“Bobur” OAJ ishlab chiqarish maydonlarida avtomobil sanoati investitsiya loyihalarini amalga oshirish toʻgʻrisida (44-son)

16.02.2009

Oʻzbekiston Respublikasi Vazirlar Mahkamasining

qarori

[Koʻchirma]

Respublika avtomobil sanoati uchun butlovchi buyumlar ishlab chiqarish boʻyicha yangi korxonalar tashkil etish hamda “Bobur” OAJning Andijon shahridagi ishlatilmayotgan ishlab chiqarish maydonlaridan oqilona foydalanilishini taʼminlash maqsadida Vazirlar Mahkamasi qaror qiladi:

1. “Bobur” OAJning kreditorlari yigʻilishida maydoni 55 ming kv metr boʻlgan 2-pardozlash-boʻyash fabrikasi sifatidagi mulkiy kompleksining bir qismini tutash yer uchastkasi, muhandislik inshootlari, kommunikatsiyalari va asbob-uskunalari bilan birga 5,6 mlrd soʻmga “Oʻzavtosanoat” aksiyadorlik kompaniyasiga sotish toʻgʻrisida qaror qabul qilinganligi maʼlumot uchun qabul qilinsin.

2. “Oʻzavtosanoat” aksiyadorlik kompaniyasining “Bobur” OAJning 2-pardozlash-boʻyash fabrikasi maydonlarida 2009 — 2012-yillar davrida “Jeneral Motors Oʻzbekiston” YoAJ va “SamAvto” MChJ mahsulotlari uchun butlovchi buyumlar ishlab chiqarish boʻyicha ilovaga* muvofiq beshta korxona tashkil etish toʻgʻrisidagi taklifiga rozilik berilsin.

* Ilova rus tilidagi matnda berilgan.

3. “Oʻzavtosanoat” aksiyadorlik kompaniyasi:

manfaatdor vazirliklar, idoralar va tijorat banklari bilan birgalikda, loyihalashtirish institutlarini va xorijiy sheriklarning muhandislik markazlarini jalb etgan holda ushbu qarorga muvofiq amalga oshiriladigan loyihalar boʻyicha taʼsis va loyihaoldi hujjatlari oʻz vaqtida ishlab chiqilishini, kelishib olinishini va belgilangan tartibda tasdiqlanishini taʼminlasin;

“Oʻzbekyengilsanoat” davlat-aksiyadorlik kompaniyasi, “Oʻzengsanloyiha” MChJ va tugatuvchi boshqaruvchi bilan birgalikda bir oy muddatda “Bobur” OAJ 2-pardozlash-boʻyash fabrikasining mavjud asbob-uskunalarini ularni toʻqimachilik tarmogʻining boshqa korxonalarida foydalanish imkoniyati yuzasidan xatlovdan oʻtkazsin hamda uning yakunlariga koʻra koʻrsatib oʻtilgan asbob-uskunalarni sotish yoki belgilangan tartibda hisobdan chiqarish toʻgʻrisida qaror qabul qilsin.

4. “Oʻzavtosanoat” aksiyadorlik kompaniyasi mol-mulkni ushbu qarorni amalga oshirish doirasida tashkil etiladigan avtomobil sanoati korxonalari ustav fondiga ulush sifatida berishda foyda soligʻidan va qoʻshilgan qiymat soligʻidan ozod qilinsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov hamda Oʻzbekiston Respublikasi Bosh vazirining oʻrinbosari U.U. Rozuqulov zimmasiga yuklansin.

Oʻzbekiston Respublikasining Prezidenti I. KARIMOV

Toshkent sh.,

2009-yil 16-fevral,

44-son