Xalqaro taraqqiyot uyushmasi ishtirokida “Sanoat korxonalarining energiya samaradorligini oshirish” loyihasini amalga oshirishga doir qoʻshimcha chora-tadbirlar toʻgʻrisida (168-son)

12.06.2013

Oʻzbekiston Respublikasi Vazirlar Mahkamasining

qarori

Iqtisodiyotning real sektori korxonalarini modernizatsiyalash, texnik va texnologik jihatdan yangilashni taʼminlash, ularning energiya samaradorligini oshirish uchun qoʻshimcha moliyaviy resurslarni jalb etishni kengaytirish, Jahon bankining Xalqaro taraqqiyot uyushmasi mablagʻlarini jalb etish hisobiga energiyani tejaydigan asbob-uskunalar va texnologiyalarni joriy etishni jadallashtirish maqsadida Vazirlar Mahkamasi qaror qiladi:

1. Quyidagilar:

2013-yil 26-aprelda Jahon bankining Direktorlar kengashi “Sanoat korxonalarining energiya samaradorligini oshirish” loyihasini moliyalashtirish uchun Oʻzbekiston Respublikasiga Xalqaro taraqqiyot uyushmasining 5 yillik imtiyozli davrni oʻz ichiga oladigan va yillik foiz stavkasi 1,25%, qaytarish muddati 25 yil boʻlgan qarz olishning maxsus huquqli 66,1 mln miqdoridagi (100,0 mln AQSH dollariga teng) qoʻshimcha kreditini berishni maʼqullaganligi;

loyihani amalga oshirish davri 5 yil etib belgilanganligi maʼlumot uchun qabul qilinsin.

2. Quyidagilar:

loyihani amalga oshirish doirasida Xalqaro taraqqiyot uyushmasining qoʻshimcha krediti mablagʻlarini oʻzlashtirish jadvali 2-ilovaga* muvofiq;

*2-ilova rus tilidagi matnda berilgan.

loyihani amalga oshirish doirasida Xalqaro taraqqiyot uyushmasining qoʻshimcha kreditini qaytarish, foizlar va vositachilik haqini toʻlash jadvali 3-ilovaga* muvofiq tasdiqlansin.

*3-ilova berilmaydi.

3. Belgilansinki:

Oʻzbekiston Respublikasi Iqtisodiyot vazirligi koʻrsatib oʻtilgan loyihaning “A” — “Energiya samaradorligi sohasida salohiyatni kuchaytirish va loyihani boshqarish” qismi amalga oshirilishi uchun masʼul ijro etuvchi organ hisoblanadi;

ishtirok etuvchi tijorat banklari — “Oʻzsanoatqurilishbank” ochiq aksiyadorlik tijorat banki, “Asaka” davlat-aksiyadorlik tijorat banki va “Hamkorbank” ochiq aksiyadorlik tijorat banki koʻrsatib oʻtilgan loyihaning “V” qismini (“Ishtirok etuvchi tijorat banklari uchun kredit liniyasi”) amalga oshirish boʻyicha ijro etuvchi organlar hisoblanadilar hamda Xalqaro taraqqiyot uyushmasi kreditining ular tomonidan qayta moliyalashtiriladigan qismidan maqsadli va samarali foydalanilishi uchun javob beradilar;

ishtirok etuvchi tijorat banklari Xalqaro taraqqiyot uyushmasining qayta moliyalashtiriladigan krediti mablagʻlari hisobiga qaytarish, toʻlov va muddatlilik shartlarida energiyadan samarali foydalanish investitsiya loyihalarini amalga oshirishni moliyalashtirish uchun oʻz nomidan kreditlar beradilar;

Xalqaro taraqqiyot uyushmasining qoʻshimcha kreditini qaytarish va kredit boʻyicha vositachilik haqi toʻlash kreditning ishtirok etuvchi tijorat banklari tomonidan qayta moliyalashtiriladigan qismi boʻyicha ularning mablagʻlari hisobiga, shuningdek loyihaning “A” — “Energiya samaradorligi sohasida salohiyatni kuchaytirish va loyihani boshqarish” qismi boʻyicha budjet mablagʻlari hisobiga amalga oshiriladi.

Loyihani amalga oshirish boʻyicha Iqtisodiy taraqqiyot va kambagʻallikni qisqartirish vazirligiga loyihani amalga oshirishda qatnashuvchi tegishli vazirliklar va idoralar bilan oʻzaro hamkorlikni muvofiqlashtirish, shuningdek qarz oluvchi tashkilotlarga koʻmaklashish funksiyalari yuklansin.

