Avtomobil transportida xalqaro yoʻlovchilar va yuklarni tashish toʻgʻrisida

20.02.1997

Oʻzbekiston Respublikasi Hukumati va Litva Respublikasi Hukumati oʻrtasida

Bitim

Oʻzbekiston Respublikasi Hukumati va Litva Respublikasi Hukumati, keyingi oʻrinlarda Ahdlashuvchi Tomonlar deb ataluvchilar,

oʻzaro doʻstlik asosida har ikki mamlakat oʻrtasida va ular hududlari boʻyicha tranzit tarzda avtomobilda yoʻlovchilar va yuklarni tashishga xohish bildirib, shuningdek bu tashishlarni osonlashtirishni istab,

quyidagilar toʻgʻrisida kelishib oldilar:

1-modda

Ushbu Bitimga muvofiq ravishda Ahdlashuvchi Tomonlar hududlarida roʻyxatga olingan avtotransport vositalari bilan har ikki davlat oʻrtasida va ular orqali tranzit tarzda, xalqaro avtomobil aloqalari uchun yoʻllar boʻylab yoʻlovchilar va yuklarni muntazam va nomuntazam tashish amalga oshiriladi.

I. YOʻLOVChILAR TAShISh

2-modda

1. Ahdlashuvchi Tomonlar oʻrtasida yoʻlovchilarni muntazam tashishlarni amalga oshirish uchun Ahdlashuvchi Tomonlar vakolatli organlari tomonidan beriladigan ruxsatnomalar talab etiladi. Ruxsatnomalar vakolatli organlar kelishgan tartibda va 3 yilgacha davrga beriladi.

2. Bunday tashishlarni tashkil etish haqidagi takliflar Ahdlashuvchi Tomonlarning vakolatli organlari tomonidan bir-birlariga oldindan beriladi. Bu takliflarda quyidagi maʼlumotlar boʻlishi kerak: tashuvchining (firma) nomi va manzili, yurish yoʻnalishi, harakat jadvali, chegarani kesib oʻtishning moʻljallanayotgan vaqti, tarif, tashuvchi yoʻlovchilarni chiqarish va tushirishni amalga oshiradigan toʻxtash punktlari, shuningdek tashishlarni bajarishning moʻljallanayotgan davri va muntazamligi.

3-modda

1. Ahdlashuvchi Tomonlar oʻrtasida yoki ular hududlari boʻylab tranzit tarzda yoʻlovchilarni nomuntazam tashishlarni amalga oshirish uchun Ahdlashuvchi Tomonlarning vakolatli organlari beradigan ruxsatnomalar talab etiladi, ushbu Bitimning 4-moddasida koʻzda tutilgan tashishlar bundan mustasnodir.

2. Ushbu moddaning 1-bandida koʻzda tutilgan yoʻlovchilarni nomuntazam tashishni amalga oshirishga ruxsatnoma berish haqidagi iltimosnoma tashuvchi tomonidan oʻz mamlakati vakolatli organiga yoʻllanadi, u esa bu iltimosnomani ikkinchi Ahdlashuvchi Tomon vakolatli organiga joʻnatadi.

3. Yoʻlovchilarni har bir tashish uchun alohida ruxsatnoma berilishi kerak, u agar ruxsatnomaning oʻzida boshqa narsa qayd etilmagan boʻlsa, u tomonga va orqaga bitta qatnovni amalga oshirish huquqini beradi, ushbu Bitimning 4-moddasida koʻzda tutilgan tashishlar bundan mustasnodir.

Ruxsatnomada tashishlarning xarakteri va avtotransport vositasining boradigan mamlakatda boʻlishi davomiyligi haqidagi maʼlumotlar boʻlishi kerak.

4. Tomonlarning vakolatli organlari har yili bir-birlariga yoʻlovchilarni muntazam tashish uchun oʻzaro kelishilgan miqdordagi blankalarni beradilar. Bu blankalarda ruxsatnomani bergan vakolatli organning muhri va masʼul shaxsning imzosi boʻlishi kerak.

