Soliq qonunlarini buzishlarga qarshi kurash sohasida hamkorlik, oʻzaro yordam va axborot almashish toʻgʻrisida

18.06.1997

Oʻzbekiston Respublikasi Hukumati va Ozarbayjon Respublikasi Hukumati oʻrtasida

Bitim

Oʻzbekiston Respublikasi Hukumati va Ozarbayjon Respublikasi Hukumati, bundan keyin Tomonlar deb ataluvchilar,

oʻz davlatlarining amaldagi milliy qonunchiligi va xalqaro majburiyatlariga rioya etib,

soliqlar sohasidagi qonun buzishlarning oldini olish, aniqlash va ularni bartaraf etish bilan bogʻliq vazifalarni samarali hal qilishdan oʻzaro manfaatdor ekanliklaridan kelib chiqib,

ushbu maqsadlarda barcha huquqiy va boshqa imkoniyatlardan foydalanilishiga muhim ahamiyat berib,

quyidagilar toʻgʻrisida kelishib oldilar:

1-modda Bitim mavzusi

1. Tomonlar vakolatli organlarining ularning vakolat doirasiga kiradigan soliqlar sohasidagi qonun buzilishlarining oldini olish, aniqlash va ularni bartaraf etish boʻyicha samarali kurashishni tashkil qilish maqsadidagi hamkorligi ushbu Bitimning mavzui hisoblanadi.

2. Ushbu Bitim qoidalari Tomonlarning ular qatnashchilari boʻlgan boshqa xalqaro shartnomalardan kelib chiqadigan huquqlari va majburiyatlariga daxl qilmaydi.

2-modda Vakolatli organlar

1. Ushbu Bitim maqsadlarida quyidagilar Tomonlarning vakolatli organlari hisoblanadi:

Oʻzbekiston Tomonidan — Oʻzbekiston Respublikasi Davlat soliq qoʻmitasi;

Ozarbayjon Tomonidan — Ozarbayjon Respublikasi Moliya vazirligi va Bosh davlat soliq inspeksiyasi.

2. Tomonlarning vakolatli organlarining rasmiy nomlari oʻzgargan taqdirda ular bu toʻgʻrida bir-birlarini diplomatik yoʻl bilan yozma ravishda darhol xabardor qiladilar.

3-modda Hamkorlik shakllari

Tomonlar ushbu Bitim doirasida hamkorlikning quyidagi shakllaridan foydalanadilar:

milliy soliq tizimlari, soliq qonunlariga kiritilgan oʻzgartirishlar va qoʻshimchalar toʻgʻrisidagi axborot, shuningdek soliqlarga doir qonun buzishlarga qarshi kurashish, soliqlarga doir qonun buzishlarga qarshi kurashishda qoʻllaniladigan axborot tizimlarini yaratish va ularning amal qilishi boʻyicha uslubiy tavsiyanomalarni almashib turish;

soliqlar sohasidagi qonun buzishlarning oldini olish, aniqlash va ularni bartaraf etishga qaratilgan tadbirlarni oʻtkazish masalalari yuzasidan bahamjihat harakat qilish;

jismoniy va yuridik shaxslarni soliqqa tortish bilan bogʻliq hujjatlarning tasdiqlangan nusxalarini belgilangan tartibda taqdim etish;

hamkorlik, kadrlar malakasini oshirish, soliqlar sohasidagi qonun buzishlarga qarshi kurashish muammolari yuzasidan ilmiy-amaliy konferensiyalar va seminarlar oʻtkazish.

Tomonlarning vakolatli organlari ushbu Bitimni bajarish bilan bogʻliq masalalar boʻyicha bir-birlari bilan bevosita muloqot qilib turadilar.

