Oʻzbekiston SSR Yengil sanoat vazirligi negizida Oʻzbekiston davlat yengil sanoat mollari ishlab chiqarish uyushmasini tashkil etish toʻgʻrisida (PF-202-son)

06.05.1991

Oʻzbekiston Sovet Sotsialistik Respublikasining Prezidenti

Farmoni

Jumhuriyat yengil sanoat birlashmalari va korxonalarining mustaqilligini kengaytirish, bozor munosabatlari sharoitida ularning ishi hamda “Oʻzbekiston SSRdagi korxonalar toʻgʻrisida”gi Oʻzbekiston SSR Qonunining amal qilish samaradorligini oshirish maqsadida, shuningdek, muassis tashkilotlarning takliflari hisobga olinib:

1. Jumhuriyat Yengil sanoat vazirligi negizida Oʻzbekiston Davlat yengil sanoat mollari ishlab chiqarish uyushmasi tuzilib, uning tarkibiga quyidagilar kiritilsin:

toʻqimachilik mahsulotlari ishlab chiqaradigan “Oʻzbektoʻqimachi” Oʻzbekiston davlat konserni;

tikuvchilik va trikotaj buyumlari ishlab chiqaradigan “Oʻzbekkiyim” Oʻzbekiston davlat konserni;

charm-poyabzal sanoati mollarini ishlab chiqaradigan “Oʻzbekpoyabzal” Oʻzbekiston davlat konserni;

chinni buyumlar ishlab chiqaradigan “Oʻzbekiston chinnisi” Oʻzbekiston davlat konserni;

yuqorida sanab oʻtilgan konsernlar tuzilmasiga kirmagan va umumtarmoq vazifalarini bajaradigan birlashmalar, korxonalar va tashkilotlar.

2. Oʻzbekiston SSR Prezidenti huzuridagi Vazirlar Kabineti (oʻrtoq Oʻ.K. Ismoilov) Ushbu Farmonni amalga oshirishga doir tashkiliy choralarni koʻzda tutuvchi tegishli qarorni tayyorlasin.

Oʻzbekiston Sovet Sotsialistik Respublikasining Prezidenti I. KARIMOV

Toshkent sh.,

1991-yil 6-may,

PF-202-son