4-modda

1. Quyidagi hollarda yoʻlovchilarni nomuntazam tashishlarni bajarishga ruxsatnoma talab etilmaydi:

a) agar bitta tarkibdagi guruh avtotransport vositasi roʻyxatga olingan Ahdlashuvchi Tomon mamlakati hududida boshlangan va tugallanadigan butun safar davomida bitta avtotransport vositasida tashilsa;

b) yoʻlovchilarni nomuntazam tashish avtotransport vositasi roʻyxatga olingan Ahdlashuvchi Tomon hududida boshlanib, ikkinchi Ahdlashuvchi Tomon hududida tugallansa, avtotransport vositasi u roʻyxatga olingan mamlakatga boʻsh qaytish sharti bilan;

v) avval xuddi shu tashuvchi avtotransport vositasi bilan olib borib qoʻyilgan yoʻlovchilar guruhi avtotransport vositasi roʻyxatga olingan mamlakatga tashiladigan boshqa Ahdlashuvchi Tomon hududiga avtotransport vositasi boʻsh yuborilganda.

2. Nosoz avtotransport vositasi boshqasiga almashtirilganda ham ruxsatnoma talab etilmaydi.

3. Ushbu moddaning 1-bandida koʻzda tutilgan tashishlarni bajarganda, avtotransport vositasi haydovchisi yoʻlovchilarning roʻyxatiga ega boʻlishi kerak.

II. YuKLARNI TAShISh

5-modda

1. Ahdlashuvchi Tomonlar oʻrtasida yuklarni tashish avtotransport vositalari bilan ruxsatnomasiz amalga oshiriladi.

2. Ahdlashuvchi Tomonlar hududlari boʻyicha tranzit tarzda oʻtadigan va uchinchi mamlakatga tranzit tarzda boradigan yoki uchinchi mamlakatdan keladigan yuklarni tashish avtotransport vositalari bilan Ahdlashuvchi Tomonlar vakolatli organlari bergan ruxsatnomalar asosida amalga oshiriladi, ushbu Bitimning 6-moddasida koʻzda tutilgan tashishlar bundan mustasnodir.

3. Ushbu moddaning 2-bandida koʻzda tutilgan yuklarni har bir tashish uchun alohida ruxsatnoma boʻlishi kerak. U, agar ruxsatnomaning oʻzida boshqa narsa qayd etilgan boʻlmasa, u tomonga va orqaga bitta qatnovni amalga oshirish huquqini beradi.

Ruxsatnoma har bir avtotransport vositasiga beriladi va bu ruxsatnoma berilgan tashuvchi uchungina haqiqiydir.

4. Ahdlashuvchi Tomonlarning vakolatli organlari har yili bir-birlariga oʻzaro kelishilgan miqdorda tranzit tarzda va uchinchi mamlakatlarga yoki uchinchi mamlakatlardan yuklarni tatishga ruxsatnoma blanklarini beradilar. Bu blanklarda Ruxsatnoma bergan vakolatli organ muhri va masʼul shaxsning imzosi boʻlishi kerak.

6-modda

1. Ushbu Bitimning 5-moddasida koʻrsatilgan ruxsatnomalar quyidagi tashishlarni bajarishga talab etilmaydi:

a) koʻchayotganda koʻchadigan mulkni tashishda;

b) yarmarka va koʻrgazmalar uchun moʻljallangan eksponatlar, uskunalar va materiallarni tashishda;

v) sport tadbirlarini oʻtkazish uchun moʻljallangan transport vositalari, hayvonlar, shuningdek turli jihozlar va mulkni tashishda;

g) teatr dekoratsiyalari va rekvizitlari, musiqa asboblari, kino suratga olish, radioeshittirishlari va televizion koʻrsatuvlar uchun moʻljallangan uskunalar va buyumlarni tashishda;

d) vafot etganlarning jasadlari va xokini tashishda;

e) 3,5 tonnagacha yuk koʻtaradigan va umumiy ogʻirligi 6 tonnagacha boʻlgan avtomobillar bilan yuk tashishda;

j) shikastlangan avtotransport vositalarini tashishda;

z) pochtani tashishda;

i) insonparvarlik yordami koʻrsatish uchun moʻljallangan yuklarni tashishda.