4-modda Soliqlarga doir qonun buzishlar toʻgʻrisida axborot almashish

1. Soliqlarga doir qonun buzishlar toʻgʻrisida axborot almashib turish quyidagi maʼlumotlarning taqdim qilinishini nazarda tutadi:

soliq qonunchiligini buzgan yuridik va (yoki) jismoniy shaxslarning daromadlari, soliq solinadigan baza va ulardan undiriladigan summalar, shuningdek soliqqa doir qonun buzishlarning oldini olish, aniqlash va ularni bartaraf etish maqsadida amalga oshiriladigan chora-tadbirlar toʻgʻrisidagi;

Tomonlarning yuridik va (yoki) jismoniy shaxslari tomonidan davlat va tijorat banklarida hisob raqamlarining ochilishi toʻgʻrisidagi, shuningdek soliq qonunchiligi buzilgan hollarda ushbu hisob raqamlaridagi mablagʻlar harakati toʻgʻrisidagi.

2. Ushbu moddaning 1-bandida koʻrsatib oʻtilgan talablar bir Tomonning vakolatli organi tomonidan boshqa Tomonning vakolatli organining soʻrovnomasi asosida axborotni taqdim etish soʻralayotgan Tomonning milliy qonunchiligiga va davlat manfaatlariga zid kelmaydigan boʻlsa amalga oshiriladi.

Agar Tomonlardan birining vakolatli organi unda mavjud boʻlgan axborot boshqa Tomonning vakolatli organi uchun qiziqarli boʻlishi mumkin deb hisoblasa, unda u bunday axborotni oʻz tashabbusiga koʻra taqdim etishi mumkin.

5-modda Tadbirlarni oʻtkazish

Soliq qonunini buzishgan yoki buzishda shubhalanilgan shaxslarga nisbatan soliq qonuni buzilishining oldini olish, aniqlash va uni bartaraf etish boʻyicha tadbirlarni oʻtkazishda Tomonlar vakolatli organlarining oʻzaro hamkorlik qilishiga birgalikda rejalashtirish, kuch va vositalardan foydalanish, ushbu tadbirlarning borishi va natijalari toʻgʻrisida axborot almashish kiradi.

6-modda Hujjatlarni taqdim etish

Tomonlarning vakolatli organlari soʻrovnomalar boʻyicha Tomonlarning yuridik va jismoniy shaxslarini soliqqa tortishga doir hujjatlar (schyotlar, fakturalar, yukxatlar, shartnomalar, kontraktlar, sertifikatlar, maʼlumotnomalar va boshqalar)ning, shuningdek soliqlarga doir qonun buzishlarga taalluqli masalalarga oid hujjatlarning nusxalarini bir-birlariga taqdim etadilar.

Nusxalar vakolatli shaxsning imzosi va soʻralayotgan vakolatli organning muhri bilan tasdiqlanadi.

Hujjatlar va boshqa materiallarning asl nusxalari, agar tasdiqlangan nusxalar tekshirish uchun yetarli boʻlmasa, kelishilgan muddatda taqdim etilishi mumkin.

7-modda Huquqiy va axborot xarakteridagi materiallarni almashish

Tomonlarning vakolatli organlari milliy soliq tizimlari, soliq qonunchiligi sohasidagi qonun buzishlarga doir ishlarni yurgizishning huquqiy asoslari toʻgʻrisidagi, shuningdek amaldagi meʼyoriy hujjatlarga kiritilgan oʻzgartirishlar va qoʻshimchalar haqidagi axborotni muntazam almashib turadilar;

soliq qonuni buzilishlariga qarshi kurashishni tashkil etish boʻyicha axborot tizimini yaratish va uning faoliyat koʻrsatishi masalalari boʻyicha tajriba, dasturiy taʼminot uslubiyotlari, vositalari hamda ilmiy materiallarni almashib turadilar.

8-modda Soʻrovnomaning shakli va mazmuni

1. Axborot olish uchun soʻrovnoma yozma shaklda berilishi kerak.

Kechiktirib boʻlmaydigan hollarda soʻrovnoma ogʻzaki shaklda berilishi mumkin, biroq u yozma shaklda darhol tasdiqlanishi lozim.

Soʻrovnomaning haqiqiyligiga yoki mazmuniga nisbatan shubha tugʻilgan taqdirda soʻralayotgan vakolatli organ yozma shaklda takroran tasdiqlashni iltimos qilishi mumkin.

