Mirzaobod tumanida 2013-yilda kasanachilik uy mehnatini tashkil qilish boʻyicha tuman dasturini tasdiqlash toʻgʻrisida (228-son)

23.01.2013

SIRDARYo VILOYATI Mirzaobod tuman hokimining

QarorI

Oʻzbekiston Respublikasi Prezidentining “Yirik sanoat korxonalari bilan kasanachilikni rivojlantirish asosidagi ishlab chiqarish va xizmatlar oʻrtasida kooperatsiyani kengaytirishni ragʻbatlantirish chora-tadbirlari toʻgʻrisida”gi 2006-yil 5-yanvardagi PF-3706-sonli Farmonini amalga oshirish maqsadida, Vazirlar Mahkamasining 2006-yil 11-yanvardagi 4-sonli qarori ijrosini taʼminlash, tumanda ish bilan band boʻlmagan aholini uyda mahsulotlar ishlab chiqarish, xizmatlar koʻrsatish ishlarini bajarishga jalb etish uchun ish beruvchilarga real ragʻbatlar yaratish, kasanachilarning qonun hujjatlarida belgilangan ijtimoiy va mehnat kafolatlarini yanada yaxshilash maqsadida qaror qilaman.

1. Tumanda 2013-yilda kasanachilik uy mehnatini tashkil qilish dasturi 1-ilovaga* muvofiq tasdiqlansin.

2. Tumanda korxonalar bilan uyda mahsulotlar ishlab chiqaradigan va xizmatlar koʻrsatadigan fuqarolar oʻrtasida kooperatsiyani muvofiqlashtirish, qoʻllab-quvvatlash va rivojlantirish boʻyicha ishchi komissiya tuzilsin va uning tarkibi 2-ilovaga* muvofiq tasdiqlansin.

* 1 va 2-ilovalar berilmaydi.

3. Tuman ishchi komissiyasi raisi (D. Sultonov)ga:

belgilangan rejani qatʼiy bajarilishini nazorat qilish;

har oy yakuni bilan dastur ijrosi boʻyicha ishchi guruh yigʻilishlarini oʻtkazib, korxonalar kesimida tahlil olib borish;

kasanachilarning doimiy ish bilan taʼminlanishi bilan bogʻliq boʻlgan muammolarni yaʼni xomashyo ishlab chiqarish jihozlari bilan taʼminlashni, oylik ish haqlarining oyma-oy belgilanishini nazoratga olish topshirilsin.

4. 2013-yilda kasanachilik uy mehnatini tashkil qilish boʻyicha tuman dasturiga kiritilgan korxona, tashkilot va xoʻjalik rahbarlariga:

dasturda belgilangan reja topshiriqlarning bajarilishi boʻyicha shaxsan javobgar ekanliklari uqtirilsin.

har oy yakuni bilan kasanachilik uy mehnatini tashkil qilish boʻyicha amalga oshirilgan ishlar yuzasidan xar bir yaratilgan kasanachi ish oʻrni, ishga qabul qilingan kasanachi bilan tuzilgan shartnoma nusxasi, ishga qabul qilish toʻgʻrisidagi buyruqlardan koʻchirma, kasanachiga toʻlangan ish haqi vedomosti nusxasi, kasanachiga yetkazib berilgan xomashyo va ular tomonidan ishlab chiqarilayotgan mahsulot toʻgʻrisidagi maʼlumotlarni tuman ishchi guruhiga taqdim qilish topshirilsin.

5. Tuman Bandlikka koʻmaklashish va aholini ijtimoiy muhofaza qilish markazi direktori (Sh. Shoyimov)ga:

kasanachilik uy mehnati bilan shugʻullanayotgan fuqarolarga nisbatan mehnat toʻgʻrisidagi qonunlarga rioya qilinishi ustidan nazoratni taʼminlash;

qaror ijrosini taʼminlash boʻyicha oʻtkazilgan monitoring natijalari 2 nusxada tuman hokimligiga taqdim qilib borish vazifasi yuklatilsin.

6. Tuman statistika boʻlimi boshligʻi (D. Rustamov)ga tuman hokimligiga korxonalarning kasanachilik mehnati bilan band boʻlgan xodimlar soni toʻgʻrisidagi maʼlumotlarni belgilangan muddatlarda taqdim etishi taʼminlasin.

7. Mazkur qarorning bajarilishi nazoratini tuman hokimi oʻrinbosari D. Sultanov zimmasiga yuklatilsin.

Hokim A. XUSANBOYEV

Navroʻz sh.,

2013-yil 23-yanvar,

228-son