Yevropa tiklanish va taraqqiyot bankining ikkinchi kredit liniyasidan foydalanishga oid chora-tadbirlar toʻgʻrisida (31-son)

20.01.1997

Oʻzbekiston Respublikasi Vazirlar Mahkamasining

qarori

Yevropa tiklanish va taraqqiyot banki tomonidan beriladigan ikkinchi kredit liniyasidan samarali foydalanish va Oʻzbekiston Respublikasining kichik va oʻrta korxonalarini moliyaviy taʼminlash boʻyicha loyihalarni amalga oshirishni tezlashtirish maqsadida Vazirlar Mahkamasi qaror qiladi:

1. Maʼlumot uchun qabul qilinsinki:

Yevropa tiklanish va taraqqiyot banki tomonidan beriladigan 120 mln. AQSH dollari miqdoridagi ikkinchi kredit liniyasi Oʻzbekiston Respublikasining kichik va oʻrta korxonalarini moliyaviy taʼminlash uchun yoʻnaltiriladi;

60 mln. AQSH dollari Tashqi iqtisodiy faoliyat milliy bankiga Oʻzbekiston Respublikasining kafolatisiz beriladi;

30 mln. AQSH dollari — ixtisoslashtirilgan “Asaka” davlat-aksionerlik tijorat bankiga Oʻzbekiston Respublikasi kafolati ostida beriladi;

30 mln. AQSH dollari — Oʻzbekiston Respublikasining boshqa tijorat banklariga Oʻzbekiston Respublikasi kafolati ostida beriladi.

2. Tashqi iqtisodiy faoliyat milliy banki va “Asaka” banki boshqaruvlari raislariga tegishli Kredit bitimlarini imzolash uchun Yevropa tiklanish va taraqqiyot banki rahbariyati bilan kelishib olingan muddatlarda Buyuk Britaniya (London shahri)ga borishlariga ruxsat etilsin.

3. Oʻzbekiston Respublikasi Markaziy banki Banklar uyushmasi bilan birgalikda Yevropa tiklanish va taraqqiyot banki bilan kelishgan holda Yevropa tiklanish va taraqqiyot banki kreditlarini oluvchi Oʻzbekiston Respublikasi tijorat banklari toʻgʻrisida Vazirlar Mahkamasiga ikki hafta muddatda takliflar kiritsin.

4. Oʻzbekiston Respublikasi Bosh vazirining oʻrinbosari, Moliya vaziri B. S. Hamidovga “Asaka” bankiga va boshqa tijorat banklariga beriladigan kreditlar boʻyicha Oʻzbekiston Respublikasi bilan Yevropa tiklanish va taraqqiyot banki oʻrtasida 60 mln. AQSH dollari summasidagi Kafolat bitimlarini Oʻzbekiston Respublikasi Hukumati nomidan imzolash vakolati berilsin.

5. Oʻzbekiston Respublikasi Adliya vazirligi Oʻzbekiston Respublikasi bilan Yevropa tiklanish va taraqqiyot banki oʻrtasidagi tegishli Kafolat bitimlari boʻyicha yuridik xulosalar bersin.

6. Markaziy bank “Xorijdan mablagʻ jalb qilish toʻgʻrisida”gi Oʻzbekiston Respublikasi Qonuniga muvofiq Yevropa tiklanish va taraqqiyot banki bilan Tashqi iqtisodiy faoliyat milliy banki oʻrtasida tuzilgan kredit bitimini kredit bitimi imzolangan sanadan boshlab ikki hafta muddatda belgilangan tartibda roʻyxatdan oʻtkazsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B. S. Hamidov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1997-yil 20-yanvar,

31-son