Oʻzbekiston Respublikasi Milliy sertifikatlashtirish tizimida ishlar va xizmatlarga haq toʻlash qoidalarini tasdiqlash toʻgʻrisida (2516-son)

11.10.2013

Oʻzbekiston standartlashtirish, metrologiya va sertifikatlashtirish agentligi bosh direktorining

buyrugʻi

[Oʻzbekiston Respublikasi Adliya vazirligi tomonidan 2013-yil 11-oktabrda roʻyxatdan oʻtkazildi, roʻyxat raqami 2516]

Oʻzbekiston Respublikasi Vazirlar Mahkamasining 2013-yil 19-apreldagi 108-son “Vazirlar Mahkamasining “Mahsulotlarni sertifikatlashtirish tartibotini soddalashtirishga doir qoʻshimcha chora-tadbirlar toʻgʻrisida” 2004-yil 6-iyuldagi 318-son qaroriga oʻzgartirishlar kiritish haqida”gi qarori (Oʻzbekiston Respublikasi qonun hujjatlari toʻplami, 2013-yil, 17-son, 225-modda) ijrosini taʼminlash maqsadida buyuraman:

1. Oʻzbekiston Respublikasi Milliy sertifikatlashtirish tizimida ishlar va xizmatlarga haq toʻlash qoidalari ilovaga muvofiq tasdiqlansin.

2. Oʻzbekiston davlat standartlashtirish, metrologiya va sertifikatlashtirish markazi tomonidan 1999-yil 28-aprelda tasdiqlangan Ishlarga haq toʻlash tartibi (roʻyxat raqami 722, 1999-yil 11-may) oʻz kuchini yoʻqotgan deb hisoblansin.

3. Mazkur buyruq rasmiy eʼlon qilingan kundan eʼtiboran kuchga kiradi.

Bosh direktor A. KURBANOV

Toshkent sh.,

2013-yil 18-sentabr,

439-son

Oʻzbekiston davlat standartlashtirish, metrologiya va sertifikatlashtirish agentligi bosh direktorining 2013-yil 18-sentabrdagi 439-son buyrugʻiga ILOVA

Oʻzbekiston Respublikasi Milliy sertifikatlashtirish tizimida ishlar va xizmatlarga haq toʻlash

QOIDALARI

Ushbu Qoidalar Oʻzbekiston Respublikasining “Mahsulotlar va xizmatlarni sertifikatlashtirish toʻgʻrisida”gi, “Muvofiqlikni baholash toʻgʻrisida”gi qonunlari, Oʻzbekiston Respublikasi Prezidentining 2019-yil 15-avgustdagi PQ-4419-son “Oʻzbekiston Respublikasida muvofiqlikni baholash tizimini yanada takomillashtirish va sinov laboratoriyalari kompleksini rivojlantirish toʻgʻrisida”gi qarori, Oʻzbekiston Respublikasi Vazirlar Mahkamasining 2013-yil 19-apreldagi 108-son “Vazirlar Mahkamasining “Mahsulotlarni sertifikatlashtirish tartibotini soddalashtirishga doir qoʻshimcha chora-tadbirlar toʻgʻrisida” 2004-yil 6-iyuldagi 318-son qaroriga oʻzgartirishlar kiritish haqida”gi, 2015-yil 14-oktabrdagi 292-son “Muvofiqlikni baholash toʻgʻrisida”gi Oʻzbekiston Respublikasi Qonunini amalga oshirish chora-tadbirlari toʻgʻrisida”gi, 2019-yil 24-apreldagi 348-son “Oʻzbekiston standartlashtirish, metrologiya va sertifikatlashtirish agentligining faoliyatini yanada takomillashtirish chora-tadbirlari toʻgʻrisida”gi va 2019-yil 24-apreldagi 349-son “Muvofiqlikni baholash organlarini akkreditatsiyadan oʻtkazish sohasidagi ishlarni takomillashtirishga doir qoʻshimcha chora-tadbirlar toʻgʻrisida”gi qarorlariga muvofiq, akkreditatsiya qilish, inspeksiya nazorati, sertifikatlashtirish, xorijiy mamlakatlarning muvofiqlikni baholash organlari tomonidan berilgan muvofiqlik sertifikatlarini, muvofiqlik toʻgʻrisidagi deklaratsiyalarni va sinovlar protokollarini eʼtirof etish boʻyicha ishlar va xizmatlar uchun, shuningdek muvofiqlik belgisidan foydalanganlik uchun bir martalik va milliy akkreditatsiya tizimi belgisini (bundan buyon matnda akkreditatsiya belgisi deb yuritiladi) qoʻllash uchun toʻlovlarni toʻlash tartibini belgilaydi.

