Oʻzbekiston Respublikasi mustaqilligining 10 yilligini nishonlashga tayyorgarlik koʻrish va uni oʻtkazish toʻgʻrisida (40-son)

19.01.2001

Oʻzbekiston Respublikasi Vazirlar Mahkamasining

qarori

Mustaqillik xalqimizning XX asr soʻngida qoʻlga kiritgan ulkan tarixiy gʻalabasi ekanini, oʻn yillik mustaqil taraqqiyot hayotimizda alohida bosqich, yangi bir davr boʻlib qolishini nazarda tutib, qutlugʻ anʼanaga aylanib qolgan eng ulugʻ, eng aziz bayramimiz — istiqlol ayyomini keng nishonlash yurtdoshlarimizning ijtimoiy-siyosiy, maʼnaviy tafakkurini yuksaltirishda, oldimizda turgan buyuk maqsadlar sari safarbar qilishda beqiyos ahamiyat kasb etishini, istiqbol rejalarini ana shu haqiqatni chuqur anglash asosida belgilash zaruratini inobatga olib, Vazirlar Mahkamasi qaror qiladi:

1. Oʻzbekiston Respublikasi mustaqilligining 10 yilligini nishonlashga tayyorgarlik koʻrish va uni oʻtkazish respublika komissiyasi tarkibi 1-ilovaga muvofiq tasdiqlansin.

2. Oʻzbekiston davlat mustaqilligining 10 yilligini keng nishonlash boʻyicha dastur 2-ilovaga muvofiq tasdiqlansin.

3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, vazirlik, idora, uyushma va jamgʻarmalar mazkur dastur asosida tegishli maʼnaviy madaniy, maʼrifiy tadbirlar rejasini ishlab chiqsin va oʻn kun muddatda Vazirlar Mahkamasiga kiritsin.

4. Oʻzbek milliy davlatchiligi tarixini, uning taraqqiyot bosqichlari hamda ilmiy-nazariy masalalarini oʻrganish borasidagi ishlarni muvofiqlashtirish boʻyicha maxsus ishchi guruhi tarkibi 3-ilovaga binoan tasdiqlansin.

Quyidagilar ishchi guruhining asosiy vazifasi etib belgilansin:

milliy davlatchiligimizning koʻp ming yillik tarixini, mustaqillik yillarida uning negizida tiklangan zamonaviy oʻzbek davlatchiligining oʻziga xos taraqqiyot tamoyillari, jamiyatimizning pirovard maqsadlarini ilmiy-nazariy jihatdan asoslab berish, buyuk ajdodlarimizning dunyo ilm-fani va madaniyati rivojiga qoʻshgan bebaho hissasini, ular yaratgan falsafiy taʼlimotlarni oʻrganish va zarur xulosa va saboqlar chiqarish;

mustaqillik oʻz-oʻzidan kelmaganini, ozodlik yoʻlida ota-bobolarimiz asrlar davomida kurash olib borganini milliy istiqlol gʻoyasi asosida fuqarolarimiz, ayniqsa, yoshlarimiz ongiga singdirish;

yoshlar qalbida buyuk ajdodlarimiz tomonidan yaratilgan boy ilmiy-madaniy merosga vorislik va iftixor tuygʻularini uygʻotish, milliy va umumbashariy qadriyatlar uygʻunligiga erishish, jamiyatimizda turli millat vakillari oʻrtasida oʻzaro hamjihatlik, totuvlik, diniy bagʻrikenglik muhitini qaror toptirish borasidagi amaliy ishlar mazmunini keng tahlil etish;

istiqlol sharofati bilan xalqimizning bunyodkorlik salohiyati tom maʼnoda yuzaga chiqqanini, xalq xoʻjaligining barcha sohalarida salmoqli yutuqlarga erishilganini, erkin va farovon hayot barpo etish, barkamol avlodni voyaga yetkazish maqsadida amalga oshirilayotgan ulkan ishlar Vatanimizning dunyo hamjamiyatidan oʻziga munosib oʻrin egallashiga xizmat qilishini chuqur asoslab berish.

5. Oʻzbekiston Davlat matbuot qoʻmitasi, “Oʻzteleradio” kompaniyasi, Oʻzbekiston Milliy axborot agentligi (OʻzA), “Jahon” axborot agentligi va boshqa ommaviy axborot vositalariga mustaqillikning 10 yilligi bayramiga tayyorgarlik koʻrish boʻyicha amalga oshirilayotgan ishlarni keng va muntazam ravishda yoritib borish tavsiya etilsin.

6. Belgilab qoʻyilsinki, oʻtkaziladigan bayram tadbirlari:

Qoraqalpogʻiston Respublikasi va viloyatlarda mahalliy budjetlar hamda joylardagi ishlab chiqarish korxonalari, xoʻjaliklar, jamgʻarmalar hisobidan;

Toshkent shahrida respublika budjeti va Toshkent shahar mahalliy budjeti mablagʻlari hisobidan teng ulushlarda qoplanadi.

7. Mazkur qaror ijrosini nazorat qilish Oʻzbekiston Respublikasi Bosh vazirining oʻrinbosari H. Karomatov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2001-yil 19-yanvar,

40-son

Vazirlar Mahkamasining 2001-yil 19-yanvardagi 40-son qaroriga 1-ILOVA

Mustaqillikning 10 yilligini nishonlashga tayyorgarlik koʻrish va uni oʻtkazish boʻyicha respublika komissiyasi

tarkibi

Eslatma: tashkiliy qoʻmita tarkibiga kirgan shaxslar boshqa ishga oʻtgan taqdirda ularning oʻrniga tayinlangan shaxs tashkiliy qoʻmitaga bevosita aʼzo boʻladi.

Vazirlar Mahkamasining 2001-yil 19-yanvardagi 40-son qaroriga 2-ILOVA

Oʻzbekiston Respublikasi mustaqilligining 10 yilligi bayramiga tayyorgarlik koʻrish va uni oʻtkazish boʻyicha amalga oshiriladigan madaniy-maʼrifiy yoʻnalishdagi tadbirlar

dasturi

Vazirlar Mahkamasining 2001-yil 19-yanvardagi 40-son qaroriga 3-ILOVA

Oʻzbek milliy davlatchiligi tarixining ilmiy-nazariy asoslarini oʻrganish

ishchi guruhi