Elchixonalar faoliyatiga taalluqli masalalarni oʻzaro tartibga solish toʻgʻrisida

23.07.1999

Oʻzbekiston Respublikasi Hukumati bilan Ozarbayjon Respublikasi Hukumati oʻrtasida

Bitim

Oʻzbekiston Respublikasi Hukumati bilan Ozarbayjon Respublikasi Hukumati, bundan keyin Tomonlar deb ataluvchilar,

suverenitet prinsiplariga, Birlashgan Millatlar Tashkiloti Nizomining qoidalariga ehtirom izhor etib, Diplomatik aloqalar toʻgʻrisida Venada 1961-yilning 18-aprelida imzolangan konvensiya hamda xalqaro huquqning boshqa meʼyorlariga asoslanib,

ikki tomonlama doʻstona aloqalarni oʻzaro hurmat, tyenglik va manfaatdorlik ruhida rivojlantirishga intilib,

Oʻzbekiston Respublikasining Boku shahridagi Elchixonasi, Ozarbayjon Respublikasining Toshkent shahridagi Elchixonasi faoliyatiga taalluqli masalalarni tartibga solishga oʻzaro harakat qilish niyatida,

quyidagilar toʻgʻrisida ahdlashib oldilar:

1-modda

Tomonlar, umum manfaatlardan kelib chiqqan holda, Oʻzbekiston Respublikasining Boku shahridagi Elchixonasi hamda Ozarbayjon Respublikasining Toshkent shahridagi Elchixonasi faoliyatiga taalluqli masalalarni tyenglik asosida hal etishga kelishib oldilar.

2-modda

Ozarbayjon Respublikasi Hukumati Oʻzbekiston Respublikasi Hukumatiga Boku shahrining Nasimiy tumani Bakixanov koʻchasidagi manzilda joylashgan № 631 dahadagi S.Gʻoziyeva istirohatgohi hududidan 0,7 ga maydondagi yer uchastkasini taqdim etadi.

Mazkur uchastkaning aniq oʻrni hamda chegaralari ushbu Bitimning ajralmas qismi hisoblanadigan tarh-rejada (1-ilova*) belgilangan.

* 1-ilova berilmaydi

Oʻzbekiston Respublikasi Hukumati Ozarbayjon Respublikasi Hukumatiga Toshkent shahar Xalqlar Doʻstligi shohkoʻchasida (Sharq tongi, № 25, 39) joylashgan 0,48 ga maydondagi yer uchastkasini taqdim etadi.

Mazkur uchastkaning aniq oʻrni hamda chegaralari ushbu Bitimning ajralmas qismi hisoblanadigan tarh-rejada (2-ilova*) belgilangan.

* 2-ilova berilmaydi

Tyenglik tartibiga rioya qilish maqsadida oʻzbek tomoni ozarbayjon tomoniga qoʻshimcha ravishda 0,22 ga yer maydoni ajratib beradi.

Tomonlar yer uchastkalarini elchixonalar binolarining, elchilarning qarorgohlari, turar joy va boshqa imoratlar qurilishi, taʼmirlanishi uchun taqdim etadilar.

Ozarbayjon Respublikasida ushbu moddada koʻrsatilgan uchastkada Oʻzbekiston Respublikasi Hukumati mablagʻiga qurilgan binolar Oʻzbekiston Respublikasining mulki hisoblanadi.

Oʻzbekiston Respublikasida ushbu moddada koʻrsatilgan uchastkada Ozarbayjon Respublikasi Hukumati mablagʻiga qurilgan binolar Ozarbayjon Respublikasining mulki hisoblanadi.

Ushbu Bitim imzolangan paytga qadar Toshkent shahar Xalqlar Doʻstligi (Sharq tongi, 25, 39) manzilida mavjud boʻlgan binolar keyinchalik sotib olish huquqi bilan Ozarbayjon Respublikasi Elchixonasiga foydalanish uchun ijaraga beriladi.

3-modda

Tomonlar yer uchastkalarini bir-birlariga 49 yil muddatga berishga kelishdilar. Er uchastkalari, shuningdek mazkur yer uchastkalarida joylashgan bino hamda inshootlar gaz, elektr energiyasi, issiq va sovuq suv, kanalizatsiya, isitish, telefon va boshqa shu kabi konkret xizmatlar haqidan tashqari davlat yoki mahalliy maʼmurlar tomonidan joriy etilgan har qanday turdagi soliqlardan ozod qilinadi.

