2004-yil hosili uchun boshoqli don ekinlarini kuzgi ekishni oʻtkazish chora-tadbirlari, don yetishtirish va xarid qilish hajmlari toʻgʻrisida (431-son)
06.10.2003
Oʻzbekiston Respublikasi Vazirlar Mahkamasining
qarori
[Koʻchirma]
Boshoqli don ekinlarini navlar boʻyicha oqilona joylashtirish, kuzgi don ekishni oʻz vaqtida va sifatli oʻtkazishda qishloq xoʻjaligi korxonalarini qoʻllab-quvvatlash, shuningdek kontraktatsiya shartnomalarining bajarilishini taʼminlash maqsadida Vazirlar Mahkamasi qaror qiladi:
1. Qoraqalpogʻiston Respublikasi Vazirlar Kengashi va viloyatlar hokimliklarining qishloq xoʻjaligi korxonalari tomonidan tayyorlov tashkilotlari bilan tuzilgan kontraktatsiya shartnomalarini umumlashtirish asosida tayyorlangan:
2004-yil hosili uchun boshoqli don ekinlarining tezpishar va serhosil navlarini 1-ilovaga muvofiq joylashtirish toʻgʻrisidagi;
2004-yil hosili uchun boshoqli don yetishtirishning 2-ilovaga muvofiq prognoz hajmlari toʻgʻrisidagi;
2004-yil hosilidan 3 va 4-ilovalarga muvofiq yuqori sifatli boshoqli don ekinlari urugʻligi tayyorlash va yetkazib berish hajmlari toʻgʻrisidagi takliflari qabul qilinsin.
2. Belgilansinki, davlat don xaridlari hajmi amalda yetishtirilgan don hajmining 50 foizidan oshmasligi kerak. Xoʻjaliklar ixtiyorida qoladigan don davlat ehtiyojlari uchun faqat qishloq xoʻjaligi korxonalarining roziligi bilan shartnomaviy narxlarda xarid qilinishi mumkin.
3. “Oʻzdonmahsulot” davlat korporatsiyasi:
Oʻzbekiston Respublikasi Qishloq va suv xoʻjaligi vazirligi, Qoraqalpogʻiston Respublikasi Vazirlar Kengashi hamda viloyatlar hokimliklari bilan birgalikda 2004-yil hosilidan 3 va 4-ilovalarga muvofiq hajmda boshoqli don ekinlarining yuqori sifatli urugʻlari tayyorlanishini taʼminlasin;
2003-yil 1-noyabrgacha 2004-yil hosilidan davlat ehtiyojlari uchun boshoqli ekinlar doni xarid qilish yuzasidan kontraktatsiya shartnomalari tuzilishini taʼminlasin;
2004-yil don hosili uchun xarid narxlari tasdiqlangungacha, davlat ehtiyojlari uchun xarid qilinadigan boshoqli ekinlar doni yetishtirish uchun texnologiya kartalari boʻyicha muddatlar va xarajatlarga muvofiq 2003-yilgi don hosili uchun shakllangan oʻrtacha preyskurant va shartnomaviy narxlar boʻyicha bosqichma-bosqich avans berib borsin;
2004-yil hosili uchun respublikaning elita-urugʻchilik xoʻjaliklari buyurtmanomalariga binoan boshoqli don ekinlarining 900 tonna superelita urugʻlari xorijiy ilmiy muassasalardan olib kelinishini taʼminlasin.
4. Kuzgi ekishga boshoqli don ekinlarining sifatli, kalibrlangan, sertifikatlangan urugʻlarini tayyorlash hamda asosan birinchi reproduksiyali urugʻlar ekilishi uchun shaxsiy javobgarlik Qoraqalpogʻiston Respublikasi Vazirlar Kengashining Raisi, viloyatlar va tumanlar hokimlari, “Oʻzdonmahsulot” davlat korporatsiyasi raisi zimmasiga yuklansin.
Boshoqli don ekinlarini kuzgi ekishni oʻtkazish natijalari toʻgʻrisida 2003-yil 1-dekabrgacha Vazirlar Mahkamasiga axborot berilsin.
5. “Oʻzdonmahsulot” davlat korporatsiyasi tomonidan olib kelinayotgan bugʻdoyning 900 tonna hajmidagi superelita urugʻlari bojxona toʻlovlaridan (bojxonada rasmiylashtirish uchun yigʻimlardan tashqari) ozod qilinsin.
6. “Oʻzkimyosanoat” va “Oʻzqishloqxoʻjalikkimyo” kompaniyalari tuzilgan shartnomalarga asosan, texnologiya kartalari talablaridan kelib chiqib, gʻalla ekuvchi xoʻjaliklarga mineral oʻgʻitlar, gerbitsidlar va boshqa kimyoviy preparatlarning oʻz vaqtida yetkazib berilishini taʼminlasinlar.
7. “Oʻzagromashservis” uyushmasi, “Oʻzqishloqxoʻjalikmash-xolding” va “Oʻzneftmahsulot” kompaniyalari tuzilgan shartnomalarga asosan:
kuzgi don ekishda, yerlarni haydashda, haydov traktorlari va seyalkalarni tayyorlashda, ularga ehtiyot qismlar, uzellar va agregatlar keltirishda qishloq xoʻjaligi kooperativlariga (shirkat xoʻjaliklariga), fermer va boshqa gʻalla ekuvchi xoʻjaliklarga amaliy yordam koʻrsatish;
belgilangan limitlar doirasida neft mahsulotlari qiymatining 30 foizi oldindan toʻlangandan keyin ularni oʻz vaqtida va uzluksiz yetkazib berish boʻyicha zarur chora-tadbirlarni amalga oshirsin.
8. Oʻzbekiston Respublikasi Qishloq va suv xoʻjaligi vazirligi, Moliya vazirligi, Oʻzbekiston qishloq xoʻjaligi ilmiy-ishlab chiqarish markazi non pishirish xususiyatlari boʻyicha boshoqli don ekinlari mahalliy navlarining yuqori hosilli, qurgʻoqchilikka bardoshli va yuqori sifatli navlarini chiqargan seleksiyachilar va originatorlarni ragʻbatlantirish mexanizmini bir oy muddatda ishlab chiqsin va tasdiqlasin.
9. Mazkur qarorning bajarilishini nazorat qilish Oʻzbekiston Respublikasi Prezidentining Davlat maslahatchisi I.H. Joʻrabekov va Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
2003-yil 6-oktabr,
431-son
Vazirlar Mahkamasining 2003-yil 6-oktabrdagi 431-son qaroriga 1-ILOVA
2004-yil hosili uchun boshoqli don ekinlarini navlar boʻyicha joylashtirish
Vazirlar Mahkamasining 2003-yil 6-oktabrdagi 431-son qaroriga 2-ILOVA
2004-yil hosili uchun boshoqli don ekinlari yetishtirish prognoz hajmlari
Vazirlar Mahkamasining 2003-yil 6-oktabrdagi 431-son qaroriga 3-ILOVA
2004-yilda “Oʻzdonmahsulot” korporatsiyasi korxonalari tomonidan boshoqli don ekinlari urugʻi tayyorlash
hajmi
Vazirlar Mahkamasining 2003-yil 6-oktabrdagi 431-son qaroriga 4-ILOVA
2004-yilda “Oʻzdonmahsulot” korporatsiyasi korxonalari tomonidan sugʻoriladigan yerlar uchun boshoqli don ekinlari urugʻi yetkazib berish
hajmi