Eksport mahsuloti ishlab chiqaruvchilarni ragʻbatlantirish borasidagi qoʻshimcha chora-tadbirlar toʻgʻrisida (PF-2613-son)
05.06.2000
Oʻzbekiston Respublikasi Prezidentining
Farmoni
Eksportga mahsulot ishlab chiqaruvchi korxonalarning eksport salohiyatini kengaytirish, ularni mulkchilik shaklidan qatʼi nazar, davlat tomonidan qoʻllab-quvvatlash, amaldagi soliq imtiyozlarini tartibga solish va eksportga moʻljallangan raqobatdosh mahsulot ishlab chiqarishni koʻpaytirishga shunday imtiyozlarning ragʻbatlantiruvchi taʼsirini kuchaytirish maqsadida:
1. Eksport qiluvchi korxonalar uchun foyda soligʻi va mulk soligʻini toʻlash tartibi umumiy sotish hajmida oʻzi ishlab chiqargan va erkin almashtiriladigan valyutaga sotilgan tovarlar, ishlar, xizmatlar eksportidagi (ishlar bajarilgan, xizmatlar koʻrsatilgan joydan qatʼii nazar) ulushiga bogʻliq holda quyidagicha belgilansin:
eksport ulushi 15 foizdan 30 foizgacha miqdorda boʻlganida — belgilangan foyda soligʻi va mulk soligʻi stavkalari 30 foizga kamaytiriladi;
eksport ulushi 30 va undan koʻproq foiz boʻlganida — belgilangan foyda soligʻi va mulk soligʻi stavkalari 50 foizga kamaytiriladi.
Mazkur soliq imtiyozi yagona soliq toʻlovini hisoblash chogʻida mikrofirmalar va kichik korxonalarga tatbiq etilsin.
3. Ushbu Farmonning 1-bandida nazarda tutilgan imtiyozlar eksport mahsulotlarini ishlab chiqaruvchi hamda uni mustaqil ravishda yoki vazirliklar, idoralar, korporatsiyalar, uyushmalar va kompaniyalarning tarkibiy boʻlinmalari hisoblanuvchi ixtisoslashtirilgan tashqi savdo birlashmalari hamda firmalar, shuningdek komissiya shartnomasi (topshiriq) boʻyicha vositachi (ishonchli vakil) orqali sotuvchi barcha mulkchilik shaklidagi korxonalarga tatbiq etiladi.
Mazkur imtiyozlar erkin almashtiriladigan valyutaga xomashyo mahsulotlari — paxta tolasi, ip gazlama kalavasi, lint, neft, neft mahsulotlari, gaz kondensati, tabiiy gaz, elektr energiyasi, qimmatbaho, rangli va qora metallar eksport qiluvchi savdo-vositachilik korxonalariga, shuningdek ishlab chiqarish korxonalariga tadbiq qilinmaydi.
4. Oʻzbekiston Respublikasi Moliya vazirligi Davlat soliq qoʻmitasi bilan birga bir hafta muddatda ushbu Farmonda koʻzda tutilgan soliq imtiyozlarini qoʻllanish tartibini ishlab chiqsin va belgilangan tartibda tasdiqlasin.
5. Eksport qiluvchi korxonalar uchun ilovaga* muvofiq soliq imtiyozlari oʻz kuchini yoʻqotgan deb hisoblansin.
* Ilova rus tilida beriladi.
6. Oʻzbekiston Respublikasi Vazirlar Mahkamasi ikki hafta muddatda:
Oʻzbekiston Respublikasining amaldagi qonun hujjatlariga oʻzgartish va qoʻshimchalar kiritish toʻgʻrisida takliflar;
Hukumatning ilgari qabul qilingan qarorlariga tegishli oʻzgartishlar kiritsin.
7. Ushbu Farmonning bajarilishini nazorat qilish Oʻzbekiston Respublikasining Bosh vaziri Oʻ. T. Sultonov zimmasiga yuklansin.
Oʻzbekiston Respublikasining Prezidenti I. KARIMOV
Toshkent sh.,
2000-yil 5-iyun,
PF-2613-son