“Sahro oltini” Oʻzbekiston-Kanada qoʻshma korxonasini tashkil etish toʻgʻrisida (255-son)

26.05.1997

Oʻzbekiston Respublikasi Vazirlar Mahkamasining

qarori

Ilgʻor texnologiyalar va xorijiy investitsiyalarni jalb etish yoʻli bilan Oʻzbekiston Respublikasining mineral-xomashyo bazasini kengaytirish hamda asl va rangli metallar ishlab chiqarishni koʻpaytirish maqsadida Vazirlar Mahkamasi qaror qiladi:

1. Oʻzbekiston Respublikasi Davlat geologiya va mineral resurslar qoʻmitasining Kanadaning “Sentral Eyjen Gold” kompaniyasi bilan hamkorlikda geologiya-qidiruv ishlarini amalga oshirish boʻyicha va ijobiy natijalar olingan taqdirda, asl va rangli metallar qazib chiqarish boʻyicha “Sahro oltini” qoʻshma korxonasini tashkil etish toʻgʻrisidagi taklifi qabul qilinsin.

2. Qoʻshma korxona yopiq turdagi aksiyadorlik jamiyati shaklida tashkil etilishiga va ulushlarning 1-ilovaga muvofiq tartibda quyidagicha taqsimlanishiga rozilik berilsin: Oʻzbekiston tomoni — 51 foiz, shu jumladan Davlat geologiya qoʻmitasi — 25,5 foiz, “Qiziltepageologiya” davlat geologiya korxonasi — 25,5 foiz, Kanada tomoni — 49 foiz.

Geologiya-qidiruv ishlarini mablagʻ bilan taʼminlash toʻliq Kanada tomoni hisobidan tavakkalchilik shartlarida amalga oshirilishi maʼlumot uchun qabul qilinsin.

3. Quyidagilar qoʻshma korxonaning asosiy vazifalari etib belgilansin:

janubiy-gʻarbiy Qizilqumdagi Quljuqtov togʻi doirasida, tomonlar kelishgan hududda oltin, kumush va rangli metallar konlarini qidirish va qazib chiqarish;

aniqlangan konlarni oʻzlashtirishning tijorat va texnik maqsadga muvofiqligini tasdiqlash uchun texnik-iqtisodiy asoslashlarni tuzish;

tomonlar loyihaning texnik-iqtisodiy asoslashini maʼqullashgandan hamda kompleks ekspertizadan oʻtkazishgandan soʻng aniqlangan konlardan oltin, kumush va rangli metallarni qazib olish va ishlab chiqarish.

Kelishilgan hududda geologiya-qidiruv ishlari chogʻida salbiy natijalar olingan taqdirda “Sahro oltini” qoʻshma korxonasiga Oʻzbekiston qonunchiligida belgilangan tartibda qulayligi ushbu qarorda belgilanganidan kam boʻlmagan shartlarda geologiya-qidiruv ishlarini oʻtkazish uchun, keyinchalik Oʻzbekiston tomonining ulushini koʻpaytirgan va ustav jamgʻarmasini qayta hisoblagan holda, boshqa hududni berish kafolatlansin.

4. Belgilansinki:

geologiya-qidiruv ishlarining olib borilishiga qarab, biroq koʻpi bilan uch yildan soʻng “Sahro oltini” qoʻshma korxonasi geologiya-qidiruv ishlarini davom ettirish maqsadi boʻlmagan maydonlarni boʻshatishga majburdir;

geologiya-qidiruv ishlarining umumiy davom etish davri — koʻpi bilan 5 yil;

keyinchalik geologiya-qidiruv ishlarini amalga oshirish uchun qiziqish uygʻotuvchi hududlar aniqlangan taqdirda “Sahro oltini” qoʻshma korxonasiga shu hududlar doirasida yana 5 yilgacha ishlarni davom ettirish imkoniyati beriladi.

