Oʻzbekiston SSR davlat moddiy-texnika taʼminoti komitetini qayta oʻzgartirib, uni Oʻzbekiston SSR moddiy-texnika taʼminoti davlat-kooperativ komiteti (Oʻzbekiston SSR Goskoopsnabi)ga aylantirish toʻgʻrisida (PF-148-son)

01.03.1991

OʻZBEKISTON SOVET SOTSIALISTIK RESPUBLIKASI PREZIDENTINING

Farmoni

Bozor munosabatlariga oʻtish sharoitida moddiy-texnika taʼminotini takomillashtirish, xoʻjalik aloqalarini rivojlantirish maqsadida:

1. Oʻzbekiston SSR Davlat moddiy-texnika taʼminoti komiteti va uning jumhuriyat hamda viloyat boʻlinmalari negizida Oʻzbekiston SSR Moddiy-texnika taʼminoti davlat-kooperativ komiteti (Oʻzbekiston SSR Goskoopsnabi) tuzilsin.

Oʻzbekiston SSR Goskoopsnabi sistemasining faoliyati paychilarning yakka tartibda va jamoatchilik asosida aʼzo boʻlishi, kooperativ, davlat, ijara, xususiy va jamoat tashkilotlari hamda korxonalarning va yakka tartibda ishlab chiqarish faoliyati bilan shugʻullanayotgan shaxslarning koʻngilli ravishda qatnashishlari asosida amalga oshirilishi belgilab qoʻyilsin.

Oʻzbekiston SSR Goskoopsnabi shartnomaviy asoslarda Ittifoq va jumhuriyat davlat, kooperativ va aralash birlashmalariga hamda uyushmalariga oʻzining toʻla xoʻjalik mustaqilligini va huquqiy shaxs huquqlarini saqlab qolgan holda ixtiyoriy ravishda kirishi ham mumkin.

Oʻzbekiston SSR Goskoopsnabi moliyaviy-iqtisodiy, xoʻjalik va ijtimoiy faoliyatga aloqador barcha masalalarni mustaqil hal qiladi, bank muassasalarida mahsulot yetkazib beruvchilar, isteʼmolchilar, pudratchilar, budjet bilan hisob-kitob qilish uchun pul va xorijiy valyuta hisob daftarchalarini ochadi, qisqa muddatli va uzoq muddatli kreditlardan foydalanadi.

2. Oʻzbekiston SSR Moddiy-texnika taʼminoti davlat-kooperativ komiteti zimmasiga:

xalq xoʻjaligi (dehqonchilik-sanoat kompleksi bundan mustasno) tarmoqlarini, shuningdek davlat, jumhuriyat, jumhuriyatlararo ilmiy-texnikaviy, ekologik hamda ijtimoiy-iqtisodiy dasturlarni bitimlar, xoʻjalik shartnomalari va hukumatlararo bitimlar asosida moddiy-texnikaviy jihatdan taʼminlash;

ikkilamchi resurslarni tayyorlashni tashkil etish hamda ishlab chiqarish sanoat chiqindilarini oborotga kiritish va idish-oʻrash mahsulotlari bilan taʼminlashni tashkil etish;

rezerv va sugʻurta zapaslarini tashkil etish uchun respublika resurslari imkoniyatidan foydalangan holda moddiy-texnika resurslarining almashuv fondini shakllantirish, bozorni barqarorlashtiruvchi jamgʻarmani tuzishda qatnashish, chet ellarga hukumatlararo bitimlarga ham muvofiq holda mahsulot yetkazib berilishini nazorat qilishni taʼminlash, isteʼmolchilar bilan ishlab chiqaruvchilar oʻrtasida yuzaga kelgan ishlab chiqarish va xoʻjalik aloqalarini oʻrnatish hamda rivojlantirish;

isteʼmol bozorlarini mollar bilan toʻldirishga va bozor infrastrukturasini rivojlantirishga, vositachi savdo firmalarini, tijorat markazlarini, mol birjalari va ulgurji yarmarkalarni, broker va lizing kompaniyalarini tuzishga koʻmaklashish;

xorijiy firmalar bilan tashqi iqtisodiy faoliyatni amalga oshirish vazifasi yuklatilsin.

3. Oʻzbekiston SSR hududida joylashgan korxonalarga ularning kimga qarashliligidan va mulk shakllaridan, ishlab chiqarish-texnikaviy yoʻnalishdagi mahsulotlarni va xalq isteʼmoli mollarini ishlab chiqarishidan qatʼi nazar, ishlab chiqarish ehtiyojlari uchun bu mahsulotlarni Oʻzbekiston SSR Moddiy-texnika taʼminoti davlat-kooperativ komiteti organlari orqali sotish tavsiya etilsin.

4. Oʻzbekiston SSR Prezidenti huzuridagi Vazirlar Mahkamasi Raisining oʻrinbosari — Resurslar, moddiy-texnika taʼminoti va shartnomalar kompleksining rahbari oʻrtoq T. Y. Sharipovga Oʻzbekiston SSR Moddiy-texnika taʼminoti davlat-kooperativ komiteti toʻgʻrisidagi nizom loyihasini ishlab chiqish va uni ikki haftalik muddatda Vazirlar Kabinetiga tasdiqlash uchun taqdim etish topshirilsin.

Oʻzbekiston Sovet Sotsialistik Respublikasining Prezidenti I. KARIMOV

Toshkent sh.,

1991-yil 1-mart,

PF-148-son