Davlat-tijorat Xalq bankini rivojlantirish borasidagi qoʻshimcha chora-tadbirlar toʻgʻrisida (PF-2773-son)

07.12.2000

Oʻzbekiston Respublikasi Prezidentining

Farmoni

Boʻsh pul mablagʻlarining omonatlarda toʻplanishidan aholining manfaatdorligini oshirish hamda davlat-tijorat Xalq banki omonatchilarining manfaatlarini himoya qilishni kuchaytirish, uning resurs bazasini mustahkamlash maqsadida:

1. 2000—2005-yillar mobaynida Xalq bankining nizom jamgʻarmasini 10 mlrd soʻmgacha koʻpaytirib, quyidagi ulushlarda qoʻshimcha qoʻyilmalar kiritish toʻgʻrisida Oʻzbekiston Respublikasi Moliya vazirligi, Markaziy banki va davlat-tijorat Xalq bankining taklifi maʼqullansin:

Oʻzbekiston Respublikasi Moliya vazirligi (51 foiz) 3,57 mlrd soʻm:

Oʻzbekiston Respublikasi Markaziy banki (49 foiz) 3,43 mlrd soʻm.

2. Xalq banki 2005-yil 1-yanvarga qadar soliqlarning barcha turlaridan ozod qilinsin va boʻshagan mablagʻlar Oʻzbekiston Respublikasi Moliya vazirligining Xalq banki nizom jamgʻarmasidagi ulushini toʻldirishga yoʻnaltirilsin.

3. “Davlat-tijorat Xalq bankini yanada rivojlantirish chora-tadbirlari toʻgʻrisida” Oʻzbekiston Respublikasi Prezidentining 1998-yil 25-dekabrdagi PF-2162-son Farmonining 3-bandi oʻz kuchini yoʻqotgan deb hisoblansin.

4. Oʻzbekiston Respublikasi Vazirlar Mahkamasi oʻn kun muddatda mazkur Farmonni ijro etish yuzasidan qaror qabul qilsin.

5. Ushbu Farmonning ijrosini nazorat qilish Oʻzbekiston Respublikasi Bosh vazirining oʻrinbosari R.S.Azimov va Oʻzbekiston Respublikasi Markaziy bankining raisi F.M.Mullajonov zimmasiga yuklansin.

Oʻzbekiston Respublikasining Prezidenti I. KARIMOV

Toshkent sh.,

2000-yil 7-dekabr,

PF-2773-son