Notarius stajorining faoliyatini tashkil etish tartibi toʻgʻrisidagi nizomga oʻzgartirish va qoʻshimchalar kiritish haqida (2149-2-son)

14.10.2013

Oʻzbekiston Respublikasi Adliya vazirining

buyrugʻi

[Oʻzbekiston Respublikasi Adliya vazirligi tomonidan 2013-yil 14-oktabrda roʻyxatdan oʻtkazildi, roʻyxat raqami 2149-2]

Notarius stajorlarini ishga qabul qilish tartibini yanada takomillashtirish maqsadida Oʻzbekiston Respublikasi Prezidentining 2011-yil 23-avgustdagi PQ–1602-son “Oʻzbekiston Respublikasi Adliya vazirligi faoliyatini yanada takomillashtirish chora-tadbirlari toʻgʻrisida”gi qaroriga muvofiq buyuraman:

1. Oʻzbekiston Respublikasi adliya vazirining 2010-yil 20-oktabrdagi 223-mh-sonli buyrugʻi (roʻyxat raqami 2149, 2010-yil 20-oktabr) (Oʻzbekiston Respublikasi qonun hujjatlari toʻplami, 2010-y., 42-43-son, 369-modda) bilan tasdiqlangan Notarius stajorining faoliyatini tashkil etish tartibi toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.

2. Mazkur buyruq davlat roʻyxatidan oʻtkazilsin va bu haqda Idoraviy meʼyoriy hujjatlarni davlat roʻyxatidan oʻtkazish boshqarmasi (B. Boliyev) Oʻzbekiston Respublikasi vazirliklari, davlat qoʻmitalari va idoralari normativ-huquqiy hujjatlarining davlat reyestriga tegishli yozuv kiritsin.

3. Qonun hujjatlarini turkumlash va huquqiy axborot boshqarmasi (S. Nuriyev) va Notariat, advokatura va FHDY organlari boshqarmasi (D. Yakubova) ushbu normativ-huquqiy hujjatni barcha manfaatdor shaxslarga yetkazilishi va “Oʻzbekiston Respublikasi qonun hujjatlari toʻplami” — “Sobraniye zakonodatelstva Respubliki Uzbekistan”da nashr etilishini taʼminlasin.

4. Mazkur buyruq rasmiy eʼlon qilingan kundan eʼtiboran kuchga kiradi.

5. Mazkur buyruq ijrosini nazorat qilish vazir oʻrinbosari O. Murodov zimmasiga yuklansin.

Vazir N. YOʻLDOShEV

Toshkent sh.,

2013-yil 14-oktabr,

314-mh-son

Oʻzbekiston Respublikasi adliya vazirining 2013-yil 14-oktabrdagi 314-mh-sonli buyrugʻiga ILOVA

Notarius stajorining faoliyatini tashkil etish tartibi toʻgʻrisida nizomga kiritilayotgan oʻzgartirish va qoʻshimchalar

1. 3-bandning birinchi xatboshisi quyidagi tahrirda bayon etilsin:

“Oliy yuridik maʼlumotga, yuridik mutaxassislik boʻyicha kamida bir yillik ish stajiga ega boʻlgan Oʻzbekiston Respublikasi fuqarosi stajor boʻlishi mumkin. Bunda stajorning stajirovkaning tugash muddatida yigirma besh yoshdan kichik boʻlmasligi inobatga olinishi lozim.”.

2. 4-bandning ikkinchi xatboshisi quyidagi tahrirda bayon etilsin:

“Notarial idoralarda stajorlar zaxirasi Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari (keyingi oʻrinlarda adliya boshqarmasi deb yuritiladi) tomonidan mazkur Nizomning 3-bandida belgilangan talablarga javob beradigan shaxslar orasidan shakllantiriladi. Stajorlikka ishga qabul qilishda nomzodlar stajorlar zaxirasidan tanlab olinadi.”.

3. 11-bandning “e” va “j” kichik bandlari quyidagi tahrirda bayon etilsin:

“e) mehnat daftarchasi;

j) avvalgi ish joyidan tavsifnoma.”.