2. Yuk avtotransport vositasi roʻyxatga olingan mamlakatga qaytarilishi kerak boʻlgan yoki yuk uchinchi mamlakat hududiga tashilishi kerak boʻlgan hollardagina ushbu moddaning b-, v-, g-kichik bandlarida nazarda tutilgan istisnolar amal qiladi.

7-modda

1. Bitta Ahdlashuvchi Tomon avtotransport vositalari bilan xavfli yuklarni ikkinchi Ahdlashuvchi Tomon hududi boʻylab tashish ikkinchi Ahdlashuvchi Tomon vakolatli organlari beradigan maxsus ruxsatnomalar boʻyicha amalga oshiriladi.

2. Yuk ortilgan yoki boʻsh avtotransport vositasi oʻlchamlarining yuk ogʻirligi ikkinchi Ahdlashuvchi Tomon Milliy qonunlarida belgilangan oʻlchamlardan ortiq boʻlgan hollarda, tashuvchi ikkinchi Ahdlashuvchi Tomon vakolatli organlaridan maxsus ruxsatnoma olishi kerak.

3. Agar ushbu moddaning 1- va 2-bandlarida koʻrsatilgan ruxsatnomalarda tashishning muayyan yoʻnalishlari belgilangan boʻlsa, tashish ana shu yoʻnalishlar boʻyicha amalga oshiriladi.

8-modda

Ushbu Bitimda koʻzda tutilgan yuklarni tashish umumiy qabul qilingan xalqaro namunaga mos shakldagi nakladnoylar boʻyicha amalga oshirilishi kerak.

III. UMUMIY QOIDALAR

9-modda

Ushbu Bitimga muvofiq tashishlarni bajarayotgan avtotransport vositalari soliqlar va yigʻimlardan ozod qilinadi, pulli yoʻllardan foydalanganlik va 7-moddaning 2-bandida koʻrsatilgan tashishlar uchun yigʻimlardan tashqari.

10-modda

1. Xalqaro tashishlarni amalga oshiradigan avtotransport vositalari oʻz mamlakatlarining roʻyxatga olish va farqlovchi belgilariga ega boʻlishi kerak.

Yuk avtomobillari yoki avtomobil shatakchilari Ahdlashuvchi Tomonlar davlatlarining roʻyxatga olish va farqlovchi belgilariga ega boʻlgandagina tirkamalar va yarim tirkamalar boshqa mamlakatlarning roʻyxatga olish va farqlovchi belgilariga ega boʻlishi mumkin.

2. Ushbu Bitimda koʻzda tutilgan tashishlar faqat oʻz mamlakati qonunlariga muvofiq xalqaro tashishlarni amalga oshirishga qoʻyilgan tashuvchilar tomonidan bajarilishi mumkin.

11-modda

Bitta Ahdlashuvchi Tomon tashuvchilariga, agar ikkinchi Ahdlashuvchi Tomon vakolatli organining maxsus ruxsatnomasini olmagan boʻlsalar, ikkinchi Ahdlashuvchi Tomon hududida joylashgan ikki punkt orasida, shuningdek ikkinchi Ahdlashuvchi Tomon hududidan uchinchi mamlakat hududiga va uchinchi mamlakat hududidan ikkinchi Ahdlashuvchi Tomon hududiga yoʻlovchilar tashishni amalga oshirishga ruxsat etilmaydi.

12-modda

Ushbu Bitim asosida yoʻlovchilar va yuklarni tashish fuqarolik masʼuliyati albatta sugʻurta qilingandagina amalga oshiriladi. Tashuvchi ushbu tashishlarni bajarayotgan har bir avtotransport vositasini oldindan sugʻurta qilishga majburdir.

13-modda

1. Ushbu Bitim qoidalari buzilgan holda avtotransport vositasi roʻyxatga olingan Ahdlashuvchi Tomon vakolatli organlari hududida, qoida buzilgan ikkinchi Ahdlashuvchi Tomon vakolatli organlari iltimosiga koʻra, amaldagi qonunlardan qatʼi nazar, quyidagi tadbirlardan birini bajarishga majburdirlar:

a) tashuvchiga ogohlantirish berish;

b) tashuvchiga qoidabuzarlik takrorlangan holda tashishlarni amalga oshirishga ruxsatnoma muayyan muddatga bekor qilinadi yoxud mazkur moddaning v) kichik bandiga muvofiq bekor qilinadi degan mazmunda ogohlantirish berish;

v) ushbu Bitim asosida berilgan ruxsatnomani muayyan muddatga bekor qilish yoxud bekor qilish.

