2000-yil hosili uchun boshoqli don ekinlarini navlar boʻyicha joylashtirish va kuzgi ekishni oʻtkazishning tashkiliy chora-tadbirlari, don yetishtirish va davlat resurslariga xarid qilish hajmlari toʻgʻrisida (391-son)
17.08.1999
Oʻzbekiston Respublikasi Vazirlar Mahkamasining
qarori
[Koʻchirma]
Respublika mintaqalarining tuproq-iqlim sharoitlarini hisobga olgan holda yuqori texnologik xossalarga ega boʻlgan boshoqli don ekinlarining serhosil va istiqbolli navlarini oqilona joylashtirish yuzasidan amaliy chora-tadbirlar koʻrish, buning uchun zarur miqdorda urugʻlik gʻamlash, shuningdek 2000-yil hosili uchun boshoqli don ekinlari ekishni muvaffaqiyatli oʻtkazish maqsadida Vazirlar Mahkamasi qaror qiladi:
1. Boshoqli don ekinlarining non tayyorlash jihatidan yuqori sifatlarga ega boʻlgan yangi serhosil navlari seleksiyasi, urugʻchiligi, navini yangilash, joriy etish hamda ularni mamlakatning turli tuproq-iqlim sharoitlarida maqbul ravishda joylashtirish sohasidagi ishlarni har tomonlama takomillashtirish va jadallashtirish ustuvor davlat vazifasi hisoblansin.
Viloyatlar, tumanlar va xoʻjaliklarning ayrim rahbarlari oʻzlarining ishlarini toʻgʻri tashkil etishdagi uquvsizligiga va boshoqli don ekinlari yetishtirish agrotexnikasining muntazam ravishda buzilishiga noqulay iqlim sharoitlarini bahona qilish amaliyoti qattiq qoralansin.
Boshoqli don ekinlari yetishtirishning ilmiy asoslangan texnologiyasiga qatʼiy rioya qilish yuzasidan shaxsan javobgarlik Qishloq va suv xoʻjaligi vazirligi, Qoraqalpogʻiston Respublikasi Vazirlar Kengashi, viloyatlar, tumanlar va don ekuvchi xoʻjaliklar rahbarlari zimmasiga yuklansin.
2. Quyidagilar Oʻzbekiston Respublikasi Qishloq va suv xoʻjaligi vazirligi, “Oʻzdonmahsulot” davlat-aksiyadorlik korporatsiyasi, Oʻzbekiston qishloq xoʻjaligi ilmiy-ishlab chiqarish markazining gʻallachilik sohasidagi faoliyati asosiy yoʻnalishlari etib belgilansin:
seleksiya va urugʻchilikni takomillashtirish yuzasidan davlat siyosatini ishlab chiqish va amalga oshirish, bugʻdoy va arpaning mahalliy sharoitlarga moslashgan yangi yuqori mahsulli navlarini tezroq yaratish, navlarni joylashtirish va navlarni yangilashning yillik va istiqbolga moʻljallangan dasturlarini ishlab chiqish;
boshoqli don ekinlari urugʻliklariga boʻlgan ehtiyojni aniqlash, ularni yetishtirish va tayyorlash boʻyicha buyurtmalarni ijrochilarga yetkazish;
boshoqli don ekinlari urugʻliklarini yetishtirish, tayyorlash, tozalash, navlarga ajratish, sarxillash, sertifikatsiyalash, qoplash, saqlash va sotishni tashkil etish, shuningdek urugʻlik materialning nav tozaligini va konditsiyaga mosligini taʼminlash ustidan nazoratni amalga oshirish;
mulkchilik shakllaridan, xoʻjalik yuritish usullari va idoraviy mansubligidan qatʼi nazar, boshoqli don ekinlarining dastlabki, elita, keng koʻlamli urugʻchiligi va ularni tayyorlash bilan shugʻullanuvchi xoʻjalik yurituvchi subyektlar faoliyatini muvofiqlashtirish.
3. Oʻzbekiston Respublikasi Qishloq va suv xoʻjaligi vazirligi, Oʻzbekiston qishloq xoʻjaligi ilmiy-ishlab chiqarish markazi, Qoraqalpogʻiston Respublikasi Vazirlar Kengashi va viloyatlar hokimliklarining elita urugʻliklar yetishtirish boʻyicha ixtisoslashtirilgan xoʻjaliklar tashkil etish va respublikada boshoqli don ekinlari urugʻchiligini tashkil etish sxemasi toʻgʻrisidagi takliflariga 1 va 1a-ilovalarga muvofiq rozilik berilsin.
