Tumandagi yuridik va jismoniy shaxslarga tegishli avtotransport vositalarini va tirkama-ulamalarini davlat majburiy texnik koʻrigidan oʻtkazish haqida (195-Q-son)

10.05.2012

Samarqand viloyati Nurobod tumani hokimining

Qarori

Oʻzbekiston Respublikasi Vazirlar Mahkamasining 2003-yil 31-yanvardagi 54-sonli “Transport vositalarini majburiy texnik koʻrikdan oʻtkazish tartibi toʻgʻrisidagi Nizomni tasdiqlash haqida”gi qaroriga asosan hamda tuman Ichki ishlar boʻlimining 2012-yil 26-yanvardagi tuman hududidagi xoʻjalik, korxona, tashkilot, muassasa, kichik korxona hamda fuqarolarga tegishli boʻlgan avtotransport vositalarini mavsumiy texnik koʻrikdan oʻtkazish toʻgʻrisidagi xatini koʻrib chiqib, qaror qilaman:

1. Tumandagi Ichki Ishlar boʻlimi boshligʻi R. Davirovga tumandagi yuridik va jismoniy shaxslarga tegishli avtotransport vositalarini va tirkama-ulamalarini davlat majburiy texnik koʻrigidan oʻtkazish yuklatilsin.

2. Mulkchilik shakli va sigʻimidan qatʼi nazar, yoʻlovchi tashish bilan shugʻullanuvchi transport vositalarining majburiy texnik koʻrigi bir yilda ikki marta:

Jumladan, birinchi marta 1-martdan 30-iyungacha;

ikkinchi marta 1-sentabrdan 31-oktabrgacha oʻtkazilishini tashkillashtirilsin.

2012-yilning 1-martidan 30-iyunigacha tumandagi yuridik shaxslarga tegishli avtotransport vositalari ilovaga* asosan texnik koʻrikdan oʻtkazilsin.

Tumandagi jismoniy shaxslarga tegishli boʻlgan barcha turdagi shaxsiy transport vositalari 1-yanvardan 31-avgustga qadar texnik koʻrikdan oʻtkazilsin.

3. Texnik koʻrikdan oʻtkazishda:

barcha transport vositalarining texnik holatini tekshirishda ularni tayyorlagan zavod koʻrsatmalariga asosan ishlatish qoida qoʻllanmalari har bir harakatlanish qismini talabga javob berilishi;

korxona va tashkilot rahbarlaridan yoʻl harakati qoidalarida koʻrsatilgandek, transport vositalaridan foydalanishni taqiqlovchi shartlarga asosan texnik soz holda taʼminlanishini;

maxsus mashinalar, harakatlanuvchi taʼmirlash va tuzatish ustaxonalarining jihozlanganligiga alohida eʼtibor berish topshirilsin.

4. Tuman ichki ishlar boʻlimi boshligʻi (R. Davirov) va tuman davlat texnika nazorati inspeksiyasi bosh muhandis inspektori (M. Urunov)larga har bir agrofirmalar va tashkilot, muassasalardagi transport vositalarini texnik koʻrikdan oʻtkazilishi boʻyicha ilovaga* asosan tasdiqlangan reja jadvalni tashkilot rahbarlariga yetkazish va oʻz vaqtida bajarilishini taʼminlash yuklatilsin.

*Ilova berilmaydi.

5. Har bir tashkilot, muassasa rahbarlari va shaxsiy avtomashina egalari zimmasiga:

avtoulovlarni texnik pasporti bilan birgalikda texnik koʻrikdan oʻtkazilishini, ularning texnik jihatdan sozligini va oʻz vaqtida reja jadvali asosida koʻrikdan oʻtkazish majburiyati bajarilishini;

agrofirmalar, tashkilot, muassasalar rahbarlariga alohida tartib oʻrnatish va xalq xoʻjaligi hisobida boʻlgan ishga yaroqsiz, tiklanmaydigan va ishlatilmaydigan mashinalarni hisobdan chiqarish choralarini texnik koʻrikka qadar koʻrib chiqish vazifalari yuklatilsin.

6. Oʻzbekiston Respublikasi Vazirlar Mahkamasining 2003-yil 31-yanvardagi 54-sonli “Transport vositalarini majburiy texnik koʻrikdan oʻtkazish tartibi toʻgʻrisida nizomni tasdiqlash haqida”gi qarori 3-bandi talablaridan kelib chiqib tuman mudofaa boʻlimi, ichki ishlar boʻlimi va Milliy xavfsizlik xizmati harbiy boʻlinmalari transport vositalari majburiy texnik koʻriklari oʻz yuqori tashkilotlarining qarori va ish rejasi asosida amalga oshirilishi nazarda tutilsin.

7. Yillik texnik koʻrikni amalga oshirish maqsadida IIB yoʻl harakat xavfsizligi katta inspektori, mayor Sh. Sharipov, mudofaa ishlari boʻlimi boshligʻining texnikalar boʻyicha katta yordamchisi S. Suvonov, MK “Vatanparvar” tashkiloti Nurobod tuman Kengashi raisi X. Qobulov va tuman davlat texnika nazorati inspeksiyasi bosh muhandis inspektori M. Urunovlardan iborat hayʼat aʼzolari tuzilsin.

8. Tuman ichki ishlar boʻlimi boshligʻi R. Davirov va tuman davlat texnika nazorati inspeksiyasi bosh muhandis inspektori M. Urunovlarga texnik koʻrikni oʻtkazish yakunlari boʻyicha hisobotni tegishli tartibda tuman hokimligi yigʻilishi muhokamasiga kiritish topshirilsin.

9. Tumanda mototsikllar, tirkama-ulamalarning xamda shaxsiy transport vositalaridan tushadigan majburiy sugʻurta badalini undirish “Oʻzagrosugʻurta” DASK OAJ Nurobod tuman boʻlimi zimmasiga yuklatilsin.

10. Ushbu qarorning ijrosini nazorat qilish tuman hokimining birinchi oʻrinbosari 3. Niyozov zimmasiga yuklatilsin.

Hokim J. IBRAGIMOV

Nurobod t.,

2012-yil 10-may,

195-Q-son