Buxoro shahridagi “Qabullar uyi” qurilishini tugallash chora-tadbirlari toʻgʻrisida (32-son)

22.01.2004

Oʻzbekiston Respublikasi Vazirlar Mahkamasining

qarori

Buxoro shahridagi “Qabullar uyi” qurilishini oʻz vaqtida tugallash va foydalanishga topshirishni taʼminlash maqsadida Vazirlar Mahkamasi qaror qiladi:

1. Buxoro viloyati hokimi S.Q. Xusenovning eʼtibori Buxoro shahridagi “Qabullar uyi”ni qurish va foydalanishga topshirish muddatlarining yoʻl qoʻyib boʻlmaydigan darajada choʻzilib ketganligiga qaratilsin.

2. Quyidagilar:

2004-yil may oyi — “Qabullar uyi” qurilishini tugallashning oxirgi muddat etib;

Buxoro viloyati hokimligining kapital qurilish boʻyicha injiniring kompaniyasi — qurilish buyurtmachisi etib;

“Buxoro ELITI” aksiyadorlik jamiyati — bosh loyihalovchi etib;

“Buxorojamoaqurilish” ochiq turdagi aksiyadorlik jamiyatining 47-xoʻjaliklararo koʻchma mexanizatsiyalashgan kolonnasi bosh pudratchi qurilish tashkiloti etib belgilansin.

3. Qurilish muddatlarining tigʻizligini hisobga olib, istisno tariqasida:

pardozlash va maxsus montaj ishlarini bajarish yuzasidan tanlov savdolari oʻtkazmasdan “AREAS” firmasi (Turkiya) bilan kontrakt tuzishga;

obyekt qurilishini, texnik-iqtisodiy hisoblarni belgilangan tartibda ekspertizadan oʻtkazilgan holda, ushbu hisoblarni ishlab chiqish bilan bir vaqtda amalga oshirishga ruxsat etilsin.

4. Oʻzbekiston Respublikasi Moliya vazirligi va Iqtisodiyot vazirligi Buxoro shahridagi “Qabullar uyi” qurilishini tugallash uchun respublika boʻyicha kapital qoʻyilmalarning 2004-yilga moʻljallangan umumiy limitlari hisobidan budjet mablagʻlari hisobiga Buxoro viloyati hokimligiga kapital qoʻyilmalar limitlari ajratilishini, keyinchalik ushbu mablagʻ Buxoro viloyati hokimligi budjetining prognozdagidan ortiqcha daromadlari hisobiga, yetishmagan qismi esa — respublika budjeti mablagʻlari hisobiga joriy yilning II yarim yilligida tiklanishini nazarda tutsinlar.

5. “Buxorojamoaqurilish” ochiq turdagi aksiyadorlik jamiyatining 47-xoʻjaliklararo koʻchma mexanizatsiyalashgan kolonnasi va “AREAS” firmasi tuzilgan kontraktlar boʻyicha respublikaga keltiriladigan respublikada ishlab chiqarilmaydigan asbob-uskunalar va qurilish materiallari uchun bojxona toʻlovlari (bojxona rasmiylashtiruvi yigʻimlaridan tashqari) toʻlashdan “Qabullar uyi” qurilishi davrida istisno tariqasida ozod qilinsin.

6. Oʻzbekiston Respublikasi Moliya vazirligi Buxoro viloyati hokimligi bilan birgalikda Buxoro shahridagi “Qabullar uyi” binosidan zarur darajada foydalanilishini taʼminlash uchun “Qabullar uyi” xodimlarining cheklangan sonini belgilasin va ularni mahalliy budjet mablagʻlari hisobiga taʼminlash uchun zarur mablagʻlarni nazarda tutsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari K.N. Toʻlaganov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2004-yil 22-yanvar,

32-son