“Alpomish” dostoni yaratilganligining 1000 yilligini nishonlash toʻgʻrisida (17-son)

13.01.1998

Oʻzbekiston Respublikasi Vazirlar Mahkamasining

qarori

“Alpomish” dostonining ajdodlarimiz ijodiy dahosining bebaho badiiy yodgorligi sifatida jahon xalqlari epik ijodiyoti namunalari ichida alohida oʻrin tutishini, uning mustaqil rivojlanish davrida millat birligi va maʼnaviy uygʻonishi, milliy gʻurur va oʻz-oʻzini anglash ramziga aylanganligini, ushbu doston yaratilganligining 1000 yilligi YUNESKOning 1999-yildagi tadbirlari rejasiga kiritilganligini inobatga olib hamda folklor merosini avaylab-asrash va avlodlarga toʻla yetkazish maqsadida Vazirlar Mahkamasi qaror qiladi:

1 Oʻzbekiston Respublikasi Fanlar akademiyasi, Madaniyat ishlari vazirligi, Yozuvchilar uyushmasi, Oʻzbekiston Badiiy akademiyasi va respublika “Maʼnaviyat va maʼrifat” jamoatchilik markazining “Alpomish” dostoni yaratilganligining 1000 yilligini 1999-yilda YUNESKO ishtirokida keng miqyosda nishonlash haqidagi takliflari qabul qilinsin.

Ushbu sanaga tayyorgarlik koʻrish va uni oʻtkazish boʻyicha tashkiliy qoʻmita tarkibi ilovaga muvofiq tasdiqlansin.

Tashkiliy qoʻmita tegishli vazirliklar va idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda bir oy muddatda tadbirlar ishlab chiqsin va uni amalga oshirishga kirishsin.

2. Oʻzbekiston Respublikasi Fanlar akademiyasi, Madaniyat ishlari vazirligi, Tashqi ishlar vazirligi, Badiiy akademiya, Yozuvchilar uyushmasi, respublika “Maʼnaviyat va maʼrifat” jamoatchilik markazi, YUNESKO ishlari boʻyicha milliy komissiya, Surxondaryo viloyati va Toshkent shahar hokimliklari birgalikda 1999-yilning oktyabr oyida Toshkent shahrida “Alpomish” dostoni va jahon xalqlari epik ijodiyoti” mavzuida xalqaro konferensiya va Surxondaryo viloyatida tantanali bayram tadbirlarini tayyorlasinlar va oʻtkazsinlar.

3. Oʻzbekiston Respublikasi Madaniyat ishlari vazirligi:

“Alpomish” dostoni, umuman, xalq ijodi namunalari asosida teatr spektakllari, adabiy-badiiy kompozitsiyalar yaratishni kengaytirsin;

Fanlar akademiyasi va Badiiy-akademiya bilan birgalikda yetakchi muzeylarda etnografik koʻrgazmalar tashkil qilsin;

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, Fanlar akademiyasi, “Oʻzteleradio” va boshqa manfaatdor vazirliklar va idoralar bilan birgalikda Termiz shahrida 1999-yildan boshlab har ikki yilda bir marta folklor asarlari ijrochilarining mamlakat koʻrik-tanlovini hamda xalqaro festivalini oʻtkazish, eng yaxshi ijodkorlarning asarlarini yozib olish, ular haqida tele-videofilmlar yaratish ishlarini tashkil etsin.

4. Surxondaryo viloyati hokimligi viloyatning ichki imkoniyatlari hisobidan Termiz va Boysun shaharlarida zamonaviy dam olish inshootlariga va kichik sport maydonlariga ega boʻlgan “Alpomish” bogʻlarini tashkil qilsin.

5. “Sharq” nashriyot-matbaa konserni 1999-yilda “Alpomish” dostonining toʻla nashrini oʻzbek va rus tillarida chop etsin.

6. Oʻzbekiston Respublikasi Davlat matbuot qoʻmitasi “Alpomish” dostonining tanlanma toʻplamlarini, jumladan dostonning qoraqalpoq tilidagi variantini, doston haqidagi tadqiqotlar va ilmiy-ommabop risolalarni chop etishni rejalashtirsin.

7. Oʻzbekiston Respublikasi Fanlar akademiyasi:

“Alpomish” dostonining akademik nashrini amalga oshirish va xorijiy tillarda nashr etish masalasini hal etsin;

Oʻzbekiston Respublikasi Davlat matbuot qoʻmitasi bilan birgalikda 100 jildlik “Oʻzbek folklori yodgorliklari” toʻplamlarini nashrga tayyorlasin va 2001-yildan boshlab uni nashr etishga kirishsin.

8. “Oʻzbekkino” davlat-aksiyadorlik kompaniyasi “Alpomish” koʻp seriyali badiiy filmini va bolalar uchun multiplikatsion filmlar turkumini hamda atoqli xalq baxshilari haqida hujjatli-publitsistik filmlar yaratishni rejalashtirsin.

