Valyuta, eksport-import nazorati sohasida hamkorlik va oʻzaro yordam toʻgʻrisida

26.02.1998

Oʻzbekiston Respublikasi Hukumati va Ozarbayjon Respublikasi Hukumati oʻrtasida

Bitim

Oʻzbekiston Respublikasi Hukumati va Ozarbayjon Respublikasi Hukumati, bundan keyin Tomonlar deb ataluvchilar,

valyuta va eksport sohasidagi qonunlarni buzilishlarga qarshi kurash samaradorligini oshirish maqsadida, shuningdek noqonuniy ravishda orttirilgan kapitalni qonunlashtirishga qarshi kurash boʻyicha xalqaro hamjamiyatning saʼy-harakatlariga katta ahamiyat berib,

Tomonlarning valyuta va eksport nazoratini amalga oshiruvchi vakolatli organlari oʻrtasidagi hamkorlikning zarurligini tan olib,

quyidagilar toʻgʻrisida kelishib oldilar:

1-modda

Tomonlarning vakolatli organlari oʻz davlatlarining qonunlariga muvofiq quyidagilarni amalga oshiradilar:

1) axborot bilan almashish:

huquqiy xarakterdagi (valyuta, eksport-import va boshqa tashqi iqtisodiy operatsiyalar sohasidagi milliy qonunlar);

valyuta, eksport-import va boshqa tashqi iqtisodiy operatsiyalar sohasida ushbu davlatlarning milliy qonunlariga rioya qilish ustidan nazorat tizimini barpo etish va uning ishlashi boʻyicha;

valyuta, eksport-import va boshqa tashqi iqtisodiy operatsiyalar sohasida milliy qonunlarning buzilishi toʻgʻrisida.

2) Oʻzbekiston Respublikasi va Ozarbayjon Respublikasi yuridik va jismoniy shaxslari tomonidan valyuta, eksport-import va boshqa tashqi iqtisodiy operatsiyalarni amalga oshirishda qonunlarining buzilishini birgalikda oshkor etish va toʻxtatish boʻyicha hamkorlik;

3) valyuta va eksport nazorati sohasida Tomonlarining oʻzaro manfaatlariga daxldor muammolar boʻyicha qoʻshma tahliliy tadqiqotlar olib borish;

4) yordam koʻrsatish:

valyuta nazorati sohasida mutaxassislarni tayyorlashda;

valyuta nazorati sohasidagi vazifalarni bajarishni taʼminlovchi axborot tizimlarini barpo etish.

2-modda

Tomonlar axborot taqdim etishning quyidagi tartibini belgilaydilar:

1) axborot bilan almashish yozma soʻrovlar asosida amalga oshiriladi;

2) soʻrovda quyidagi maʼlumotlar boʻlishi kerak:

soʻrayotgan organning nomi;

soʻrov yuborilayotgan organning nomi;

so'rovni asoslash, zarurat boʻlganda, tasdiqlovchi hujjatlar nusxalarining ilovasi bilan;

3) ushbu Bitim doirasida olingan axborotni uchinchi tomonga joʻnatish zarur boʻlgan holda bu axborotni bergan Tomonning yozma roziligi talab qilinadi.

3-modda

Amaliy yordam koʻrsatish quyidagi yoʻllar bilan amalga oshiriladi:

ishchi tashriflarini tashkil etishga, huquqiy maqomi va vazifalari Tomonlarning vakolatli organlari tomonidan belgilanadigan vakillar bilan almashishga koʻmaklashish;

seminarlar oʻtkazish;

metodik tavsiyalarni ishlab chiqish va ular bilan almashish.

4-modda

Ushbu Bitimni amalga oshirish uchun ikkala Tomonning valyuta va eksport nazoratini amalga oshiruvchi vakolatli organlari tomonidan uni amalga oshirish tartibi va birgalikdagi harakatning aniq yoʻnalishlari boʻyicha rivojlanish toʻgʻrisida protokollar imzolanadi.

5-modda

Tomonlar qonuniylik, oʻzarolik, tezkorlik va maxfiylik prinsiplari asosida hamkorlik qiladilar.

6-modda

Ushbu Bitimga Tomonlarning oʻzaro kelishuvi boʻyicha uning ajralmas qismi hisoblanadigan alohida protokollar bilan rasmiylashtiriladigan oʻzgartish va qoʻshimchalar kiritilishi mumkin.

7-modda

Ushbu Bitimni bajarishda va talqin qilishda yuzaga kelishi mumkin boʻlgan barcha bahsli masalalar Tomonlar oʻrtasidagi maslahatlashish va muzokaralar yoʻli bilan hal etiladi.

8-modda

Ushbu Bitim Tomonlar uning kuchga kirishi uchun zarur boʻlgan davlat ichki protseduralarini bajarganliklari toʻgʻrisidagi oxirgi yozma bildirishnoma sanasidan boshlab kuchga kiradi.

Ushbu Bitim Tomonlardan biri boshqa Tomonning uning amal qilishini toʻxtatish niyati toʻgʻrisidagi yozma bildirishnomani olgan sanadan boshlab olti oy oʻtguniga qadar amal qiladi.

Baku shahrida 1998-yil 26-fevralda ikki nusxada, har biri oʻzbek, ozarbayjon va rus tillarida tuzildi, barcha matnlar bir xil kuchga ega.

Ushbu Bitim qoidalarini talqin qilishda kelishmovchiliklar yuzaga kelgan holda rus tilidagi matndan foydalaniladi.

(imzolar)