Tadbirkorlik subyektlarini Internet tarmogʻi orqali davlat roʻyxatidan oʻtkazish mexanizmini joriy etish chora-tadbirlari toʻgʻrisida (312-son)

25.11.2013

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Ishbilarmonlik muhitini yanada tubdan yaxshilash va tadbirkorlikka keng erkinlik berish chora-tadbirlari toʻgʻrisida” 2012-yil 18-iyuldagi PF-4455-son Farmoniga muvofiq, shuningdek tadbirkorlik subyektlari uchun yanada qulay shart-sharoitlar yaratish, roʻyxatdan oʻtkazish tartibotlarini amalga oshirishni elektron tizimga oʻtkazishni taʼminlash maqsadida Vazirlar Mahkamasi qaror qiladi:

1. 2014-yil 1-yanvardan boshlab tadbirkorlik subyektlarini Internet tarmogʻi orqali davlat roʻyxatidan oʻtkazish mexanizmi (keyingi oʻrinlarda elektron roʻyxatdan oʻtkazish deb ataladi) joriy etilsin.

2. Belgilansinki:

elektron roʻyxatdan oʻtkazish taʼsis hujjatlarini masofadan turib va interaktiv rasmiylashtirish yoʻli bilan namunaviy shakllar asosida tayyorlash imkoniyati boʻlgan Oʻzbekiston Respublikasi interaktiv davlat xizmatlari yagona portali orqali amalga oshiriladi;

elektron roʻyxatdan oʻtkazishda zarur hujjatlarni ilova qilgan holda roʻyxatdan oʻtkazishga ariza berish, shuningdek roʻyxatdan oʻtkazilgan taʼsis hujjatlarini va tadbirkorlik subyektlarining davlat roʻyxatidan oʻtkazilganligi toʻgʻrisidagi guvohnomani berish elektron raqamli imzodan foydalangan holda amalga oshiriladi;

kredit tashkilotlarini davlat roʻyxatidan oʻtkazish qonun hujjatlarida belgilangan tartibda amalga oshiriladigan kredit tashkilotlariga tatbiq etilmaydi.

3. Oʻzbekiston Respublikasi Davlat soliq qoʻmitasi va Davlat statistika qoʻmitasi 2014-yil 1-yanvargacha boʻlgan muddatda barcha roʻyxatdan oʻtkazuvchi organlarga ularning Internet tarmogʻidagi tegishli idoraviy saytlaridan foydalangan holda real vaqt rejimida tadbirkorlik subyektlariga soliq toʻlovchining identifikatsiya raqami (STIR) va KTUT kodi berilishi imkoniyatini bersinlar.

4. Belgilansinki, elektron roʻyxatdan oʻtkazish mexanizmini joriy etish va takomillashtirishga doir ishlarni moliyalashtirish Vazirlar Mahkamasining 2013-yil 25-yanvardagi 18-son qarori bilan tasdiqlangan Axborot-kommunikatsiya texnologiyalarini joriy qilish va rivojlantirish boʻyicha loyihalarni amalga oshirish uchun davlat buyurtmasini shakllantirish va moliyalashtirish tartibi toʻgʻrisidagi Nizomga muvofiq, shuningdek qonun hujjatlarida taqiqlanmagan boshqa mablagʻlar hisobiga amalga oshiriladi.

5. Oʻzbekiston Respublikasi Savdo-sanoat palatasi, Adliya vazirligi, Davlat soliq qoʻmitasi, Axborot texnologiyalari va kommunikatsiyalarini rivojlantirish vazirligi, Davlat statistika qoʻmitasi elektron roʻyxatdan oʻtkazish yangi mexanizmining amalda qoʻllanishi monitoringini taʼminlasinlar va hisobot choragi yakunlari boʻyicha Vazirlar Mahkamasiga uning faoliyat koʻrsatishi toʻgʻrisida, shuningdek uni yanada takomillashtirish boʻyicha takliflar kiritsinlar.

6. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

7. Vazirliklar va idoralar bir oy muddatda oʻz idoraviy normativ-huquqiy hujjatlarini ushbu qarorga muvofiqlashtirsinlar.

8. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2013-yil 25-noyabr,

312-son

Vazirlar Mahkamasining 2013-yil 25-noyabrdagi 312-son qaroriga ILOVA

Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar

1. Vazirlar Mahkamasining 2003-yil 20-avgustdagi 357-son qarori (Oʻzbekiston Respublikasi QT, 2003-y., 8-son, 72-modda) bilan tasdiqlangan Tadbirkorlik subyektlarini davlat roʻyxatidan oʻtkazish, hisobga qoʻyish va ruxsat beruvchi hujjatlarni rasmiylashtirish tartibi toʻgʻrisidagi Nizomda:

a) 11-bandning birinchi xatboshidagi “(shaxsan kelib yoki pochta orqali)” soʻzlari “(shaxsan kelib, pochta aloqasi vositasida yoki Internet tarmogʻi orqali)” soʻzlari bilan almashtirilsin;

b) quyidagi mazmundagi 111-band qoʻshilsin:

“111. Tadbirkorlik subyektlarini davlat roʻyxatidan oʻtkazish uchun ushbu Nizomda nazarda tutilgan hujjatlar, 12-bandning “g” kichik bandi toʻrtinchi xatboshida va 72-bandning beshinchi xatboshida koʻrsatilganlar bundan mustasno, shu jumladan bir vaqtning oʻzida ruxsat beruvchi hujjatlar rasmiylashtirilgan holda Internet tarmogʻi orqali bir nusxada taqdim etiladi va ariza beruvchining elektron raqamli imzosi bilan imzolanadi. Qogʻozda rasmiylashtirilgan va (yoki) berilgan skaner qilingan hujjatlarni taqdim etishga yoʻl qoʻyiladi.

Mansubligiga koʻra roʻyxatdan oʻtkazuvchi organ, foydalanish tashkilotlari, “Ergeodezkadastr” davlat qoʻmitasining tegishli hududiy xizmati, tuman (shahar) hokimligi tomonidan berilgan, ushbu Nizomda nazarda tutilgan elektron hujjatlar mavjud boʻlgan taqdirda, ariza beruvchi ularning asl nusxalarini Internet tarmogʻi orqali taqdim etishga haqlidir”;

v) 16, 17, 72-bandlarning birinchi xatboshlaridagi “kelgan holda yoki pochta aloqasi orqali” soʻzlari “kelgan holda, pochta aloqasi vositasida yoki Internet tarmogʻi orqali” soʻzlari bilan almashtirilsin;

g) 22-band quyidagi tahrirda bayon qilinsin:

“22. Roʻyxatdan oʻtkazuvchi organ tadbirkorlik subyektiga Davlat soliq qoʻmitasi va Davlat statistika qoʻmitasining tegishli idoraviy saytlaridan foydalanib real vaqt rejimida Internet tarmogʻidan olingan STIR va XTUT kodlarini beradi.

Roʻyxatdan oʻtkazuvchi organlar davlat roʻyxatidan oʻtkazish amalga oshirilgan kundan boshlab bir kun mobaynida tadbirkorlik subyekti joylashgan joy boʻyicha davlat reyestridan olingan uning toʻgʻrisidagi maʼlumotlarni ushbu Nizomga 4-ilovaga muvofiq shakl boʻyicha:

yuridik shaxslar boʻyicha — statistika va soliq organlariga, aksiyadorlik jamiyatlari hisoblangan yuridik shaxslar boʻyicha esa, — shuningdek qimmatli qogʻozlar bozorini tartibga solish boʻyicha vakolatli davlat organiga ham;

yuridik shaxs boʻlmagan yakka tadbirkorlar va dehqon xoʻjaliklari boʻyicha — soliq organiga rasman taqdim etadilar”;

d) 23-bandda:

ikkinchi xatboshidagi “ularga soliq toʻlovchining identifikatsiya raqamini beradi hamda uni statistika va roʻyxatdan oʻtkazuvchi organlarga rasman maʼlum qiladi” soʻzlari chiqarib tashlansin;

uchinchi xatboshi quyidagi tahrirda bayon qilinsin:

“davlat statistika organlari — roʻyxatdan oʻtkazuvchi organ tomonidan berilgan statistika kodlarini tekshiradi va yuridik shaxsni Korxonalar va tashkilotlarning yagona davlat registriga kiritadi”;

e) 54-bandga quyidagi mazmundagi xatboshilar qoʻshilsin:

“Tadbirkorlik subyektlariga elektron shaklda berilgan hujjatlar roʻyxatdan oʻtkazuvchi organ, foydalanish tashkilotlari, “Ergeodezkadastr” davlat qoʻmitasining tegishli hududiy xizmati, tuman (shahar) hokimligi vakolatli shaxsining tegishli elektron raqamli imzosi bilan imzolanadi. Bunda ariza beruvchi, shuningdek oʻz soʻrovi boʻyicha shaxsan kelib yoki pochta aloqasi orqali qogʻozlarda rasmiylashtirilgan tegishli hujjatlarni olish huquqiga ham ega.