I bob. Asosiy qoidalar

1. Mazkur Qoidalarda quyidagi asosiy tushunchalar qoʻllaniladi:

akkreditatsiya obyekti — muvofiqlikni baholash organlari va metrologiya xizmatlari, shu jumladan ularni baholash jarayonida;

muvofiqlik belgisi — muayyan mahsulot yoxud xizmat aniq standartga yoki boshqa normativ hujjatga mos ekanligini koʻrsatish uchun mahsulotga yoxud koʻrsatilgan xizmatga doir hujjatga qoʻyiladigan, belgilangan tartibda roʻyxatga olingan belgi;

inspeksiya nazorati — mahsulotni, ishlab chiqarish jarayonlarini, xizmatlarni, menejment tizimlarini, muvofiqlikni baholash organlarini ularning muvofiqlikni baholash davrida belgilangan talablarga muvofiqligini tasdiqlash maqsadida amalga oshiriladigan davriy qayta baholash tartib-taomili.

11. Muvofiqlikni baholash organlari va metrologik xizmatlari oʻz faoliyatlarini akkreditatsiya qilinganlik toʻgʻrisidagi guvohnomalar asosida amalga oshiradilar.

2. Oʻzbekiston Respublikasi Milliy sertifikatlashtirish tizimidagi ishlar va xizmatlar narxi shartnoma asosida aniqlanadi. Bunda akkreditatsiya qilish, inspeksiya nazorati, sertifikatlashtirish, xorijiy muvofiqlik sertifikatlarini tan olish va deklaratsiyalash boʻyicha ishlar va xizmatlarning narxini shakllantirishda xarajatlar tarkibini aniqlash Oʻzbekiston Respublikasi Vazirlar Mahkamasining 1999-yil 5-fevraldagi 54-son “Mahsulot (ishlar, xizmatlar)ni ishlab chiqarish va sotish xarajatlari tarkibi hamda moliyaviy natijalarni shakllantirish tartibi toʻgʻrisidagi nizomni tasdiqlash haqida”gi qaroriga muvofiq amalga oshiriladi.

3. Monopolist korxonalar va tabiiy monopoliya subyektlarining akkreditatsiya qilish, inspeksiya nazorati, sertifikatlashtirish, xorijiy muvofiqlik sertifikatlarini tan olish va deklaratsiyalash boʻyicha ishlar va xizmatlarining narxi Oʻzbekiston Respublikasi Vazirlar Mahkamasining 2010-yil 28-oktabrdagi 239-son qarori bilan tasdiqlangan Tovarlar (ishlar, xizmatlar)ga tartibga solinadigan narxlar (tariflar)ni shakllantirish, deklaratsiya qilish (tasdiqlash) va belgilash hamda ularning qoʻllanilishini davlat tomonidan nazorat qilish tartibi toʻgʻrisida nizomga muvofiq aniqlanadi.

