Tumanda toza ichimlik suvini sarflash meʼyoriy miqdorini belgilash toʻgʻrisida (254-son)

27.05.2013

Fargʻona viloyati Fargʻona tumani hokimining

Qarori

Tuman aholisini uzluksiz ichimlik suviga ehtiyoji sezilayotganligiga qaramay, suvni isrof qilish va undan nazoratsiz foydalanish holatlari koʻp uchramoqda. Bu masala oʻrganilganda, aholi tomonidan ichimlik suvini sarflanishi belgilangan amaldagi miqdoriy meʼyorlaridan 3-4 barobar ortiq ekanligi ayon boʻldi. Ayrim joylarda sugʻorish shoxobchalari yoʻqligi, mavjud ariqlarning koʻmib tashlangani tufayli yoz mavsumida aholi tomonidan tomorqalarni ichimlik suvi bilan sugʻorish va boshqa maqsadlarda foydalanish holatlari uchramoqda, shu bilan birga suv quvurlarini teshilishi, suv joʻmraklarining yaroqsizligi va suvni ochiq holda qolishi natijasida katta suv isrofgarchiligiga yoʻl qoʻyilmoqda.

Koʻrsatilgan muammolar natijasida, Fargʻona tumani “Suvoqava” ishlab chiqarish davlat korxonasi tomonidan talab darajasida uzluksiz ichimlik suvi yetkazib berishda uzilish holatlari kuzatilmoqda. Ichimlik suvini yoʻqotilishi korxonaning moliyaviy ahvoliga salbiy taʼsir koʻrsatib, ishlab chiqarish jarayonida joriy va mukammal taʼmir ishlari oʻz vaqtida bajarilmasligiga sabab boʻlmoqda.

Tumanda ichimlik suvidan samarali foydalanishni yoʻlga qoʻyish va aholi tomonidan isteʼmol qilinayotgan umumiy ichimlik suv miqdori meʼyorlarini aniqlash maqsadida Oʻzbekiston Respublikasi Vazirlar Mahkamasining 2013-yil 19-martdagi 82-sonli qarori bilan tasdiqlangan “Oʻzbekiston Respublikasida suvdan foydalanish va suv isteʼmoli tartibi toʻgʻrisida”gi Nizomning 3-bandiga asosan “Mahalliy davlat hokimiyati toʻgʻrisida”gi Qonunning 6-moddasini qoʻllab qaror qilaman:

1. Tuman “Suvoqava” ishlab chiqarish davlat korxonasi (S. Qodirov), “Mahalla” jamoat fondi tuman boʻlimi (Y. Tillaboyev) hamda tumandagi qishloq va mahalla fuqarolar yigʻinlari raislariga:

aholini xatlovdan oʻtkazishda, suv oʻlchagichlarni oʻrnatilishida amaliy yordam berish hamda joylarda ichimlik suvini behuda isrof qilmasdan, samarali foydalanishni nazorat qilish;

oʻz hududlaridagi aholiga toza ichimlik suvini isrof qilinishini oldini olish borasida yetarli tushuntirish hamda tashviqot ishlarini olib borilishini taʼminlash;

aholi tomonidan ariqlarni koʻmib oʻrniga qurilish ishlarini amalga oshirilishiga yoʻl qoʻymaslikni nazoratga olish taʼkidlab oʻtilsin.

2. Tuman aholisi uchun toza ichimlik suvini sarflanish miqdori meʼyori tuman “Suvoqava” ishlab chiqarish davlat korxonasining 2013-yil 26-apreldagi 33-sonli taqdim etgan xatiga asosan quyidagicha belgilansin:

xovli uy joyda yashovchi xar bir kishi uchun ajratilgan umumiy ichimlik suvi sarflanish meʼyori — 15 m3/oy miqdorida;

koʻp qavatli uylarda yashovchi xar bir kishi uchun ajratilgan umumiy ichimlik suvi sarflanish meʼyori — 10 m3/oy miqdorida;

koʻcha joʻmraklaridan foydalanuvchi xar bir kishi uchun ajratilgan umumiy ichimlik suvi sarflanish meʼyori — 5 m3/oy miqdorida etib belgilansin.

3. Tuman obodonlashtirish boshqarmasi (X. Ashuraliyev)ga tuman markaziy koʻchalarida va boshqa hududlardagi obodonlashtirish maydonlarini sugʻorilishini taʼminlash vazifasi topshirilsin.

4. Tumandagi mulkchilik shaklidan qatʼi nazar, barcha korxona, tashkilot va muassasalar rahbarlariga:

oʻz hududlaridagi obodonlashtirish maydonlarini, gulxonalarni sugʻorish ishlarini olib borilishini yoʻlga qoʻyish hamda suv isrofgarchiligiga yoʻl qoʻymasliklari tavsiyaviy xususiyatga ega ekanligi eslatib oʻtilsin.

5. Ushbu qaror rasman eʼlon qilingan kundan boshlab kuchga kiradi.

6. Mazkur qarorning bajarilishini nazorat qilib borishni oʻz zimmamda qoldiraman.

Hokim S. IMOMALIYEV

Vodil sh.,

2013-yil 27-may,

254-son