Oʻzbekistonda kurash boʻyicha birinchi jahon chempionatini oʻtkazish toʻgʻrisida (168-son)
10.04.1999
Oʻzbekiston Respublikasi Vazirlar Mahkamasining
qarori
Oʻzbek kurashining xalqaro miqyosda eʼtirof etilayotganligini inobatga olib hamda uning ommaviyligini oshirish va rivojlantirishni davlat tomonidan har tomonlama qoʻllab-quvvatlash maqsadida Vazirlar Mahkamasi qaror qiladi:
1. Xalqaro Kurash Assotsiatsiyasi taʼsis kongressining qaroriga binoan Oʻzbekiston Respublikasi Davlat jismoniy tarbiya va sport qoʻmitasi hamda Oʻzbekiston Kurash Milliy federatsiyasining 1999-yil 29-aprel — 3-may kunlari Toshkent shahridagi “Jar” sport majmuida kurash boʻyicha birinchi jahon chempionatini oʻtkazish haqidagi takliflari qabul qilinsin.
2. Kurash boʻyicha birinchi jahon chempionatini oʻtkazishga tayyorgarlik koʻrish va uni oʻtkazish tashkiliy qoʻmitasi tarkibi 1-ilovaga, sarf-xarajatlar smetasi 2-ilovaga* muvofiq tasdiqlansin.
* 2-ilova berilmaydi.
Tashkiliy qoʻmita jahon chempionatini oʻtkazishga tayyorgarlik koʻrish tadbirlarini belgilangan tartibda ishlab chiqsin va amalga oshirishga kirishsin.
Moliya vazirligi 2-ilovadagi sarf-xarajatlarning 10 million 550 ming soʻmi Vazirlar Mahkamasining zaxira jamgʻarmasi hamda qolgan qismi homiylar va Davlat jismoniy tarbiya va sport qoʻmitasining xarajatlar smetasida nazarda tutilgan mablagʻlar hisobidan qoplanishini nazarda tutgan holda mablagʻ ajratsin.
Oʻzbekiston Respublikasi Markaziy banki homiylik mablagʻlarini belgilangan tartibda erkin muomaladagi valyutaga almashtirsin.
Oʻzbekiston Respublikasi Tashqi iqtisodiy faoliyat milliy banki belgilangan tartibda valyuta mablagʻlarining naqd berilishini taʼminlasin.
3. Oʻzbekiston Respublikasi Ichki ishlar vazirligi Toshkent shahar hokimligi, Davlat jismoniy tarbiya va sport qoʻmitasi hamda Oʻzbekiston Kurash Milliy Federatsiyasi bilan birgalikda “Jar” sport majmuini kurash boʻyicha birinchi jahon chempionatini oʻtkazishga tayyorlash, musobaqalarni oʻtkazish chogʻida jamoat tartibini saqlash, chempionat ishtirokchilari va mehmonlari xavfsizligini taʼminlash choralarini koʻrsin.
4. “Oʻzbekiston havo yoʻllari” milliy aviakompaniyasi kurash boʻyicha birinchi jahon chempionati ishtirokchilari va mehmonlarini Davlat jismoniy tarbiya va sport qoʻmitasi buyurtmasiga muvofiq soʻmda haq olgan holda aviachiptalar bilan taʼminlasin hamda ularga Toshkent aeroportining VIP zali orqali haq olmasdan xizmat koʻrsatsin.
5. Oʻzbekiston Respublikasi Tashqi ishlar vazirligi Davlat jismoniy tarbiya va sport qoʻmitasi taqdim etadigan roʻyxat asosida chempionatning xorijiy ishtirokchilari va mehmonlariga viza berish masalalarini haq olmasdan hal qilsin.
6. “Oʻzbeksavdo” uyushmasi chempionat oʻtkaziladigan joyda ovqatlanish va savdo xizmatlarini tashkil etsin.
7. Oʻzbekiston Respublikasi Tashqi iqtisodiy aloqalar vazirligi va “Oʻzbekturizm” milliy kompaniyasi Davlat jismoniy tarbiya va sport qoʻmitasi buyurtmasiga muvofiq chempionat ishtirokchilari va mehmonlarini mehmonxonalarga joylashtirsin hamda “Interkontinental” mehmonxonasining konferens-zalida Xalqaro Kurash Assotsiatsiyasining navbatdagi kongressini oʻtkazishga sharoit yaratsin.
8. “Oʻzavtotrans” korporatsiyasi va “Oʻzbekturizm” milliy kompaniyasi Davlat jismoniy tarbiya va sport qoʻmitasi buyurtmasi asosida zarur miqdorda transport vositalari ajratsin.
9. Toshkent shahar hokimligi shahar koʻchalarini va chempionat tadbirlari oʻtkaziladigan joylarni obodonlashtirish va bezatish masalalarini hal qilsin.
10. Oʻzbekiston Respublikasi Sogʻliqni saqlash vazirligi jahon chempionati ishtirokchilariga bepul tibbiy xizmat koʻrsatishni tashkil etsin.
11. “Sovplastital” qoʻshma korxonasi Davlat jismoniy tarbiya va sport qoʻmitasi buyurtmasiga koʻra 1999-yil 20-aprelgacha esdalik sovgʻalarini tayyorlab bersin.
12. “Oʻzteleradio”, OʻzA va boshqa ommaviy axborot vositalariga kurash boʻyicha birinchi jahon chempionatiga tayyorgarlikning borishini va uning oʻtishini keng yoritish tavsiya etilsin.
“Oʻzteleradio”, OʻzA va Tashqi ishlar vazirligi huzuridagi “Jahon” axborot agentligi kurash boʻyicha birinchi jahon chempionati musobaqalarining chet el teleradiotarmoqlari va boshqa ommaviy axborot vositalari orqali yoritilishiga erishish yuzasidan ular bilan amaliy hamkorlik oʻrnatish choralarini koʻrsinlar.
13. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari H. Karomatov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
1999-yil 10-aprel,
168-son
Vazirlar Mahkamasining 1999-yil 10-apreldagi 168-sonli qaroriga 1-ILOVA
Toshkent shahrida Kurash boʻyicha birinchi jahon chempionatini oʻtkazish yuzasidan tashkiliy qoʻmita
tarkibi