Tovarlar (ishlar, xizmatlar)ni eksport va import qilishda bilvosita soliqlar undirish prinsiplari toʻgʻrisida

20.09.1997

Oʻzbekiston Respublikasi Hukumati bilan Qirgʻiziston Respublikasi Hukumati oʻrtasida

Bitim

Oʻzbekiston Respublikasi Hukumati va Qirgʻiziston Respublikasi Hukumati, bundan keyin Ahdlashuvchi Tomonlar deb ataluvchilar,

Oʻzbekiston Respublikasi va Qirgʻiziston Respublikasi oʻrtasida tenglik va oʻzaro manfaatdorlik asosida savdo-iqtisodiy hamkorlikni rivojlantirishga intilib,

xalqaro savdo-sotiqning umumiy ravishda qabul qilingan norma va qoidalarini nazarda tutib,

quyidagilar toʻgʻrisida ahdlashdilar:

1-modda Umumiy taʼriflar

Ushbu Bitim maqsadlarida:

a) "bilvosita soliqlar" atamasi — qoʻshilgan qiymat soligʻini va aksiz soligʻini anglatadi;

b) "nol stavka" atamasi — Ahdlashuvchi Tomonlarning soliq qonunchiligiga muvofiq qoʻshilgan qiymatga nol foiz stavkasi boʻyicha soliq solishni anglatadi;

v) "vakolatli organ" atamasi — Ahdlashuvchi Tomonlarning moliya vazirliklarini anglatadi.

2-modda Eksport qilishda soliqni undirish prinsipi

1. Ahdlashuvchi Tomonlardan biri boshqa Ahdlashuvchi Tomonga eksport qilinayotgan tovarlar (ishlar, xizmatlar)ga bilvosita soliq solmaydi.

2. Ushbu moddaning 1-bandi qoidasi qoʻshilgan qiymat soligʻiga nisbatan nol stavka qoʻllanilishini anglatadi.

3-modda Import qilishda soliqni undirish prinsipi

1. Ahdlashuvchi Tomonlardan birining hududidan eksport qilinib boshqa Ahdlashuvchi Tomon hududiga import qilingan tovarlar (ishlar, xizmatlar)ga import qiluvchi mamlakatda uning qonunchiligiga muvofiq soliq solinadi. Bilvosita soliqlar solish Ahdlashuvchi Tomonning boj olinadigan hududiga tovarlar import qilinganda import qiluvchi Tomonning bojxona organlari tomonidan amalga oshiriladi.

2. Boshqa Ahdlashuvchi Tomon hududidan eksport qilingan tovarlar (ishlar, xizmatlar) importiga soliq solishda Ahdlashuvchi Tomonlar Ahdlashuvchi Tomonlarning qonunchiligi bilan belgilangan soliq stavkalarini qoʻllashadi.

3. Import qilinayotgan tovarlar boʻyicha qoʻshilgan qiymat soligʻi, aksiz soligʻi va bojxona poshlinalarini chegirmasdan, tovarlarning bojxona qiymatidan undiriladi.

4-modda Nizoli masalalarni hal etish

1. Ahdlashuvchi Tomonlar oʻrtasidagi ushbu Bitim qoidalarini qoʻllash chogʻidagi kelishmovchiliklar Ahdlashuvchi Tomonlarning vakolatli organlari oʻrtasidagi maslahatlashuvlar va muzokaralar yoʻli bilan hal etiladi.

2. Ahdlashuvchi Tomonlar uchinchi mamlakatlar bilan savdo-sotiq qilishda oʻz qonunchiligi doirasida bilvosita soliq solishning oʻxshash tizimini yaratishga qaratilgan kelishilgan harakatlar qiladilar. Vakolatli organlar, soliq qonunchiligiga rioya etish masalalari boʻyicha hamkorlik va oʻzaro yordam sohasida ilgari erishilgan ahdlashuvlar qoidalarini hisobga olgan holda, ushbu bandning amal qilish aniq tartibini ishlab chiqadilar.

5-modda Bitimning kuchga kirishi

1. Ushbu Bitim Ahdlashuvchi Tomonlar oʻz milliy qonunchiligiga muvofiq ushbu Bitimning kuchga kirishi uchun zarur boʻlgan barcha ichki davlat tartib-qoidalarini bajarganligi toʻgʻrisida diplomatik notalar ayirboshlagan sanadan eʼtiboran kuchga kiradi va Ahdlashuvchi Tomonlardan biri Bitimning amal qilishini toʻxtatish niyati toʻgʻrisidagi yozma bildirishnomani yuborgan sanadan boshlab oʻn ikki oy oʻtgungacha oʻz kuchida qoladi.

2. Ushbu Bitim faqat u kuchga kirgandan keyin etkazib berilgan tovarlar (ishlar, xizmatlar)ga nisbatan qoʻllanadi.

1997-yil 20-sentyabrda Bishkek shahrida har biri oʻzbek, qirgʻiz va rus tillarida boʻlgan ikki nusxada tuzildi, barcha matnlar bir xil kuchga ega. Ushbu Bitim qoidalarini talqin qilishda rus tilidagi matndan foydalaniladi.

(imzolar)