Oʻzbekiston Respublikasi hududida respublika va xalqaro sport musobaqalarini oʻtkazish vaqtida Oʻzbekiston Respublikasining Davlat madhiyasini ijro etish qoidalarini tasdiqlash toʻgʻrisida (2533-son)

03.12.2013

OʻZBEKISTON RESPUBLIKASI MADANIYAT VA SPORT ISHLARI VAZIRINING

buyrugʻi

[Oʻzbekiston Respublikasi Adliya vazirligi tomonidan 2013-yil 3-dekabrda roʻyxatdan oʻtkazildi, roʻyxat raqami 2533]

“Oʻzbekiston Respublikasining Davlat madhiyasi toʻgʻrisida”gi Oʻzbekiston Respublikasining Qonuni (Oʻzbekiston Respublikasi Oliy Kengashining Axborotnomasi, 1993-y., 1-son, 52-modda) va Oʻzbekiston Respublikasi Prezidentining 2013-yil 15-iyuldagi PQ-2003-son “Qonunlarning havolaki normalarini amalga oshirishga qaratilgan normativ-huquqiy va boshqa hujjatlarni ishlab chiqish rejalarini tasdiqlash toʻgʻrisida”gi qaroriga muvofiq buyuraman:

1. Oʻzbekiston Respublikasi hududida respublika va xalqaro sport musobaqalarini oʻtkazish vaqtida Oʻzbekiston Respublikasining Davlat madhiyasini ijro etish qoidalari ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Vazir M. XODJIMATOV

Toshkent sh.,

2013-yil 2-dekabr,

1256-son

Oʻzbekiston Respublikasi madaniyat va sport ishlari vazirining 2013-yil 3-dekabrdagi 1256-son buyrugʻiga ILOVA

Oʻzbekiston Respublikasi hududida respublika va xalqaro sport musobaqalarini oʻtkazish vaqtida Oʻzbekiston Respublikasining Davlat madhiyasini ijro etish

QOIDALARI

Mazkur Qoidalar “Oʻzbekiston Respublikasining Davlat madhiyasi toʻgʻrisida”gi Oʻzbekiston Respublikasining Qonuni (Oʻzbekiston Respublikasi Oliy Kengashining Axborotnomasi, 1993-y., 1-son, 52-modda) va Oʻzbekiston Respublikasi Prezidentining 2013-yil 15-iyuldagi PQ-2003-son (Oʻzbekiston Respublikasi qonun hujjatlari toʻplami, 2013-y., 29-son, 373-modda) “Qonunlarning havolaki normalarini amalga oshirishga qaratilgan normativ-huquqiy va boshqa hujjatlarni ishlab chiqish rejalarini tasdiqlash toʻgʻrisida”gi qaroriga muvofiq, Oʻzbekiston Respublikasi hududida respublika va xalqaro sport musobaqalarini oʻtkazish vaqtida Oʻzbekiston Respublikasining Davlat madhiyasini (bundan buyon matnda Davlat madhiyasi deb yuritiladi) ijro etish tartibini belgilaydi.

I bob. Umumiy qoidalar

1. Sport musobaqalarini oʻtkazish vaqtida Davlat madhiyasining ijro etilishi musobaqa tashkilotchilari tomonidan taʼminlanadi. Bunda sport musobaqalari deganda, musobaqaning gʻolibi va sovrindorlarini aniqlash maqsadida sportning har xil turlari boʻyicha sportchilar yoki sport jamoalari oʻrtasida oʻtkaziladigan bellashuv tushuniladi.

2. Davlat madhiyasi “Oʻzbekiston Respublikasining Davlat madhiyasi toʻgʻrisida”gi Oʻzbekiston Respublikasining Qonuni bilan tasdiqlangan matni va musiqaviy tahririga aynan muvofiq holda ijro etilishi lozim.

3. Sport musobaqalarini oʻtkazish vaqtida Davlat madhiyasini qisqartirib ijro etilishiga yoʻl qoʻyiladi. Bunda Davlat madhiyasining boshlanishi va naqorat bir martadan aytiladi.

II bob. Davlat madhiyasini ijro etish

4. Davlat madhiyasi Oʻzbekiston Respublikasi chempionatlarini, milliy terma komandalar ishtirokida xalqaro sport musobaqalarini oʻtkazish vaqtida hamda xalqaro sport musobaqalarining Oʻzbekiston Respublikasi sport terma komandalarining vakillari boʻlgan gʻoliblarini mukofotlash marosimlarini oʻtkazish vaqtida ijro etiladi.

5. Davlat madhiyasi tik turib va oʻng qoʻl kaftini koʻkrakning chap tomoniga qoʻyib davlat bayrogʻiga yuzini burgan holda kuylanadi (tinglanadi).

6. Xalqaro sport musobaqalarini oʻtkazish vaqtida Oʻzbekiston Respublikasining Davlat madhiyasini ijro etish marosimi xalqaro sport tashkilotlarining mavjud amaliyotini inobatga olgan holda belgilanadi.

III bob. Yakuniy qoidalar

7. Mazkur Qoidalar talablarining buzilishida aybdor boʻlgan shaxslar qonunchilik hujjatlarida belgilangan tartibda javobgarlikka tortiladi.

8. Mazkur Qoidalar Oʻzbekiston Respublikasi Tashqi ishlar vazirligi, Mudofaa vazirligi, Ichki ishlar vazirligi, Xalq taʼlimi vazirligi va Oʻzbekiston Mudofaasiga koʻmaklashuvchi “Vatanparvar” tashkiloti Markaziy Kengashi bilan kelishilgan.

Tashqi ishlar vaziri A. KAMILOV

2013-yil 29-noyabr

Mudofaa vaziri Q. BERDIYEV

2013-yil 29-noyabr

Ichki ishlar vaziri B. MATLYUBOV

2013-yil 29-noyabr

Xalq taʼlimi vaziri U. INOYATOV

2013-yil 29-noyabr

Oʻzbekiston Mudofaasiga koʻmaklashuvchi “Vatanparvar” tashkiloti Markaziy Kengashi raisi R. NIYAZOV

2013-yil 29-noyabr