4-modda

Tomonlar ushbu Bitimning 2-moddasida koʻzda tutilgan yer uchastkalaridan foydalanish uchun berilgan huquqlarni oʻz mamlakatlari qonunchiligiga muvofiq rasmiylashtiradilar va tegishli hujjatlarni beradilar.

5-modda

Har bir Tomon oʻz budjet mablagʻi hisobiga ishlarning qurilish pasportini tayyorlashga, shuningdek kommunal xizmatlar (elektr energiyasi, issiq va sovuq suv bilan taʼminlash, kanalizatsiya, isitish, gaz), telefon va elchixonalarga koʻrsatiladigan boshqa shu kabi xizmatlar haqini toʻlashiga rozi boʻldi.

Er uchastkasini taqdim etgan Tomonlar taqdim etilgan yer uchastkasi chegarasigacha davlat budjeti hisobidan yoʻl quradilar, muhandislik robitalari(birinchi toifa boʻyicha elektr taʼminoti, telefon aloqasi, issiq va sovuq suv taʼminoti, kanalizatsiya, isitish, gaz va b.)ni oʻtkazadilar hamda bu robitalarni shahar tarmoqlariga ulaydilar.

6-modda

Mazkur obyektlar qurilishi uchun moʻljallangan qurilish materiallari va uskunalar, bularning roʻyxati va koʻlami qurilish kontraktlarida kelishib olinadi, har qanday soliqlar, yigʻimlar va bojxona bojlaridan ozod qilinadi.

7-modda

Tomonlar elchixonalar xodimlari hamda ularning oila aʼzolariga diplomatik vakolatxonalarning xodimlariga xizmat qiladigan shifo maskanlarida bepul tibbiy xizmat koʻrsatilishini kafolatlaydilar.

8-modda

Tomonlar elchixonalar xodimlari farzandlarining davlatga qarashli maktabgacha tarbiya muassasalariga joylashtirilishini, umumtaʼlim maktablari va oʻrta oʻquv yurtlarida bepul taʼlim olishlarini kafolatlaydilar.

9-modda

Tomonlar ushbu majburiyatlarni oʻz zimmalariga oladilar:

er uchastkalaridan moʻljallanganiga binoan va ushbu Bitim shartlariga muvofiq foydalanish;

ayni davlatning shahar ijroiya maʼmurlari hamda tegishli muassasalariga qurilish, rekonstruksiya va qayta rejalashtirish uchun loyiha va boshqa hujjatlarni kelishib olish maqsadida kirishga imkon berish;

ayni davlatning yer uchastkalaridan foydalanishga daxldor barcha qonun hujjatlariga amal qilish;

er usti va yer osti robitalaridan, yoʻllardan foydalanish shartlarini foydalanish xizmatlari talablariga muvofiq bajarish, ularni taʼmirlash va tuzatishga monelik qilmaslik.

10-modda

Ushbu Bitimni amalga oshirish davomida yuzaga kelishi mumkin boʻlgan barcha bahslar Tomonlar oʻrtasida muzokaralar orqali hal etiladi.

11-modda

Tomonlar oʻzaro kelishib, ushbu Bitimga oʻzgartish va qoʻshimchalar kiritishlari mumkin. Barcha oʻzgartish va qoʻshimchalar alohida bayonnomalar tarzida rasmiylashtiriladi va ushbu Bitimning tarkibiy qismi hisoblanadi.

12-modda

Ushbu Bitim Tomonlarning uni bajarish uchun davlat ichki protseduralari bajarilganligi toʻgʻrisida bergan oxirgi bildirishnomalari sanasidan boshlab kuchga kiradi va Tomonlardan birontasi uning amal qilishi kutiladigan muddat tugashidan kamida olti oy ilgari uning amal qilishini toʻxtatish toʻgʻrisidagi niyatidan ikkinchi Tomonni diplomatik kanallar orqali yozma ravishda xabardor qilmagunicha amal qiladi.

Toshkent shahrida, 1999-yilning 23-iyulida ikki nusxada, har biri oʻzbek, ozarbayjon va rus tillarida tuzildi, bunda barcha matnlar bir xil kuchga ega

Ushbu Bitim qoidalarini talqin etishda rus tilidagi matn qoʻllanadi.

(imzolar)