Oʻzbekiston Respublikasida chakana savdo qoidalariga qoʻshimcha va oʻzgartirish kiritish toʻgʻrisida (306-son)

12.11.2013

Oʻzbekiston Respublikasi Vazirlar Mahkamasining

qarori

Sirka kislotasini chakana sotish va isteʼmol qilishda xavfsizlik talablarini taʼminlash, fuqarolarning sogʻligʻini muhofaza qilish maqsadida Vazirlar Mahkamasi qaror qiladi:

1. Vazirlar Mahkamasining 2003-yil 13-fevraldagi 75-son qarori (Oʻzbekiston Respublikasi QT, 2003-y., 2-son, 15-modda) bilan tasdiqlangan Oʻzbekiston Respublikasida chakana savdo qoidalariga ilovaga muvofiq qoʻshimcha va oʻzgartirish kiritilsin.

2. “Oʻzkimyosanoat” davlat-aksiyadorlik kompaniyasi “Oʻzstandart” agentligi va Oʻzbekiston Respublikasi Sogʻliqni saqlash vazirligi bilan birgalikda bir oy muddatda sirka kislotasiga amaldagi standartlarni qayta koʻrib chiqsin hamda oziq-ovqat mahsulotlariga qoʻshiladigan sirka kislotasining cheklangan konsentratsiyasi boʻyicha yagona talablarni belgilasin.

3. Oʻzbekiston Respublikasi Davlat soliq qoʻmitasi “Oʻzstandart” agentligi va Oʻzbekiston Respublikasi Sogʻliqni saqlash vazirligi bilan birgalikda chakana savdo tarmogʻidagi oziq-ovqat mahsulotlariga qoʻshiladigan 10 foizdan ortiq konsentratsiyali sirka kislotasi sotilishining oldini olish, shuningdek ushbu mahsulotni olib qoʻyish boʻyicha belgilangan tartibda chora-tadbirlar koʻrsin.

4. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Savdo-sanoat palatasi bilan birgalikda ushbu qaror talablarini savdo hamda umumiy ovqatlanish korxonalariga yetkazsinlar, shuningdek aholini ulardan belgilangan tartibda xabardor qilsinlar.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2013-yil 12-noyabr,

306-son

Vazirlar Mahkamasining 2013-yil 12-noyabrdagi 306-son qaroriga ILOVA

Vazirlar Mahkamasining 2003-yil 13-fevraldagi 75-son qarori bilan tasdiqlangan Oʻzbekiston Respublikasida chakana savdo qoidalariga kiritilayotgan qoʻshimcha va oʻzgartirish

1. Quyidagi mazmundagi 471-band qoʻshilsin:

“471. Oziq-ovqat mahsulotlariga qoʻshiladigan 10 foizdan ortiq konsentratsiyali sirka kislotasini chakana savdoda sotishga yoʻl qoʻyilmaydi”.

2. 70-banddagi “uksus” soʻzi “oziq-ovqat mahsulotlariga qoʻshiladigan 10 foizdan ortiq boʻlmagan konsentratsiyali sirka kislotasi” soʻzlari bilan almashtirilsin.