Taʼlim sohasida hamkorlik toʻgʻrisida

10.01.1997

Oʻzbekiston Respublikasi Hukumati va Tojikiston Respublikasi Hukumati oʻrtasida

Bitim

Oʻzbekiston Respublikasi Hukumati va Tojikiston Respublikasi Hukumati, bundan keyin Tomonlar deb ataluvchilar,

ikki davlatlar oʻrtasidagi anʼanaviy doʻstona va birodarlik aloqalarni hisobga olgan holda,

Oʻzbekiston Respublikasi va Tojikiston Respublikasi xalqlarining milliy madaniyatlarini oʻzaro boyitish va rivojlantirishiga koʻmaklashishga intilib,

ikki mamlakatlar oʻrtasida taʼlim sohasidagi hamkorlikni va almashuvni yanada rivojlantirish va mustahkamlashga intilishni ifoda etib,

quyidagilar toʻgʻrisida kelishib oldilar:

1-modda

Tomonlar taʼlim sohasi boʻyicha tegishli davlat boshqaruv organlari oʻrtasidagi hamkorlikni teng huquqlilik va oʻzaro hurmat asosida rivojlantirishga koʻmaklashadilar.

2-modda

Tomonlarning har biri boshqa Tomonning fuqarolariga oʻqish imkoniyatini tegishli taʼlim va tarbiya muassasalarining alohida bitimlari va shartnomalari asosida oʻrnatilgan tartib va sharoitlar boʻyicha taʼminlaydi.

3-modda

Tomonlar taʼlim tizimini takomillashtirish, Tojikiston Respublikasida oʻzbek tilida va Oʻzbekiston Respublikasida tojik tilida taʼlim olish uchun darsliklarni, oʻquv-metodik adabiyotlarni tayyorlash boʻyicha oʻzaro yordam koʻrsatadilar.

4-modda

Tomonlar taʼlim muassasalari oʻrtasida bevosita aloqalarni rivojlantirishda, yoshlarga va bolalarga taʼlim-tarbiya berish masalalari boʻyicha axborot almashuvida, mutaxassislarni tayyorlashda yordam beradilar.

5-modda

Tomonlar tugallanmagan va toʻliq oʻrta, hunar-texnika taʼlimlari toʻgʻrisidagi davlat tomonidan oʻrnatilgan hujjatlarni oʻzaro tan oladilar.

Oʻrta maxsus va oliy oʻquv yurtlari, ilmiy darajalar va unvonlar haqida hujjatlarni oʻzaro tan olinishi, ularni nostrifikatsiya qilish qoidalarini tartibga soluvchi oʻzaro ishlab chiqilgan yangi Nizom asosida amalga oshiriladi.

6-modda

Ushbu Bitimdan kelib chiqadigan hamkorlikning aniq formalari va shartlari, shuningdek taʼlim sohasidagi oʻzaro manfaatli boshqa masalalar ikkala Tomonning tegishli davlat taʼlim boshqaruv organlari oʻrtasida tuzilgan alohida shartnomalar bilan tartibga solinadi.

7-modda

Tomonlar, zarurat boʻlganda, ushbu Bitimning amalga oshirilishini nazorat qiladilar va bu maqsadda kerakli tadbirlar tuzadigan oʻzaro komissiya tuzishlari mumkin.

8-modda

Ushbu Bitim imzolangan kunidan kuchga kiradi, besh yil muddatga tuzilgan boʻlib, agar imzolangan Ahdlashuvchi Tomonlar yozma ravishda Bitimning tegishli muddati tamom boʻlishidan olti oy avval uning harakatini toʻxtatish toʻgʻrisida ogohlantirmasa, ushbu Bitimning kuchi keyingi besh yillik davrlarga oʻz-oʻzidan choʻziladi.

Toshkent shahrida 1997-yil 10-yanvarda ikki nusxada, har biri oʻzbek, tojik va rus tillarida imzolangan, bunda barcha matnlar bir xil kuchga ega.

Ushbu Bitim qoidalarini talqin qilish maqsadida rus tilidagi matndan foydalaniladi.

(imzolar)