2. Axborot olish uchun soʻrovnoma quyidagilarni oʻz ichiga olishi kerak:

soʻrayotgan vakolatli organning nomi;

soʻralayotgan vakolatli organning nomi;

soʻrovnomaning mohiyatini va uning asosini bayon etish, shuningdek soʻrovni bajarish uchun zarur boʻlgan boshqa maʼlumotlar.

9-modda Soʻrovnomani bajarish

1. Soʻrovnoma olingan sanasidan boshlab bir oydan kechikmay bajariladi. Zarurat boʻlganda vakolatli organlarning kelishuviga koʻra soʻrovnomani bajarish muddati uzaytirilishi mumkin.

Soʻralayotgan vakolatli organ zarur boʻlganda qoʻshimcha axborot soʻrashi mumkin.

2. Agar davlatning suverenitetiga yoki xavfsizligiga ziyon yetkaziladigan yoki soʻralayotgan vakolatli organning davlati qonunlariga zid keladigan boʻlsa, soʻrovnomani bajarishdan bosh tortiladi.

3. Soʻrovnomani bajarishning imkoni boʻlmaganda soʻralayotgan vakolatli organ bu haqda soʻrayotgan vakolatli organni xabardor qiladi.

10-modda Soʻrovnomani bajarishda oʻzaro hamkorlik qilish

Tomonlarning vakolatli organlari ushbu Bitimga, milliy qonunchiligiga muvofiq va oʻz vakolatlari doirasida bir-biriga koʻmaklashadilar.

Tomonlarning vakolatli organlari vakillari zarurat boʻlganda ushbu Bitimni bajarish bilan bogʻliq boʻlgan masalalarni muhokama qilish uchun uchrashuvlar oʻtkazadilar.

Ushbu Bitimning qoidalarini talqin qilishda va qoʻllanishda paydo boʻladigan bahsli masalalarni hal etish chogʻida Tomonlar oʻzaro kelishuvga erishishga intiladilar.

11-modda Tillar

Axborot olish uchun soʻrovnoma va unga javob Tomonlarning vakolatli organlari tomonidan kelishilgan tilda tuziladi.

12-modda Axborotdan foydalanish

Tomonlarning vakolatli organlari soliq qonunlarini buzishlarning oldini olish, aniqlash va ularni bartaraf etish bilan bogʻliq masalalar boʻyicha axborotning maxfiyligini kafolatlaydilar.

Ushbu Bitim doirasida olingan axborot ushbu axborotni bergan vakolatli organning yozma roziligisiz uchinchi tomonga berilishi mumkin emas.

13-modda Xarajatlar

Tomonlarning vakolatli organlari ushbu Bitimni oʻz davlatlari hududida bajarilishi bilan bogʻliq xarajatlarni zimmalariga oladilar. Qoʻshimcha xarajatlarni talab etuvchi soʻrovnomalar olingan taqdirda ularni mablagʻ bilan taʼminlash toʻgʻrisidagi masala Tomonlarning vakolatli organlari tomonidan oʻzaro ahdlashuv boʻyicha koʻrib chiqiladi.

14-modda Oʻzgartirishlar va qoʻshimchalar

Ushbu Bitimga Tomonlarning oʻzaro kelishuviga koʻra oʻzgartirishlar va qoʻshimchalar kiritilishi mumkin, ular ushbu Bitimning ajralmas qismi boʻlgan protokollar bilan rasmiylashtiriladi.

15-modda Bitimning kuchga kirishi va amal qilishining toʻxtatilishi

Ushbu Bitim Tomonlar uning kuchga kirishi uchun zarur boʻlgan ichki davlat tartib-qoidalarini bajargani toʻgʻrisidagi oxirgi yozma bildirishnoma olingan kundan boshlab kuchga kiradi va Tomonlardan biri boshqa Tomonning ushbu Bitimning amal qilishini toʻxtatish niyati haqidagi yozma bildirishnomasini olgan kundan eʼtiboran olti oygacha amalda boʻladi.

Toshkent shahrida 1997-yil 18-iyunda ikki nusxada, har biri oʻzbek, ozarbayjon va rus tillarida tuzildi, bunda barcha matnlar bir xil kuchga ega. Ushbu Bitim qoidalarini talqin qilish maqsadida rus tilidagi matndan foydalaniladi.

(imzolar)