2. Ahdlashuvchi Tomonlarning vakolatli organlari koʻrilgan choralar haqida bir-birlarini xabardor qiladilar.

3. Ushbu modda qoidalari hokimiyat organlarining Ahdlashuvchi Tomonlar qonunlari va boshqa huquqiy aktlari bilan ana shu qonunlar va huquqiy aktlarni buzuvchilarga nisbatan belgilanadigan jazolarni qoʻllash huquqlarini cheklamaydi.

14-modda

1. Chegara, bojxona va sanitariya nazoratiga nisbatan Ahdlashuvchi Tomonlar qatnashchilari boʻlgan xalqaro bitimlar qoidalari qoʻllanadi, bu bitimlar bilan tartibga solinmagan masalalarni hal etganda esa har ikki Ahdlashuvchi Tomonlardan har birining ichki qonunlari qoʻllanadi.

2. Vakolatli organlar tomonidan Ahdlashuvchi Tomonlardan birining hududidan u yoki bu turdagi yukning tranzit tarzda oʻtishi va tashilishi toʻla yoki vaqtincha toʻxtatilgan holda Tomonlar bu haqda bir-birlarini oʻz vaqtida xabardor qiladilar.

15-modda

Ogʻir kasallarni tashishda, avtobuslar bilan yoʻlovchilarni muntazam tashishlarda, shuningdek hayvonlar va tez buziladigan yuklarni tashishda chegara, bojxona va sanitariya nazorati navbatdan tashqari amalga oshiriladi.

16-modda

1. Ushbu Bitimga asosan tashishlarni bajarayotganda ikkinchi Ahdlashuvchi Tomon hududiga olib kirilayotgan quyidagi narsalar bojxona yigʻimlari, bojlar va ruxsatnomalardan oʻzaro ozod qilinadi:

a) har bir avtotransport vositasi modeli uchun moʻljallangan, texnologiyasi va konstruksiyasi jihatidan motorni yonilgʻi bilan taʼminlash tizimi bilan bogʻliq sigʻimlardagi yonilgʻi.

Bu faqat avtomobillarda va avtomobil shatakchilarida oʻrnatilgan sigʻimlardagi yonilgʻiga, shuningdek tirkamalarda va yarim tirkamalarda oʻrnatilgan hamda refrijeratorlar sovutish qurilmalari ishlashi uchun moʻljallangan sigʻimdagi yonilgʻiga taalluqli boʻladi;

b) tashish vaqtida ishlatish uchun zarur miqdordagi moylash materiallari;

v) tashishni amalga oshirayotgan shikastlangan avtotransport vositasini taʼmirlash uchun moʻljallangan ehtiyot qismlar va asboblar.

2. Foydalanilmagan ehtiyot qismlar orqaga olib chiqib ketilishi, almashtirilgan ehtiyot qismlar esa mamlakatdan olib chiqib ketilishi yoxud tegishli Ahdlashuvchi Tomon hududida belgilangan tartibda topshirilishi yoki yoʻq qilinishi kerak.

17-modda

1. Avtobus yoki yuk avtomobili haydovchisi u boshqarayotgan avtotransport vositasi toifasiga mos boʻlgan milliy yoki xalqaro haydovchilik guvohnomasiga hamda avtotransport vositasini milliy roʻyxatga olish hujjatlariga ega boʻlishi kerak.

2. Milliy yoki xalqaro haydovchilik guvohnomalari yoʻl harakati haqidagi Xalqaro konvensiya belgilagan namunaga mos kelishi kerak.

18-modda

Ushbu Bitim doirasida amalga oshiriladigan toʻlovlar Ahdlashuvchi Tomonlar oʻrtasida amal qilayotgan toʻlovlar haqidagi bitimga muvofiq toʻlov kunida bajariladi.

19-modda

Ahdlashuvchi Tomonlardan birining davlat hududida roʻyxatga olingan tashuvchi va avtotransport vositalari ekipaji avtotransport vositasi hududida boʻlgan mamlakatning harakat qoidalari va qonunlariga rioya etishga majburdir.

