Oʻzbekiston Respublikasi Maʼlumotlar uzatish milliy tarmogʻini zamonaviylashtirish va rivojlantirish loyihasini amalga oshirish chora-tadbirlari toʻgʻrisida (466-son)

05.12.2001

Oʻzbekiston Respublikasi Vazirlar Mahkamasining

qarori

1999 — 2003-yillarda Maʼlumotlar uzatish milliy tarmogʻini zamonaviylashtirish va rivojlantirish dasturini bajarish maqsadida Vazirlar Mahkamasi qaror qiladi:

1. Oʻzbekiston Respublikasi Makroiqtisodiyot va statistika vazirligi, Oʻzbekiston pochta va telekommunikatsiyalar agentligining Oʻzbekiston Respublikasi Maʼlumotlar uzatish milliy tarmogʻini zamonaviylashtirish va rivojlantirish loyihasini oʻtkazilgan tender natijalariga muvofiq “Belam, Inc.” (AQSh) korporatsiyasi bilan kontrakt boʻyicha amalga oshirish toʻgʻrisidagi takliflari maʼqullansin.

Quyidagilar:

“UzPAK” maʼlumotlarni uzatish davlat tarmogʻini rivojlantirish va undan foydalanish korxonasi loyiha boʻyicha buyurtmachi va kredit boʻyicha qarz oluvchi etib belgilanganligi;

buyurtmachi manfaatlarini koʻzlab “Oʻzimpeksaloqa” aksiyadorlik jamiyati tomonidan “Belam, Inc.” korporatsiyasi bilan asbob-uskunalarni yetkazib berish, montaj qilish va texnik xodimlarni oʻqitish yuzasidan umumiy miqdori 5184,8 ming AQSh dollari boʻlgan kontrakt tuzilganligi maʼlumot uchun qabul qilinsin.

2. Belgilab qoʻyilsinki, koʻrsatib oʻtilgan loyihani mablagʻ bilan taʼminlash:

kontrakt qiymatining Eksimbank (AQSh)ning sugʻurta mukofoti miqdoriga koʻpaytirilgan 4407,09 ming AQSh dollari miqdoridagi 85 foizi Eksimbank (AQSh)ning sugʻurta qoplamasi ostida xorijiy bank mablagʻlarini qayta moliyalashtirish yoʻli bilan Oʻzbekiston Respublikasi Tashqi iqtisodiy faoliyat milliy banki krediti hisobiga;

kontrakt qiymatining 777,72 ming AQSh dollari miqdoridagi 15 foizi xorijiy bank mablagʻlarini qayta moliyalashtirish yoʻli bilan Oʻzbekiston Respublikasi Tashqi iqtisodiy faoliyat milliy banki krediti hisobiga amalga oshiriladi.

Asosiy qarzni, foizlarni, vositachilik haqini va jalb etilayotgan kreditlarga xizmat koʻrsatish bilan bogʻliq boshqa xarajatlarni toʻlash “UzPAK” maʼlumotlarni uzatish davlat tarmogʻini rivojlantirish va undan foydalanish korxonasining oʻz mablagʻlari hisobiga 1 va 2-ilovalarga* muvofiq amalga oshiriladi.

*1 va 2-ilovalar rus tilidagi matnda berilgan.

3. Oʻzbekiston Respublikasi Tashqi iqtisodiy faoliyat milliy banki koʻrsatib oʻtilgan kontraktni mablagʻ bilan taʼminlash yuzasidan xorijiy bank bilan kredit bitimlarini belgilangan tartibda tuzsin va mablagʻlarni “UzPAK” maʼlumotlarni uzatish davlat tarmogʻini rivojlantirish va undan foydalanish korxonasiga qayta moliyalashtirsin.

4. Moliya vazirligi mazkur loyiha uchun jalb etilayotgan kreditlar boʻyicha: xorijiy bankka — Oʻzbekiston Respublikasi Tashqi iqtisodiy faoliyat milliy-banki majburiyatlari boʻyicha hamda Oʻzbekiston Respublikasi Tashqi iqtisodiy faoliyat milliy bankiga — “UzPAK” maʼlumotlarni uzatish davlat tarmogʻini rivojlantirish va undan foydalanish korxonasi majburiyatlari boʻyicha kafolatlarni Oʻzbekiston Respublikasi Hukumati nomidan imzolashga vakil qilinsin.

5. Oʻzbekiston Respublikasi Adliya vazirligi Oʻzbekiston Respublikasi Hukumati kafolatlari yuzasidan belgilangan tartibda yuridik xulosa bersin.

6. Oʻzbekiston Respublikasi Iqtisodiyot vazirligi Oʻzbekiston Respublikasi Maʼlumotlar uzatish milliy tarmogʻini zamonaviylashtirish va rivojlantirish loyihasini Oʻzbekiston Respublikasining 2002-yilgi va keyingi yillardagi investitsiya dasturining aniq roʻyxatiga kiritsin.

7. Quyidagilar:

“Oʻzimpeksaloqa” aksiyadorlik jamiyati ushbu kontrakt doirasida respublikaga import qilinadigan texnologik asbob-uskunalar va xizmatlar uchun bojxona toʻlovlari toʻlashdan ozod qilinsin, bojxona rasmiylashtiruvi uchun yigʻimlar bundan mustasno;

xorijiy bank, eksport-kredit agentligi va sugʻurta kompaniyalari ushbu loyiha doirasida Oʻzbekiston Respublikasi hududida norezidentlardan undiriladigan daromad soliqlari toʻlashdan ozod qilinsin.

8. Oʻzbekiston Respublikasi Tashqi ishlar vazirligi va Ichki ishlar vazirligi “Oʻzimpeksaloqa” aksiyadorlik jamiyati buyurtmanomalariga binoan, ushbu loyihani amalga oshirishning xorijiy qatnashchilariga tegishli ravishda koʻp martalik kelish vizalarining berilishi, muddati uzaytirilishini, shuningdek ularning vaqtinchalik roʻyxatdan oʻtkazilishini va vaqtinchalik roʻyxatdan oʻtkazish muddati uzaytirilishini taʼminlasinlar.

9. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari K.N. Toʻlaganov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2001-yil 5-dekabr,

466-son