“Oʻzbekiston adabiyoti va sanʼati” gazetasini qoʻllab-quvvatlash toʻgʻrisida (308-son)

02.07.2004

Oʻzbekiston Respublikasi Vazirlar Mahkamasining

qarori

“Oʻzbekiston adabiyoti va sanʼati” gazetasining mamlakatimiz madaniy va maʼnaviy hayotida, adabiyot va sanʼatimizni rivojlantirish, yosh ijodkorlarning isteʼdodini roʻyobga chiqarish va tarbiyalashda tutgan alohida oʻrnini eʼtiborga olib, milliy va umuminsoniy qadriyatlarni, xalqimizning boy tarixiy-ilmiy, adabiy merosini, jahon adabiyoti va madaniyati yutuqlarini targʻib etish hamda jamiyatimizda amalga oshirilayotgan islohotlarni yoritishda ijodkor ziyolilarning salohiyatidan yanada samarali foydalanish borasidagi faoliyatini moddiy jihatdan qoʻllab-quvvatlash maqsadida Vazirlar Mahkamasi qaror qiladi:

1. Gazeta muassislari — Madaniyat ishlari vazirligi (F. Zokirov), Oʻzbekiston Yozuvchilar uyushmasi (A. Oripov), noshir — “Sharq” nashriyot-matbaa aksiyadorlik kompaniyasi (B. Alimov) tahririyatning moddiy-texnik ahvolini yaxshilash, ijodiy jamoasini yosh, iqtidorli kuchlar bilan mustahkamlash va xodimlar uchun zarur ish sharoiti yaratishga qaratilgan tadbirlar rejasini bir oy muddatda ishlab chiqsinlar va amalga oshirsinlar.

2. Toshkent shahar hokimligi (R. Shoabdurahmonov) Matbuotchilar koʻchasi, 32-uyda joylashgan tahririyat xizmat xonalarini joriy taʼmirlashni amalga oshirsin.

3. Oʻzbekiston Respublikasi Moliya vazirligi (M. Nurmurodov) 2004-yilda gazeta tahririyatiga bosmaxona qogʻozi, kompyuterlar va boshqa texnik jihozlar olish va xodimlarni moddiy jihatdan qoʻllab-quvvatlash uchun Vazirlar Mahkamasining zaxira jamgʻarmasi hisobidan 60 mln soʻm mablagʻ ajratsin.

4. Gazeta tahririyatiga ijodiy xodimlar va mualliflarga qalam haqini shartnoma asosida hamda kelishilgan narxlarda ish haqi fondiga ajratiladigan mablagʻlar doirasida toʻlashga ruxsat berilsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A. A. Azizxoʻjayev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2004-yil 2-iyul,

308-son