Oʻzbekiston Respublikasi Qishloq va suv xoʻjaligi vazirligi, Oʻzbekiston qishloq xoʻjaligi ilmiy-ishlab chiqarish markazi, Qoraqalpogʻiston Respublikasi Vazirlar Kengashi, viloyatlar hokimliklari urugʻchilikni tashkil etishning belgilangan tartibiga qatʼiy rioya qilinishini taʼminlasinlar, uni oʻzboshimchalik bilan oʻzgartirish hollariga barham bersinlar.
4. Boshoqli don ekinlari navlarini yangilash va ularni navlarga koʻra joylashtirish dasturini ishlab chiqish va amalga oshirish boʻyicha doimiy ishlovchi respublika komissiyasining Qoraqalpogʻiston Respublikasi Vazirlar Kengashi, viloyatlar hokimliklari bilan kelishilgan 2000-yil hosili uchun boshoqli don ekinlarining roʻyxatdan oʻtkazilgan va istiqbolli navlarini joylashtirish, ularning ekin maydonlari, hosildorligi, yalpi hosili boʻyicha takliflari 2-3-ilovalarga muvofiq qabul qilinsin.
6. Oʻzbekiston Respublikasi Moliya vazirligi hamda Qishloq va suv xoʻjaligi vazirligi jahon bozori konyunkturasini hisobga olgan holda davlat ehtiyojlari uchun xarid qilinadigan donning, shuningdek xoʻjaliklardan xarid qilinadigan urugʻlikning xarid (preyskurant) narxlari yuzasidan har yili 1-maygacha takliflar kiritsinlar.
7. “Oʻzdonmahsulot” davlat korporatsiyasi:
boshoqli don ekinlari urugʻliklariga puxta ishlov berish, ularni navlarga ajratish, sarxillash, dorilash va qoplarga joylash boʻyicha 5-ilovaga muvofiq urugʻlik tozalash sexlari qurilishini taʼminlasin;
Oʻzbekiston Respublikasi Vazirlar Mahkamasining “Andijon viloyatida boshoqli don ekinlari urugʻchiligini tashkil etish masalalari” toʻgʻrisida 1996-yil 25-dekabrdagi 458-son qaroriga muvofiq 2000-yil hosili uchun respublikaning elita-urugʻchilik xoʻjaliklari uchun boshoqli don ekinlarining 2 ming tonna superelita va elita urugʻliklari keltirilishini taʼminlasin;
Oʻzbekiston Respublikasi Qishloq va suv xoʻjaligi vazirligi, Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda boshoqli don ekinlarining yuqori sifatli urugʻlari 6 va 6a-ilovalarga muvofiq hajmlarda tayyorlanishini va yetkazib berilishini taʼminlasin;
“Oʻzkimyosanoat” uyushmasi bilan birgalikda kelgusi yil hosili uchun boshoqli don ekinlari urugʻlarini dorilashga zaharli kimyoviy dorilar har yili birinchi maygacha yetkazib berilishini taʼminlasin.
8. Oʻzbekiston Respublikasi Qishloq va suv xoʻjaligi vazirligi va “Oʻzdonmahsulot” davlat-aksiyadorlik korporatsiyasi, Qashqadaryo va Samarqand viloyatlari hokimliklari Qashqadaryo viloyatining Yakkabogʻ tumanidagi “Oʻzbekiston” va Samarqand viloyatining Tayloq tumanidagi Ulugʻbek nomidagi elita-urugʻchilik xoʻjaliklari negizida Andijon gʻallachilik institutining mamlakatning janubiy mintaqalari uchun boshoqli don ekinlarining yuqori mahsulli navlari urugʻligini yetishtiruvchi filiallarini tashkil etsinlar, ushbu maqsadlarda “Qashqadaryodonmahsulot” va “Samarqanddonmahsulot” uyushmalari tarkibida moddiy-texnika bazasiga ega boʻlgan tegishli boʻlinmalar tashkil etsinlar va ularga samarali faoliyat koʻrsatish uchun zarur shart-sharoitlar yaratsinlar.
“Samarqanddonmahsulot” uyushmasiga 2000-yil hosilidan viloyat xoʻjaliklaridan bugʻdoyning 40 ming tonna yuqori reproduksiyali navli urugʻligini xarid qilish, urugʻlikni keyinchalik asosan janubiy mintaqalarning qishloq xoʻjaligi korxonalariga sotish topshirigʻi belgilansin.
9. Oʻzbekiston Respublikasi Fan va texnika davlat qoʻmitasi, Fanlar akademiyasi, Oʻzbekiston qishloq xoʻjaligi ilmiy-ishlab chiqarish markazi bir oy muddatda boshoqli don ekinlarining yangi serhosil, kasalliklarga chidamli navlarini yaratish boʻyicha istiqbolga moʻljallangan dasturni ishlab chiqsinlar. Gʻallachilik muammolari boʻyicha ilmiy-tadqiqotlarni kengaytirishni nazarda tutsinlar, Andijon sugʻoriladigan yerlarda don va dukkakli don yetishtirish ilmiy-tadqiqot instituti va uning filiallari tadqiqotlari mavzularini qayta koʻrib chiqsinlar.