20-modda

Ushbu Bitim, shuningdek har ikki Ahdlashuvchi Tomon qatnashchilari boʻlgan xalqaro bitimlar bilan tartibga solinmagan masalalar har bir Ahdlashuvchi Tomonning ichki qonunlariga muvofiq hal etiladi.

21-modda

1. Ushbu Bitimni bajarish manfaatlari yoʻlida, shuningdek ushbu Bitimni qoʻllash yoki talqin qilish bilan bogʻliq barcha bahsli masalalarni hal etish uchun Ahdlashuvchi Tomonlar Tomonlarning vakolatli organlari vakillaridan iborat Qoʻshma komissiya tuzadilar.

2. Qoʻshma komissiya Ahdlashuvchi Tomonlardan birining iltimosiga koʻra navbati bilan ulardan har birining hududida chaqiriladi.

3. Agar bir Ahdlashuvchi Tomon ushbu Bitimni oʻzgartirish yoki toʻldirishni taklif etsa, Ahdlashuvchi Tomonlarning Qoʻshma komissiyasi moʻljallanayotgan oʻzgarish yoki qoʻshimchalar xususida muzokaralar oʻtkazadi.

Oʻzgarishlar va qoʻshimchalar ular diplomatik kanallar boʻyicha notalarni ayirboshlash orqali tasdiqlangandan keyin kuchga kiradi.

22-modda

Ushbu Bitim Ahdlashuvchi Tomonlar qatnashchilari boʻlgan, ular tuzgan boshqa ikki tomonlama yoki koʻp tomonlama shartnomalardan kelib chiqadigan Ahdlashuvchi Tomonlar huquqlari va majburiyatlarini vujudga keltirmaydi va oʻzgartirmaydi.

23-modda

1. Ushbu Bitim Ahdlashuvchi Tomonlar bir-birlarini diplomatik kanallar boʻyicha uning kuchga kirishi uchun zarur boʻlgan barcha ichki davlat talablari bajarildi deb xabardor qilgan kundan boshlab 30 (oʻttiz) kun oʻtgandan keyin kuchga kiradi.

2. Ushbu Bitim 5 (besh) yilga tuziladi va Ahdlashuvchi Tomonlardan biri Bitim tugashidan kamida 3 (uch) oy oldin ikkinchi Ahdlashuvchi Tomonni ushbu Bitimning amal qilishini toʻxtatish niyati haqida xabardor qilmasa, bundan keyin uning amal qilishi navbatdagi yillik davrlarga avtomatik ravishda uzaytiriladi.

Toshkent shahrida 1997-yil 20-fevralda ikki haqiqiy nusxada, har biri oʻzbek, litva va rus tillarida tuzildi, bunda barcha matnlar bir xil kuchga ega. Ushbu Bitim qoidalarini talqin qilishda kelishmovchiliklar yuzaga kelsa, rus tilidagi matn asos qilib olinadi.

(imzolar)

Oʻzbekiston Respublikasi Hukumati va Litva Respublikasi Hukumati oʻrtasida avtomobil transportida xalqaro yoʻlovchilar va yuklarni tashish toʻgʻrisida Bitimni qoʻllash haqida

IJROIYA PROTOKOLI

Ushbu Protokol Toshkent shahrida 1997-yil 20-fevralda imzolangan Oʻzbekiston Respublikasi Hukumati va Litva Respublikasi Hukumati oʻrtasida avtomobil transportida xalqaro yoʻlovchilar va yuklarni tashish toʻgʻrisidagi Bitimning ajralmas qismi hisoblanadi.

Ushbu Bitimni qoʻllash maqsadida quyidagilar toʻgʻrisida kelishib olindi:

1. Vakolatli organlar deganda quyidagilarni tushunish kerak:

Oʻzbekiston Respublikasi tomonidan:

a) 2-, 3-, 5-, 7-, 11-, 13-, 17-, 21-moddalar boʻyicha — Oʻzbekiston Respublikasi Avtomobil transporti davlat-Aksionerlik korporatsiyasi: 700000, Toshkent sh., Amir Temur koʻchasi, 6, tel. 33-61-48, faks 33-15-25;

b) 13-, 17-moddalar boʻyicha — Oʻzbekiston Respublikasi Ichki ishlar vazirligi: 700000, Toshkent sh., Navroʻz koʻchasi, 1, tel. 33-41-35 va “Oʻzavtoyoʻl” davlat-aksionerlik konserni: 700000, Toshkent sh., Pushkin koʻchasi, 68-a, tel. 39-14-06, 39-45-87, faks 68-27-11.