II bob. Akkreditatsiya qilish inspeksiya nazorati uchun ishlar va xizmatlarning toʻlovi

4. Oʻzbekiston Respublikasi Vazirlar Mahkamasining 2019-yil 24-apreldagi 349-son qarori bilan tasdiqlangan Muvofiqlikni baholash organlarini akkreditatsiyadan oʻtkazish tartibi toʻgʻrisidagi nizomning 60-bandida “Oʻzbekiston akkreditatsiya markazi” DK tomonidan (bundan buyon matnda Markaz deb yuritiladi) akkreditatsiya sohasidagi quyidagi xizmatlar uchun haq undirilishi belgilangan:

hujjatlar ekspertizasi uchun;

akkreditatsiya obyektini baholash uchun;

tasdiqlangan reja-jadvalga muvofiq oʻtkazilgan akkreditatsiya obyektining inspeksiya nazorati uchun;

akkreditatsiya sohasini dolzarblashtirish uchun.

5. Natijalaridan qatʼi nazar, akkreditatsiya qilish boʻyicha ishlarni bajarish bilan bogʻliq boʻlgan barcha xarajatlar toʻlanishi lozim.

6. “Mahsulotlar va xizmatlarni sertifikatlashtirish toʻgʻrisida”gi Oʻzbekiston Respublikasi Qonunining 5-moddasiga muvofiq Oʻzbekiston Respublikasi Vazirlar Mahkamasi huzuridagi Oʻzbekiston texnik jihatdan tartibga solish agentligi (bundan buyon matnda Texnik jihatdan tartibga solish agentligi deb yuritiladi) oʻz vazifalarining bir qismini mahsulotlarni sertifikatlashtirish organlariga va sinov laboratoriyalariga (markazlariga) oʻtkazishga haqlidir.

7. Akkreditatsiya obyekti akkreditatsiya qilinganida Markaz va akkreditatsiya obyekti oʻrtasida akkreditatsiyadan keyingi shartnoma tuziladi, unga koʻra akkreditatsiya obyekti akkreditatsiya belgisini qoʻllaganlik uchun akkreditatsiya sohasida koʻrsatilgan pullik xizmatlar tushumning 5 foizi miqdorida ajratma oʻtkazadi.

8. Oʻzbekiston Respublikasi Vazirlar Mahkamasining 2019-yil 24-apreldagi 349-son qarori bilan tasdiqlangan Muvofiqlikni baholash organlarini akkreditatsiyadan oʻtkazish tartibi toʻgʻrisidagi nizomning 62-bandiga muvofiq ushbu Qoidalarda nazarda tutilgan xizmatlar uchun toʻlovlar Markazning sarflangan vaqtidan kelib chiqqan holda belgilanadi.

III bob. Sertifikatlash, xorijiy muvofiqlik sertifikatlarini tan olish va deklaratsiyalash boʻyicha ishlar va xizmatlar toʻlovi

9. Mahsulotlar, xizmatlar va sifat tizimlarini sertifikatlashtirishda haqiqiy sarflarni hisobga olgan holda Mahsulotlarni sertifikatlash qoidalarining (roʻyxat raqami 1458, 2005-yil 18-mart) (Oʻzbekiston Respublikasi qonun hujjatlari toʻplami, 2005-y., 10-11-son, 86-modda) 8-bandida koʻzda tutilgan sertifikatlashtirish bosqichlari toʻlanishi lozim.

10. Natijalaridan qatʼi nazar, sertifikatlashtirish boʻyicha ishlar va xizmatlarni oʻtkazish bilan bogʻliq boʻlgan barcha xarajatlar toʻlanishi kerak.

11. Sertifikatlangan mahsulot va sifat tizimining inspeksiya nazoratini oʻtkazish boʻyicha ishlar va xizmatlarning toʻlovi, haqiqiy sarflardan kelib chiqib, muvofiqlik belgisini ishlatish huquqi boʻyicha bitim asosida amalga oshiriladi.

