Havo kemalari xalqaro parvozlari uchun Andijon, Namangan, Fargʻona, Qarshi va Termiz shahri aeroportlarini ochish toʻgʻrisida (263-son)

23.09.2013

Oʻzbekiston Respublikasi Vazirlar Mahkamasining

qarori

Oʻzbekiston Respublikasining Havo kodeksiga va Havo kemalarining xalqaro parvozlari uchun Oʻzbekiston Respublikasi fuqaro aviatsiyasi aeroportlarini (aerodromlarini) ochish tartibi toʻgʻrisidagi nizomga muvofiq Vazirlar Mahkamasi qaror qiladi:

1. Oʻzbekiston Respublikasi Parvozlar xavfsizligini nazorat qilish davlat inspeksiyasining xalqaro parvozlar uchun Andijon, Namangan, Fargʻona, Qarshi va Termiz shaharlari aeroportlarini ochish toʻgʻrisidagi taklifi qabul qilinsin.

2. “Oʻzbekiston havo yoʻllari” milliy aviakompaniyasi Oʻzbekiston Respublikasi Parvozlar xavfsizligini nazorat qilish davlat inspeksiyasi bilan birgalikda Andijon, Namangan, Fargʻona, Qarshi va Termiz shaharlari aeroportlarining maqomi boʻyicha maʼlumotlar tayyorlanishini va xalqaro aeronavigatsiya axboroti toʻplamlarida eʼlon qilinishini tashkil etsin.

3. Oʻzbekiston Respublikasi Davlat xavfsizlik xizmati, Davlat bojxona qoʻmitasi, Sogʻliqni saqlash vazirligi, Qishloq va suv xoʻjaligi vazirligi, Tashqi ishlar vazirligi va Ichki ishlar vazirligi Andijon, Namangan, Fargʻona, Qarshi va Termiz shaharlari aeroportlarining oʻtkazish punktlarida chegara, bojxona, sanitariya va veterinariya nazoratini, shuningdek, pasport-viza taʼminotini qonun hujjatlarida belgilangan tartibda amalga oshirsin.

4. “Oʻzbekiston havo yoʻllari” milliy aviakompaniyasi Oʻzbekiston Respublikasi Milliy xavfsizlik xizmati, Davlat bojxona qoʻmitasi, Sogʻliqni saqlash vazirligi, Qishloq va suv xoʻjaligi vazirligi, Tashqi ishlar vazirligi va Ichki ishlar vazirligining tegishli boʻlinmalarini Andijon, Namangan, Fargʻona, Qarshi va Termiz shaharlari aeroportlarining oʻtkazish punktlarida chegara, bojxona, sanitariya va veterinariya nazoratini, shuningdek, pasport-viza taʼminotini samarali amalga oshirish uchun zarur xizmat xonalari, aloqa vositalari, asbob-uskunalar va maxsus texnika bilan begʻaraz asosda taʼminlasin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.I. Zakirov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2013-yil 23-sentabr,

263-son