Ariza beruvchi tomonidan tegishli elektron hujjatlar Oʻzbekiston Respublikasi Interaktiv davlat xizmatlari yagona portalida foydalanuvchining shaxsiy xonasi orqali olingan kun ushbu bandda nazarda tutilgan hujjatlar berilgan sana deb hisoblanadi, shaxsiy xonasi borligi toʻgʻrisida ariza beruvchi roʻyxatdan oʻtkazuvchi organga maʼlum qiladi”;

j) 57-band quyidagi tahrirda bayon qilinsin:

“57. Bank hisob raqamlarini ochish Oʻzbekiston Respublikasi Markaziy banki tomonidan belgilangan tartibda amalga oshiriladi”;

z) 761-bandning birinchi xatboshidagi “uning dublikati berilishi mumkin” soʻzlari “uning dublikati beriladi, shu jumladan elektron shaklda beriladi. Bunda oldin elektron shaklda berilgan davlat roʻyxatidan oʻtkazish toʻgʻrisidagi guvohnoma haqiqiy emas deb hisoblanadi” soʻzlari bilan almashtirilsin.

2. Vazirlar Mahkamasining 2004-yil 2-sentabrdagi 413-son qarori (Oʻzbekiston Respublikasi QT, 2004-y., 9-son, 89-modda) bilan tasdiqlangan Tijorat faoliyati uchun tovarlarni olib keluvchi yuridik shaxs boʻlmagan yakka tartibdagi tadbirkorlarni davlat roʻyxatidan oʻtkazish, hisobga qoʻyish tartibi toʻgʻrisidagi Nizomda:

a) 2-band quyidagi tahrirda bayon qilinsin:

“2. Yakka tadbirkorni davlat roʻyxatidan oʻtkazish jismoniy shaxs yashaydigan joy boʻyicha davlat soliq inspeksiyasida shaxsan kelib yoki Internet tarmogʻi orqali amalga oshiriladi.

Ushbu Nizomda nazarda tutilgan hujjatlar yakka tadbirkorni Internet tarmogʻi orqali davlat roʻyxatidan oʻtkazish uchun taqdim etilgan taqdirda ular ariza beruvchining elektron raqamli imzosi bilan imzolanadi. Qogʻozlarda rasmiylashtirilgan va (yoki) berilgan skaner qilingan hujjatlarni taqdim etishga yoʻl qoʻyiladi”;

b) 4-bandda:

birinchi xatboshidagi “(shaxsan kelib)” soʻzlari “(shaxsan kelib yoki Internet tarmogʻi orqali)” soʻzlari bilan almashtirilsin;

yettinchi xatboshi quyidagi tahrirda bayon qilinsin: “Ariza berilayotganda pasport koʻrsatiladi, yakka tadbirkorni Internet tarmogʻi orqali davlat roʻyxatidan oʻtkazish hollari bundan mustasno”;

v) 6-bandga quyidagi mazmundagi xatboshilar qoʻshilsin:

“Yakka tadbirkorga elektron shaklda beriladigan hujjatlar, ushbu bandning uchinchi xatboshida nazarda tutilgan hujjatlar bundan mustasno, davlat soliq inspeksiyasi vakolatli shaxsining elektron raqamli imzosi bilan imzolanadi. Bunda ariza beruvchi, shuningdek oʻz soʻroviga koʻra qogʻozlarda rasmiylashtirilgan tegishli hujjatlarni shaxsan kelib olishga ham haqlidir.

Ariza beruvchi tomonidan tegishli elektron hujjatlar Oʻzbekiston Respublikasi Interaktiv davlat xizmatlari yagona portalida foydalanuvchining shaxsiy xonasi orqali olingan kun ushbu bandda nazarda tutilgan hujjatlar berilgan sana deb hisoblanadi, shaxsiy xonasi borligi toʻgʻrisida ariza beruvchi davlat soliq inspeksiyasiga maʼlum qiladi”.