Oʻzbekiston Respublikasi sportchilarining Afina shahri (Gretsiya)da oʻtkaziladigan 2004-yilgi XXVIII yozgi Olimpiada oʻyinlarida munosib ishtirok etishini taʼminlash toʻgʻrisida (261-son)

07.06.2004

Oʻzbekiston Respublikasi Vazirlar Mahkamasining

qarori

Oʻzbekiston sportchilarining Afina shahri (Gretsiya)da boʻlib oʻtadigan XXVIII yozgi Olimpiada oʻyinlariga sifatli tayyorgarlik koʻrishini taʼminlash, ularning ushbu nufuzli musobaqalarda faol ishtirok etishini hamda yuqori natijalarga erishishini ragʻbatlantirish, ularning mamlakatimizning xalqaro obroʻsini oshirishdagi cheksiz vatanparvarligi misolida yosh avlodni oʻz Vatani uchun gʻurur-iftixor ruhida tarbiyalash maqsadida Vazirlar Mahkamasi qaror qiladi:

1. Oʻzbekiston Respublikasi Davlat sport qoʻmitasi Oʻzbekiston Milliy olimpiya qoʻmitasi bilan birgalikda:

Olimpiya oʻyinlarida ishtirok etish huquqini beradigan xalqaro tanlov musobaqalarida litsenziyani qoʻlga kiritgan sportchilardan mamlakat terma jamoasini shakllantirsin;

mamlakat terma jamoasining oʻquv-mashgʻulot yigʻinlarining yakunlovchi bosqichida Olimpiada oʻyinlariga puxta tayyorgarlik koʻrishini va xalqaro litsenzion musobaqalarda muvaffaqiyatli ishtirok etishini tashkil qilsin;

mamlakat terma jamoasi sportchilarini zarur miqdorda sport anjomlari, inventarlari hamda sport kiyimlari bilan taʼminlasin.

2. Oʻzbekiston Respublikasi sport delegatsiyasining tarkibi va uning xarajatlar smetasi 1 va 2-ilovalarga* muvofiq tasdiqlansin.

* 1 va 2-ilovalar rus tilidagi matnda berilgan.

Oʻzbekiston Respublikasi Davlat sport qoʻmitasiga xarajatlarning tasdiqlangan smetasiga haqiqiy xarajatlardan kelib chiqqan holda oʻzgartirishlar kiritish huquqi berilsin.

3. XXVIII yozgi Olimpiada oʻyinlari sovrindorlari boʻlgan Oʻzbekiston sportchilarini ragʻbatlantirish, ularning Vatanimiz sporti sharafiga munosib hissa qoʻshganligini eʼtirof etish maqsadida Davlat sport qoʻmitasining 2004-yil uchun kalendar rejasida nazarda tutilgan mablagʻlar hisobidan quyidagi miqdorlarda bir martalik mukofotlar belgilansin:

oltin medal uchun — 100 000 AQSh dollari;

kumush medal uchun — 50 000 AQSh dollari;

bronza medal uchun — 25 000 AQSh dollari.

Oʻzbekiston Respublikasi Moliya vazirligi Davlat sport qoʻmitasi va Oʻzbekiston Respublikasi Tashqi iqtisodiy faoliyat milliy banki bilan birgalikda belgilangan mukofotlarni berish tartibini bir hafta muddatda ishlab chiqsin va Vazirlar Mahkamasiga kiritsin.

4. Oʻzbekiston Respublikasi Sogʻliqni saqlash vazirligi:

Oʻzbekiston Respublikasi Davlat sport qoʻmitasi buyurtmanomalariga binoan mamlakat terma jamoasini zarur dori-darmonlar, farmakologiya preparatlari va biologik faol tiklanish vositalari bilan taʼminlasin;

mamlakat terma jamoasiga nomzodlar uchun davolash-profilaktika tadbirlarini tashkil etishga yordam bersin.

5. Davlat sport qoʻmitasi va Milliy olimpiya qoʻmitasi Oʻzbekiston sport delegatsiyasining XXVIII yozgi Olimpiada oʻyinlariga tayyorgarlik koʻrishini taʼminlash uchun 3-ilovaga* muvofiq respublikaga maqsadli ravishda olib kelinadigan maxsus sport anjomlari va inventarlar, sport kiyimlari uchun bojxona toʻlovlaridan (bojxonada rasmiylashtirish yigʻimlaridan tashqari) ozod qilinsin.

* 3-ilova rus tilidagi matnda berilgan.

6. Oʻzbekiston Respublikasi Ichki ishlar vazirligi, Tashqi ishlar vazirligi xalqaro musobaqalar ishtirokchilari — Oʻzbekiston sport delegatsiyasi aʼzolari uchun xorijga chiqish hujjatlarining oʻz vaqtida rasmiylashtirilishini taʼminlasinlar.

7. “Oʻzbekiston havo yoʻllari” milliy aviakompaniyasi:

Oʻzbekiston sport delegatsiyasining Toshkent — Afina — Toshkent yoʻnalishi boʻyicha imtiyozli shartlarda uchishini;

Oʻzbekiston sport delegatsiyasining VIP zali orqali bepul oʻtishini taʼminlasin.

8. “Sovplastital” qoʻshma korxonasi, “Oniks” ishlab chiqarish birlashmasi va “Fonon” aksiyadorlik jamiyatiga xalqaro musobaqalarga borayotgan respublika sport delegatsiyasi uchun Davlat sport qoʻmitasi hamda Oʻzbekiston Milliy olimpiya qoʻmitasi eskizlari boʻyicha esdalik buyumlarini imtiyozli shartlarda tayyorlab berish tavsiya etilsin.

9. Oʻzbekiston matbuot va axborot agentligi, Milliy axborot agentligi, “Oʻzteleradio” kompaniyasi, Oʻzbekiston Respublikasi Davlat sport qoʻmitasi XXVIII yozgi Olimpiada oʻyinlariga tayyorgarlikning borishi va Oʻzbekiston terma jamoasining xalqaro musobaqalardagi ishtiroki ommaviy axborot vositalarida keng yoritilishini taʼminlasinlar.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.A. Azizxoʻjayev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2004-yil 7-iyun,

261-son