chet tillarini oʻqitishning innovatsiyaviy metodikalarini rivojlantirish respublika ilmiy-amaliy markazi faoliyatini samarali tashkil etish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Oʻzbekiston davlat jahon tillari universitetining faoliyatini takomillashtirish chora-tadbirlari toʻgʻrisida” 2013-yil 23-maydagi PQ-1971-son qaroriga muvofiq Oʻzbekiston davlat jahon tillari universiteti huzurida davlat taʼlim muassasasi shaklida Chet tillarini oʻqitishning innovatsiyaviy metodikalarini rivojlantirish respublika ilmiy-amaliy markazi (keyingi oʻrinlarda Markaz deb ataladi) tashkil etilganligi maʼlumot uchun qabul qilinsin.

2. Quyidagilar Markazning asosiy vazifalari etib belgilansin:

uzluksiz taʼlimning barcha turlarida chet tillarni oʻqitishning innovatsiyaviy metodikalarini ishlab chiqish va joriy etishga yoʻnaltirilgan chuqur ilmiy izlanishlar olib borish, chet tillarni oʻqitish sohasida normativ va amal qilinuvchi hujjatlarni takomillashtirish;

chet tillar boʻyicha oʻqituvchilar va mutaxassislar tayyorlovchi oliy taʼlim muassasalari faoliyatiga, boshqa manfaatdor muassasalarga tillarni oʻqitishning zamonaviy shakllari va usullarini, chet tillarni oʻrganishning ilgʻor pedagogika texnologiyalarini amalda joriy etish masalalari boʻyicha metodik rahbarlikni taʼminlash;

jumladan oʻqitishning masofadan amalga oshiriladigan usullaridan foydalangan holda chet tillari boʻyicha zamonaviy saviyali pedagog kadrlar, metodik xodimlar va tarjimonlar tayyorlash hamda ularning malakasini oshirish;

chet tillarga oʻqitishning xalqaro standartlarini (“Xorijiy tillarni egallashning umumyevropa kompetensiyasi” tizimi: oʻrganish, oʻqitish, baholash” (CEFR)) taʼlim jarayoniga joriy etish boʻyicha monitoring olib borish, ushbu sohadagi eng yaxshi tajribani umumlashtirish va uning asosida manfaatdor taʼlim muassasalari uchun tegishli tavsiyalar va qoʻllanmalar ishlab chiqish;

Bilimlar darajasini baholash va sertifikatsiyalashning milliy tizimini shakllantirish va joriy etishda qatnashish, xalqaro va milliy standartlarga muvofiq oʻquvchilar, pedagog kadrlar va boshqa manfaatdor shaxslarning chet tilini bilishi darajasini test sinovidan oʻtkazish va sertifikatsiyalash uchun shart-sharoitlarni taʼminlash;

chet tillarni oʻrganishning masofadan amalga oshiriladigan shakllarini tashkil etish bilan chet tillarni oʻqitishning interaktiv vositalarini ishlab chiqish va joriy etish hamda turli mediataʼlim mahsulotlarini ishlab chiqish va ularni aholiga sotish, aholining keng qatlamlari oʻrtasida chet tillarni oʻrganishni ommaviylashtirishga yoʻnaltirilgan maxsus interaktiv veb-loyihalar yaratish;

mamlakatda uzluksiz taʼlim tizimi uchun ishlab chiqilayotgan chet tillar boʻyicha yangi avlod oʻquv rejalari va dasturlari, darsliklar va oʻquv-metodik majmualar, chet tili oʻqituvchilari uchun oʻquv qoʻllanmalarining, zaruriyat boʻlganda, xalqaro maslahatchilar ishtirokida yetakchi oʻqituvchilar va muallimlar oʻrtasida eksperiment tartibida sinovdan oʻtkazilishini tashkil etish, shuningdek boshqa mualliflar jamoalari va taʼlimning tegishli turi mutaxassislari bilan birgalikda ularni ishlab chiqishda qatnashish.

3. Oʻzbekiston Respublikasi Oliy va oʻrta maxsus taʼlim vazirligi Oʻzbekiston davlat jahon tillari universiteti bilan birgalikda 2014-yil 1-yanvargacha:

Markazni asosan xorijiy taʼlim va ilmiy muassasalarda maʼlumot olgan hamda kadrlar tayyorlash va ularning malakasini oshirish sohasida katta ish tajribasiga ega boʻlgan yuqori malakali ilmiy-pedagog kadrlar bilan butlashni, darsliklar va oʻqitishning multimedia vositalari ishlab chiqilishini taʼminlasin;

Markazga yuklangan vazifalardan kelib chiqqan holda uning faoliyatini rivojlantirishga yoʻnaltirilgan kompleks chora-tadbirlarni tasdiqlasin;

Tashqi ishlar vazirligi va xorijiy tashkilotlar bilan birgalikda chet tillarni oʻqitish sohasida Markaz faoliyati doirasida hamkorlik va tajriba almashish borasida xalqaro ekspertlar va maslahatchilar jalb etilishi masalasini ishlab chiqsin;

Markazni Oliy va oʻrta maxsus taʼlim vazirligining Oliy taʼlim muassasalarini rivojlantirish jamgʻarmasi mablagʻlari hisobiga zamonaviy kompyuterlar va multimedia asbob-uskunalari, mebel va inventarlar, shuningdek oʻqitishning boshqa vositalari, shu jumladan oʻquv-metodik adabiyotlar bilan taʼminlash chora-tadbirlarini koʻrsin.

4. Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi Markazni va uning mutaxassislarini chet tillar boʻyicha ishlab chiqilayotgan darsliklarni, eng avvalo, umumtaʼlim maktablarining 1 — 4-sinflari uchun darsliklarni yaratish, ekspertizadan va sinovdan oʻtkazishga jalb etsin.

5. Belgilansinki, Markaz oliy taʼlim muassasalarining, eng avvalo, ixtisosli oliy taʼlim muassasalarining, xalq taʼlimi va oʻrta maxsus, kasb-hunar taʼlimi tizimi boshqaruvining hududiy organlari hamda pedagog kadrlar malakasini oshirish muassasalarining chet tillar oʻqituvchilari va metodistlarini qayta tayyorlash va ularning malakasini oshirishning tarmoq markazi hisoblanadi.

Oʻzbekiston Respublikasi Oliy va oʻrta maxsus taʼlim vazirligi, Oʻrta maxsus, kasb-hunar taʼlimi markazi hamda Xalq taʼlimi vazirligi malaka oshirish tartibini, shuningdek 2014 — 2016-yillar davrida koʻrsatib oʻtilgan xodimlarning malakasini oshirish jadvalini ikki oy muddatda tasdiqlasinlar.

6. Quyidagilar Markaz faoliyatini moliyalashtirishning asosiy manbalari etib belgilansin:

Markazning joriy taʼminoti, unga yuklangan vazifalar va funksiyalarni bajarishga doir tadbirlarni amalga oshirish, Markazning moddiy-texnika bazasini mustahkamlash uchun ajratiladigan Davlat budjeti mablagʻlari;

Oliy va oʻrta maxsus taʼlim vazirligi hamda Oʻzbekiston Respublikasi Innovatsion rivojlanish vazirligi tomonidan oʻtkaziladigan tanlovlar natijalari boʻyicha Markazga ajratiladigan grant mablagʻlari;

xalqaro tashkilotlarning xayriya ehsonlari, grantlari;

xoʻjalik faoliyatidan olingan mablagʻlar, shuningdek qonun hujjatlarida taqiqlanmagan boshqa manbalardan olingan mablagʻlar.

7. Oʻzbekiston Respublikasi Oliy va oʻrta maxsus taʼlim vazirligi bir oy muddatda, Mehnat va aholini ijtimoiy muhofaza qilish vazirligi hamda Moliya vazirligi bilan kelishgan holda, Markaz xodimlari mehnatiga haq toʻlash miqdorlari va shartlarini tasdiqlasin, Markazning ilmiy va rahbar xodimlari lavozim maoshlarini budjet mablagʻlari hisobiga fundamental, amaliy tadqiqotlar va innovatsion ishlarning davlat ilmiy-texnik dasturlarini amalga oshirishda qatnashuvchi ilmiy-tadqiqot muassasalarining tegishli lavozimlari bazaviy lavozim maoshlari miqdorlariga tenglashtirishni nazarda tutsin.

8. Oʻzbekiston Respublikasi Oliy va oʻrta maxsus taʼlim vazirligi, Oʻzbekiston davlat jahon tillari universiteti:

bir oy muddatda ushbu qaror qabul qilinishi munosabati bilan Markazning ustaviga oʻzgartirishlar kiritilishini taʼminlasinlar;

Markazni Toshkent shahar, Uchtepa tumani, Kichik halqa yoʻli koʻchasi, G-9a, 21-uy manzili boʻyicha nul stavkali ijara toʻlovi bilan Oʻzbekiston davlat jahon tillari universitetining binosiga joylashtirsinlar.

9. Respublikaning oliy taʼlim muassasalariga tillarni oʻqitishning zamonaviy shakllari va usullarini, chet tillarni oʻrganishning ilgʻor pedagogika texnologiyalarini amalda joriy etish uchun Markazning mutaxassislari va ekspertlarini mehnatga soatbay haq toʻlash shartlari bilan jalb etish tavsiya qilinsin.

10. Oʻzbekiston Respublikasi Moliya vazirligi:

Markazning taʼminotiga zarur budjetdan ajratiladigan mablagʻlarni 2014-yildan boshlab “Taʼlim” sohasiga ajratiladigan mablagʻlar doirasida Oʻzbekiston Respublikasi Davlat budjeti xarajatlari parametrlarida nazarda tutsin.

Markazga bitta xizmat yengil avtomobilini saqlash uchun limit ajratsin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2013-yil 17-dekabr,

331-son