10. Oʻzbekiston Respublikasi Qishloq va suv xoʻjaligi vazirligi, Oʻzbekiston qishloq xoʻjaligi ilmiy-ishlab chiqarish markazi, Oʻzbekiston Respublikasi Vazirlar Mahkamasi huzuridagi Davlat kimyo komissiyasi boshoqli don ekinlari oʻstirishning mintaqalar va navlar boʻyicha texnologik xaritalarini ishlab chiqsinlar va kuzgi ekish oʻtkazilgungacha xoʻjaliklarga yetkazsinlar, ularda begona oʻtlar, zararkunandalar va kasalliklarga qarshi kurashishning samarali chora-tadbirlarini koʻrsatsinlar. Boshoqli don ekinlarining zang bilan kasallanishiga yoʻl qoʻymaslik yuzasidan maxsus chora-tadbirlar koʻrsinlar, 1999-yilda Surxondaryo viloyati xoʻjaliklarida yuz bergan hollardan toʻgʻri xulosalar chiqarsinlar.
11. “Oʻzkimyosanoat” uyushmasi don ekinlariga solinadigan azotli, fosforli va kaliyli oʻgʻitlarga don ekuvchi xoʻjaliklarning ehtiyoji hisob-kitobidan kelib chiqib, ularning Qoraqalpogʻiston Respublikasi va viloyatlar boʻyicha 7-ilovaga muvofiq yetkazib berilishini taʼminlasin.
12. Oʻzbekiston Respublikasi Qishloq va suv xoʻjaligi vazirligi, “Oʻzqishloqxoʻjaliktaʼminottuzatish” davlat-kooperativ qoʻmitasi don seyalkalari tuzatilishi va tayyorlanishini 1999-yil 10-sentabrgacha tugallasinlar, “Oʻzqishloqxoʻjalikmash-xolding” kompaniyasi esa xoʻjaliklarning buyurtmanomalariga binoan don seyalkalari hamda ularga ehtiyot qismlar tayyorlanishi va yetkazib berilishini tashkil etsin.
13. “Oʻzdonmahsulot” davlat-aksiyadorlik korporatsiyasi Oʻzbekiston Respublikasi Qishloq va suv xoʻjaligi vazirligi, “Oʻzagrosugʻurta” kompaniyasi, Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda 2000-yil hosilidan don xarid qilish yuzasidan kontraktatsiya shartnomalari shu yil 1-oktabrgacha tuzilishini taʼminlasin.
14. “Oʻzdonmahsulot” davlat-aksiyadorlik korporatsiyasi va Oʻzbekiston Respublikasi Moliya vazirligi huzuridagi Davlat ehtiyojlari uchun xarid qilinadigan qishloq xoʻjaligi mahsulotlarining hisob-kitob Jamgʻarmasi:
xoʻjaliklarga berilayotgan urugʻlikni hisobga olgan holda xarid qilinayotgan don qiymatining kamida 50 foizi miqdorida 2000-yil 1-iyungacha xoʻjaliklarga bosqichma-bosqich avans berishni taʼminlasinlar, bunda 1999-yil hosilining preyskurant va shartnomaviy narxini baza sifatida qabul qilsinlar;
2000-yil hosiliga preyskurant narxlar tasdiqlangandan keyin tuzilgan kontraktatsiya shartnomalariga tegishli oʻzgartirishlar kiritsinlar.
15. Oʻzbekiston Respublikasi Qishloq va suv xoʻjaligi vazirligi, “Oʻzdonmahsulot” davlat korporatsiyasi, “Oʻzdavstandart” markazi, “Oʻzdavdoninspeksiya” 2000-yil 1-yanvargacha Oʻzbekiston Respublikasi standartini (OʻzRST-880-98. Bugʻdoy. “Tayyorlash va yetkazib berishga qoʻyiladigan talablar”) qayta koʻrib chiqsinlar va unga muayyan tuproq-iqlim sharoitlaridan va ilmiy muassasalar tavsiyanomalarini hisobga olgan holda boshoqli don ekinlari navlarini oʻstirish texnologiyalaridan kelib chiqadigan oʻzgartirish va qoʻshimchalarni kiritsinlar.