5. “Sahro oltini” qoʻshma korxonasiga quyidagi huquqlar berilsin:

tomonlar kelishgan hududlar doirasida geologiya-qidiruv ishlarini olib borishga eksklyuziv huquq;

ushbu hududda aniqlangan konlardan istalganida 30 yil mobaynida qazishga eksklyuziv huquq;

konlarni qazishda olingan oltin, kumush va boshqa rangli metallarni Oʻzbekiston Respublikasida ham, chet mamlakatlarda ham jahon narxlari boʻyicha erkin almashtiriladigan valyutaga toʻliq hajmda sotish;

Oʻzbekiston Respublikasi banklarida, shuningdek xorijiy banklarda xorijiy valyutada schyotlar ochish, Oʻzbekiston Respublikasi Markaziy banki tomonidan belgilangan tartibda xorijiy bank schyotlaridan chet el valyutasini olish, ulardan foydalanish va ularni saqlash, bunga mahsulot sotishdan tushgan daromad ham kiradi;

kreditlar, shu jumladan, erkin almashtiriladigan valyutada kreditlar, bunga aksiyadorlar kreditlari ham kiradi, olish va ularni toʻlash, Oʻzbekiston Respublikasi qonunchiligiga muvofiq ushbu kreditlarni qoʻshma korxona mulki bilan taʼminlash;

Oʻzbekiston Respublikasi tashkilotlarida, shu jumladan, xorijda sugʻurtani amalga oshirish;

ustav sarmoyasini AQSh dollarida belgilash;

hisobot davri yakunlari boʻyicha soʻmga qayta hisoblagan holda AQSh dollarida buxgalterlik hisobini yuritish va hisobot taqdim etish.

6. “Sahro oltini” qoʻshma korxonasiga 2-ilovaga muvofiq imtiyozlar berilsin.

7. Oʻzbekiston Respublikasida soliq qonunchiligi “Sahro oltini” qoʻshma korxonasining faoliyat koʻrsatish sharoitlarini yomonlashtirgan tarzda oʻzgargan taqdirda sanoat yoʻli bilan mahsulot ishlab chiqarish boshlangan vaqtdan eʼtiboran 10 yil mobaynida ushbu qaror qabul qilingan vaqtda amalda boʻlgan qonunlar va boshqa normativ hujjatlar qoʻllansin.

8. “Sahro oltini” loyihasi Oʻzbekiston Respublikasining 1997-yilgi Investitsiya dasturiga kiritilganligi maʼlumot uchun qabul qilinsin.

Oʻzbekiston Respublikasi Makroiqtisodiyot va statistika vazirligi qoʻshma korxona tomonidan geologiya-qidiruv ishlarining amalga oshirilishiga koʻra ushbu loyihani keyingi yillardagi Investitsiya dasturiga kiritish masalasini belgilangan tartibda koʻrib chiqsin.

9 Oʻzbekiston Respublikasi Moliya vazirligi “Sahro oltini” qoʻshma korxonasi uchun soliqqa tortish, buxgalteriya hisobi va hisobotini yuritish tartibini bir oy muddatda ishlab chiqsin va tasdiqlasin.

10. Mazkur qarorning bajarilishini nazorat qilish Bosh vazir Oʻ. T. Sultonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1997-yil 26-may,

255-son

Vazirlar Mahkamasining 1997-yil 26-maydagi 255-sonli qaroriga 1-ILOVA

“Sahro oltini” qoʻshma korxonasi ustav jamgʻarmasi

TUZILMASI

Vazirlar Mahkamasining 1997-yil 26-maydagi 255-sonli qaroriga 2-ILOVA

“Sahro oltini” qoʻshma korxonasi uchun beriladigan

imtiyozlar

“Sahro oltini” qoʻshma korxonasi quyidagilardan ozod qilinsin:

geologiya-qidiruv ishlarini amalga oshirish, texnik-iqtisodiy asoslashlarni tuzish, ishlab chiqarishni qurish, tayyorlash va oʻzlashtirish davrida Oʻzbekiston Respublikasi hududida amalda boʻlgan soliqlar, ajratmalar va toʻlovlarning barcha turlaridan;

sanoat mahsuloti chiqarish boshlangandan eʼtiboran 7 yil mobaynida foyda soligʻi toʻlashdan. Ushbu davr oʻtgandan keyin foyda soligʻi 16 foiz miqdorida belgilansin;

mulk soligʻi toʻlashdan;

sanoat mahsuloti chiqarishning butun davrida qoʻshma korxona ehtiyojlari uchun asbob-uskuna va material resurslari importiga va tayyor mahsulot eksportiga boj poshlinalari toʻlashdan;

qoʻshma korxonaning xorijiy qatnashchilari dividendlari boʻyicha daromadlarni chet mamlakatga oʻtkazishda daromad soliqlari toʻlashdan.

Foyda va qatnashchilar dividendlari boʻyicha soliqlarni qoʻshma korxona erkin almashtiriladigan valyutada toʻlaydi.