4. Quyidagi mazmundagi 111-band bilan toʻldirilsin:

“111. Stajorlikka qabul qilinadigan shaxs notarius, advokat, tergovchi, prokuror, sudya yoki huquqni muhofaza qiluvchi organlarning boshqa xodimi lavozimida ishlagan boʻlsa, uning ushbu lavozimlarda oʻz kasbiy faoliyatiga mos kelmaydigan qilmishlar sodir etmaganligini aniqlash maqsadida tegishli idoralardan maʼlumotlar olinadi.”.

5. 12-band quyidagi tahrirda bayon etilsin:

“12. Fuqaro stajorlikka qabul qilinishidan oldin adliya boshqarmasida suhbatdan oʻtadi. Suhbat adliya boshqarmasi boshligʻining buyrugʻi bilan tashkil etiladigan maxsus komissiya tomonidan oʻtkaziladi. Maxsus komissiya adliya boshqarmasining masʼul xodimlari, shu jumladan tajribali notariuslar orasidan 5 kishidan iborat tarkibda tuziladi. Maxsus komissiyaga adliya boshqarmasi boshligʻi rahbarlik qiladi.

Suhbatda fuqaroning yurisprudensiya sohasidagi umumiy bilim darajasi hamda uning stajor boʻlishga layoqati mavjudligi aniqlanadi. Suhbat natijasi boʻyicha xulosa tuziladi va maxsus komissiyaning barcha aʼzolari tomonidan imzolanadi.

Stajorlikka qabul qilishda fuqaroning notariat sohasidagi tajribasi ustuvor ahamiyatga ega boʻladi.”.

6. 13-banddagi “bilan dastlabki” degan soʻzlar “Notariat, advokatura va FHDY organlari boshqarmasi bilan” degan soʻzlar bilan almashtirilsin.

7. 25-band quyidagi tahrirda bayon etilsin:

“25. Stajorning stajirovka oʻtash davrida amalga oshirgan ishlari hamda ish rejaning bajarilishi yuzasidan adliya boshqarmasi tomonidan har oyda bir marta monitoring olib boriladi. Monitoring natijalari yuzasidan maʼlumotnoma tuziladi va tegishli tavsiyalar beriladi.”.

8. 27-band quyidagi tahrirda bayon etilsin:

“27. Stajirovka davrida stajor notarial harakatlarning asosiy turlari boʻyicha har olti oy yakunida referat tayyorlaydi. Tayyorlangan referat stajirovka rahbari tomonidan tasdiqlanadi va mazkur Nizomning 281-bandida belgilangan sinov vaqtida maxsus komissiya oldida himoya qilinadi.”.

9. Quyidagi mazmundagi 281 va 282-bandlar bilan toʻldirilsin:

“281. Stajorning notariatga taalluqli nazariy bilimlarni oʻzlashtirish darajasi va amaliy tayyorgarligini nazorat qilish maqsadida maxsus komissiya tomonidan:

stajirovka oʻtash muddatining birinchi yili birinchi yarim yilligi yakuni boʻyicha Oʻzbekiston Respublikasining Fuqarolik kodeksi normalari;

stajirovka oʻtash muddatining birinchi yili ikkinchi yarim yilligi yakuni boʻyicha notariat toʻgʻrisidagi qonun hujjatlari normalari;

stajirovka oʻtash muddatining ikkinchi yili birinchi yarim yilligi yakuni boʻyicha notarial tasdiqlanadigan yoki shahodatlanadigan hujjatlar loyihalarini tuzish boʻyicha sinovdan oʻtkaziladi.

282. Sinov natijalari yuzasidan stajorga tegishli tavsiyalar beriladi. Sinov natijalari yuzasidan stajirovka rahbarining faoliyatiga ham baho berilib, zarur hollarda tegishli choralar koʻrish uchun adliya boshqarmasi rahbariga taklif kiritiladi.”.

10. Quyidagi mazmundagi 381-band bilan toʻldirilsin:

“381. Stajirovka muddati tugagandan soʻng bir oylik muddat ichida stajorning malaka imtihonini topshirish uchun tegishli hujjatlarni topshirmaganligi stajirovkaning bekor boʻlishiga asos boʻladi, uzrli deb topilgan (kasallik, homiladorlik va tugʻish taʼtillari, harbiy yigʻinlarga chaqirilganlik va shu kabilar bilan bogʻliq) hollar bundan mustasno.”.