9. Oʻzbekiston pochta va telekommunikatsiyalar agentligi “Alpomish” dostoni sujeti, umuman xalq ijodi namunalari asosida ishlangan suratlar, tasavvuri bilan bogʻliq ramzlar, xalq baxshilarining siymolari aks ettirilgan pochta markalari, otkritkalar va konvertlar turkumini chiqarsin.

10. Oʻzbekiston Respublikasi Davlat jismoniy tarbiya va sport qoʻmitasi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, daxldor vazirliklar va idoralar bilan birgalikda 1998-yildan boshlab har ikki yilda bir marta milliy sport oʻyinlari — Alpomish oʻyinlari festivalini oʻtkazsin.

11. “Oʻzteleradio” va boshqa ommaviy axborot vositalari “Alpomish” dostoni va umuman oʻzbek xalq ogʻzaki ijodiyotining jahon madaniyati taraqqiyotidagi oʻrni va ahamiyatini keng yoritsinlar.

12. Oʻzbekiston milliy axborot agentligi, “Jahon” axborot agentligi va “Oʻzteleradio” “Alpomish” dostoni yaratilganligining 1000 yilligi munosabati bilan olib borilayotgan ishlarni targʻib-tashviq qilish, jahon ommaviy axborot vositalarini zarur maʼlumotlar bilan taʼminlash chora-tadbirlarini koʻrsin.

13. Oʻzbekiston Respublikasi Moliya vazirligi “Alpomish” dostoni yaratilganligining 1000 yilligini oʻtkazish bilan bogʻliq xarajatlar respublika budjeti hamda Surxondaryo viloyati mahalliy budjeti, homiylar hisobidan teng ulushlarda qoplanishini hisobga olgan holda mablagʻ ajratishni nazarda tutsin.

14. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari I. Joʻrabekov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1998-yil 13-yanvar,

17-son

Vazirlar Mahkamasining 1998-yil 13-yanvardagi 17-son qaroriga ILOVA

“Alpomish” dostoni yaratilganligining 1000 yilligiga tayyorgarlik koʻrish va uni oʻtkazish boʻyicha tashkiliy qoʻmita

TARKIBI

Joʻrabekov I.‎ ‎— Oʻzbekiston Respublikasi Bosh vazirining birinchi oʻrinbosari, tashkiliy qoʻmita raisi‎ Azizxoʻjayev A.‎ — Oʻzbekiston Respublikasi Bosh vazirining oʻrinbosari, tashkiliy qoʻmita raisining oʻrinbosari‎ Norov V.‎ — Oʻzbekiston Respublikasi Prezidentining Davlat maslahatchisi (kelishuvga muvofiq)‎ Rahmatov Oʻ.‎ — Oʻzbekiston Respublikasi Prezidentining Davlat maslahatchisi (kelishuvga muvofiq)‎ Joʻrayev T.‎ — Oʻzbekiston Fanlar akademiyasi prezidenti, tashkiliy qoʻmita raisining oʻrinbosari‎ Noraliyev J.‎ — Surxondaryo viloyati hokimi, tashkiliy qoʻmita raisining oʻrinbosari‎ Abdullayev R.‎ — Bastakorlar uyushmasi raisi‎ Aminov N.‎ — Respublika “Maʼnaviyat va maʼrifat” jamoatchilik markazining rahbari‎ Joʻrayev X.‎ — Madaniyat ishlari vaziri‎ Yoʻldoshev I.‎ — Xalq taʼlimi vaziri Koʻchimov A.‎ — “Oʻzteleradio” kompaniyasi raisi‎ Maxsetov B.‎ — Davlat jismoniy tarbiya va sport qoʻmitasi raisi‎ Meliboyev A.‎ — “Oʻzbekiston adabiyoti va sanʼati” gazetasining bosh muharriri‎ Mirzayev T.‎ — Oʻzbekiston Fanlar akademiyasi Adabiyot instituti direktori‎ Muhammad Yusuf.‎ — shoir‎ Oripov A.‎ — Yozuvchilar uyushmasining raisi‎ Sayfiddinov D.‎ — Moliya vaziri‎ Salimov O.‎ — Oliy va oʻrta maxsus taʼlim vaziri‎ Toʻxtaboyev X.‎ — “Oltin meros” jamgʻarmasi raisi‎ Shogʻulomov R.‎ — Davlat matbuot qoʻmitasi raisi‎ Yunusov T.‎ — “Oʻzbekkino” DAK raisi ‎ Qoʻziyev T.‎ — Badiiy akademiya raisi‎ Qoʻshmoqov M.‎ — “Sogʻlom avlod uchun” jurnali bosh muharriri, folklorshunos ‎ Hazratqulov M.‎ — OʻzA bosh direktori‎