16. Oʻzbekiston Respublikasi Qishloq va suv xoʻjaligi vazirligi, “Oʻzqishloqxoʻjaliktaʼminottuzatish” davlat-kooperativ qoʻmitasi, “Oʻzqishloqxoʻjalikmash-xolding” kompaniyasi, “Oʻzkimyosanoat” uyushmasi, “Oʻzneftmahsulot” kompaniyasi kuzgi don ekishni oʻtkazishda va eng avvalo mineral oʻgʻitlar, neft mahsulotlarini oʻz vaqtida yetkazib berishda, haydov traktorlari, seyalkalarni tayyorlashda, ularga ehtiyot qismlar, uzellar va agregatlar keltirishda xoʻjaliklarga aniq yordam koʻrsatish boʻyicha bir hafta muddatda tadbirlar ishlab chiqsinlar va tasarruflaridagi boʻlinmalarga yetkazsinlar.
17. Mazkur qarorning bajarilishini nazorat qilish Bosh vazir oʻrinbosari B. M. Olimjonov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
1999-yil 17-avgust,
391-son
Vazirlar Mahkamasining 1999-yil 17-avgustdagi 391-sonli qaroriga 1-ILOVA
Boshoqli don ekinlari urugʻligi yetishtiruvchi elita — urugʻchilik xoʻjaliklari
ROʻYXATI
Vazirlar Mahkamasining 1999-yil 17-avgustdagi 391-sonli qaroriga 1a-ILOVA
Boshoqli don ekinlarining yangi istiqbolli navlari urugʻchiligini tashkil etish
SXEMASI
Izoh: super-elita urugʻliklar Andijon sugʻoriladigan yerlarda don, dukkakli don ekinlari oʻstirish ilmiy-tadqiqot institutining tajriba-ishlab chiqarish xoʻjaliklarida va uning Gʻallaorol filialida yetishtiriladi;
mazkur qarorning 3-bandiga muvofiq urugʻchilik xoʻjaliklari roʻyxati, navli urugʻliklar tayyorlash hajmi Qoraqalpogʻiston Respublikasi Vazirlar Kengashi va viloyatlar hokimliklari bilan kelishgan holda Oʻzbekiston Respublikasi Qishloq va suv xoʻjaligi vazirligi tomonidan belgilanadi va tasdiqlanadi.
Vazirlar Mahkamasining 1999-yil 17-avgustdagi 391-sonli qaroriga 2-ILOVA
2000-yil hosili uchun boshoqli don ekinlarini navlar boʻyicha joylashtirish
Vazirlar Mahkamasining 1999-yil 17-avgustdagi 391-sonli qaroriga 3-ILOVA
2000-yil hosili uchun boshoqli don ekinlari maydoni va yalpi hosili
Vazirlar Mahkamasining 1999-yil 17-avgustdagi 391-sonli qaroriga 5-ILOVA
2000-yilda “Oʻzdonmahsulot” davlat korporatsiyasining don qabul qilish korxonalarida urugʻlik tozalash sexlari qurilishi boʻyicha
TOPShIRIQ
Izoh: quriladigan sexlar “Petkus” (Germaniya) firmasi asbob-uskunalari bilan jihozlanadi, har biri 120 tonna/sutka quvvatga ega boʻladi yoki mavsum mobaynida 10,8 ming tonna donni tozalaydi. Ishlayotgan sexlarni hisobga olgan holda 33 ta urugʻlik tozalash sexining mavsum mobaynidagi umumiy quvvati 290 ming tonna tayyor urugʻlikni tashkil qiladi.
Vazirlar Mahkamasining 1999-yil 17-avgustdagi 391-sonli qaroriga 6-ILOVA
2000-yilda “Oʻzdonmahsulot” davlat korporatsiyasi korxonalari tomonidan boshoqli don ekinlari urugʻligi tayyorlash hajmi
Vazirlar Mahkamasining 1999-yil 17-avgustdagi 391-sonli qaroriga 6a-ILOVA
2000-yilda “Oʻzdonmahsulot” davlat korporatsiyasi korxonalari tomonidan sugʻoriladigan yerlar uchun boshoqli don ekinlari urugʻligi yetkazib berish hajmi
Vazirlar Mahkamasining 1999-yil 17-avgustdagi 391-sonli qaroriga 7-ILOVA
2000-yil hosili uchun don ekinlariga ishlatish maqsadida qishloq xoʻjaligiga yetkazib beriladigan mineral oʻgʻitlar hajmi
Izoh: ilmiy muassasalarning eksperimental xoʻjaliklariga va elita-urugʻchilik xoʻjaliklariga fosforli, kaliyli, azotli oʻgʻitlarni oziq moddalarning qatʼiy nisbatida va tovar don ekuvchi xoʻjaliklar uchun belgilangan normadan 10 foiz ortiq yetkazib berish taʼminlansin.
Ekishdan oldin va kuzgi boshoqli don ekinlarini ekish bilan bir vaqtda solish uchun fosforli va kaliyli oʻgʻitlarni yetkazib berish har yili 10-oktabrgacha, azotli oʻgʻitlarni yetkazib berish esa 1-aprelgacha tugallansin.