Litva Respublikasi tomonidan:

a) 2-, 3-, 5-, 11-, 13-, 21-moddalar boʻyicha — Litva Respublikasi Aloqa yoʻllari vazirligi Yoʻl transporti departamenti: 2679, Vilnyus sh., Gedimino prospekti, 17, tel.62-65-90, faks 61-69-09, 22-43-35;

b) 7-moddaning 1-bandi boʻyicha:

1-xavfli darajadagi yuklar boʻyicha — Litva Respublikasi Oʻlka himoya vazirligi Transportirovka xizmati: 2009, Vilnyus sh., Basanavichyaus koʻchasi, 22/2, tel. 62-68-19, faks 65-03-55;

II-IX xavfli darajadagi yuklar boʻyicha — Litva Respublikasi Atrof muhitni muhofaza qilish vazirligi: 2600, Vilnyus sh., Iozapavichyaus koʻchasi, 9, tel. 72-84-42, faks 72-80-20;

7-moddaning 2-bandi boʻyicha — Litva Respublikasi Yoʻl transporti davlat inspeksiyasi: Vilnyus sh., Shvitrigaylos koʻchasi, 42/31, tel. 23-21-90. faks 23-22-70 va Litva Respublikasi Ichki ishlar vazirligi Yoʻl politsiya boshqarmasi: 2015, Vilnyus sh., Giraytes koʻchasi, 3, tel. 69-89-64, faks 23-32-31

2. Quyidagilarni tushunish kerak:

2.1. “avtotransport vositasi” atamasi ostida:

yuklar tashishda — yuk avtomobili, tirkamali yuk avtomobili, shatakchi avtomobil yoki yarim tirkamali shatakchi avtomobilni;

yoʻlovchilar tashishda — yoʻlovchilarni tashishga moʻljallangan va haydovchi joyini hisoblamaganda kamida 8 oʻringa ega boʻlgan avtotransport vositasi, shuningdek yuk tashish uchun tirkamani;

2.2. “muntazam tashishlar” atamasi ostida — Ahdlashuvchi Tomonlarning avtotransport vositalari tomonidan oldindan kelishilgan jadval, yurish yoʻnalishi boʻyicha harakatning boshlanadigan va tugaydigan punktlari va toʻxtash punktlari koʻrsatilgan holda amalga oshiriladigan tashishlarni;

2.3. “nomuntazam tashishlar” atamasi ostida — barcha boshqa tashishlarni;

2.4. “tranzit tashishlar” atamasi ostida — Ahdlashuvchi tomonlardan birining hududi orqali yoʻlovchilar va yuklarni tashishlarni, bunda joʻnatish va borish punktlari bu Ahdlashuvchi Tomon hududidan tashqarida boʻladi.

3. Ushbu Bitimning 2-, 3-, 4-, 5-, 6-, 7-moddalarida eslatib oʻtilgan ruxsatnomalar blankalarini ayirboshlash shartlari va ulardan foydalanish tartibini ushbu Bitimning 21-moddasiga binoan tashkil etilgan Qoʻshma komissiya belgilaydi.

4. Bitimning 14- va 15-moddalarida sanitariya nazorati tushunchasi ostida sanitariya, veterinariya va fitosanitariya nazorati koʻzda tutiladi.

Ushbu Ijroiya Protokoli Toshkent shahrida 1997-yil 20-fevralda ikki asl nusxada, har biri oʻzbek, litva va rus tillarida tuzildi, bunda barcha matnlar bir xil kuchga ega. Ushbu Ijroiya Protokoli qoidalarini talqin qilishda kelishmovchiliklar yuzaga kelgan holda rus tilidagi matn asos qilib olinadi.

(imzolar)