12. Xorijiy mamlakatlarning muvofiqlikni baholash organlari tomonidan berilgan muvofiqlik sertifikatlarini, muvofiqlik toʻgʻrisidagi deklaratsiyalarni va sinovlar protokollarini eʼtirof etish boʻyicha ishlar va xizmatlarning toʻlovi Vazirlar Mahkamasining 2015-yil 14-oktabrdagi 292-son qarori bilan tasdiqlangan Oʻzbekiston Respublikasidan tashqarida amalga oshirilgan muvofiqlikni baholash natijalarini Oʻzbekiston Respublikasida eʼtirof etish tartibi toʻgʻrisidagi nizom va Mahsulotlarni sertifikatlash qoidalariga (roʻyxat raqami 1458, 2005-yil 18-mart) muvofiq eʼtirof etish jarayonini amalga oshirish boʻyicha haqiqiy sarflardan kelib chiqib amalga oshiriladi.

13. Deklaratsiyalash yoʻli bilan mahsulotlarning belgilangan talablarga muvofiqligini tasdiqlash boʻyicha ishlar va xizmatlar toʻlovi Mahsulotning xavfsizlik talablariga muvofiqligini deklaratsiyalash tartibi toʻgʻrisida nizomga (roʻyxat raqami 1465, 2005-yil 6-aprel) (Oʻzbekiston Respublikasi qonun hujjatlari toʻplami, 2005-y., 14-son, 107-modda) muvofiq deklaratsiyalash yoʻli bilan mahsulotlarning belgilangan talablarga muvofiqligini tasdiqlash jarayonini amalga oshirish boʻyicha haqiqiy sarflardan kelib chiqib amalga oshiriladi.

IV bob. Sertifikatlashtirish organlariga muvofiqlik belgisidan foydalanganlik uchun bir martalik toʻlovlarni toʻlash

15. Muvofiqlik belgisidan foydalanishni nazarda tutuvchi sxemalar boʻyicha amalga oshirilgan sertifikatlashtirishning natijalari ijobiy boʻlganda, mahsulotlar va xizmatlarni sertifikatlashtirish organi bilan import qiluvchi va mahalliy ishlab chiqaruvchi korxonalar (sertifikatlashtirishga nomzod) oʻrtasida bitim tuziladi. Unga koʻra import qiluvchi va mahalliy ishlab chiqaruvchi korxonalar muvofiqlik belgisidan foydalanganlik uchun bir martalik toʻlovni bazaviy hisoblash miqdorining yarim baravari miqdorida amalga oshiradi.

Oʻzbekiston Respublikasi Vazirlar Mahkamasining 2019-yil 24-apreldagi 348-son “Oʻzbekiston standartlashtirish, metrologiya va sertifikatlashtirish agentligining faoliyatini yanada takomillashtirish chora-tadbirlari toʻgʻrisida”gi qarorining 1-bandiga muvofiq Mustaqil Davlatlar Hamdoʻstligi mamlakatlarining “Mahsulotlar va xizmatlar sifati sohasidagi xizmatlari uchun” mukofoti laureatlari boʻlgan mahalliy korxonalar nomzod mahsulot boʻyicha muvofiqlik sertifikati amal qilish muddatida muvofiq belgisidan foydalanganlik uchun bir martalik toʻlovdan ozod etiladi.

V bob. Yakuniy qoidalar

18. Ishlar va xizmatlarning haqqoniy sermashaqqatliligini aniqlashda javobgarlik akkreditatsiya va inspeksiya nazorati boʻyicha — Markaz, sertifikatlashtirish, xorijiy muvofiqlik sertifikatlarini tan olish hamda deklaratsiyalash boʻyicha — sertifikatlashtirish organi rahbarlari zimmasiga yuklatiladi.

19. Mazkur Qoidalar talablariga rioya qilish ustidan davlat nazoratini Texnik jihatdan tartibga solish agentligi amalga oshiradi.

20. Ushbu Qoidalar Oʻzbekiston Respublikasi Moliya vazirligi bilan kelishilgan.

Moliya vaziri R. AZIMOV

2013-yil 18-sentabr