4. Belgilansinki, Xalqaro taraqqiyot uyushmasining qoʻshimcha krediti mablagʻlari hisobiga sanoat tashkilotlariga beriladigan kreditning eng koʻp summasi bitta investitsiya loyihasi boʻyicha 10 mln AQSH dollaridan ortiq boʻlmasligi, sanoatning bir tarmogʻida sanoat tashkilotlariga beriladigan kreditlarning eng koʻp summasi — 30 mln AQSH dollaridan ortiq boʻlmasligi kerak.

5. Oʻzbekiston Respublikasi Moliya vaziriga Oʻzbekiston Respublikasi nomidan:

“Sanoat korxonalarining energiya samaradorligini oshirish” loyihasini amalga oshirish uchun qoʻshimcha moliyalashtirishni jalb etish toʻgʻrisida Jahon banki bilan bitimni;

Xalqaro taraqqiyot uyushmasi kreditining jalb etiladigan qoʻshimcha mablagʻlarini qayta kreditlash toʻgʻrisida Oʻzbekiston Respublikasi Iqtisodiyot vazirligi va ishtirok etuvchi tijorat banklari bilan bitimni imzolash vakolati berilsin.

Oʻzbekiston Respublikasi Adliya vazirligi “Sanoat korxonalarining energiya samaradorligini oshirish” loyihasini qoʻshimcha moliyalashtirish toʻgʻrisida Oʻzbekiston Respublikasi bilan Xalqaro taraqqiyot uyushmasi oʻrtasidagi bitim, shuningdek Oʻzbekiston Respublikasi, ishtirok etuvchi tijorat banklari va Oʻzbekiston Respublikasi Iqtisodiyot vazirligi oʻrtasida qayta kreditlash toʻgʻrisidagi bitimlar boʻyicha belgilangan tartibda yuridik xulosa bersin.

6. Ishtirok etuvchi tijorat banklariga — “Oʻzsanoatqurilishbank” ochiq aksiyadorlik tijorat banki, “Asaka” davlat-aksiyadorlik tijorat banki va “Hamkorbank” ochiq aksiyadorlik tijorat bankiga loyihani qoʻshimcha moliyalashtirish boʻyicha Xalqaro taraqqiyot uyushmasi bilan loyiha bitimlarini imzolash, loyiha bitimlari shartlariga muvofiq “Sanoat korxonalarining energiya samaradorligini oshirish” loyihasini amalga oshirish boʻyicha oʻz zimmalariga majburiyat qabul qilish tavsiya etilsin.

7. Oʻzbekiston Respublikasi Iqtisodiyot vazirligi bir oy muddatda Oʻzbekiston Respublikasi Moliya vazirligi va ishtirok etuvchi tijorat banklari bilan birgalikda qoʻshimcha moliyalashtirishni hisobga olgan holda, kreditlarni berish tartibini, moliyalashtirilgan loyihalarni tanlash va baholash mezonlarini, shuningdek moliyaviy boshqarish, xaridlar, monitoring va loyiha amalga oshirilishini baholash tartibotlarini belgilaydigan loyiha boʻyicha Operatsion qoʻllanma puxta ishlanishini va Jahon banki bilan kelishilishini taʼminlasin.

8. “Oʻzdavenergonazorat” davlat inspeksiyasi “Oʻzbekenergo” davlat-aksiyadorlik kompaniyasi bilan birgalikda “Sanoat korxonalarining energiya samaradorligini oshirish” loyihasi doirasida Xalqaro taraqqiyot uyushmasining qoʻshimcha krediti mablagʻlari hisobiga amalga oshiriladigan investitsiya loyihalari energiya samaradorligi parametrlari boʻyicha, zaruriyat boʻlganda — manfaatdor vazirliklar va idoralarning mutaxassislarini jalb etgan holda ekspertizadan oʻtkazilishi va xulosalar berilishini taʼminlasin.

9. Koʻrsatib oʻtilgan loyiha doirasida energiya samaradorligi asbob-uskunalarini joriy etish boʻyicha investitsiya loyihalarini amalga oshiruvchi qarz oluvchi tashkilotlarga, istisno tariqasida, hujjatlarni texnik-iqtisodiy asoslashni ishlab chiqish bilan birgalikda bir bosqichli tartibda ishlab chiqish huquqi berilsin.

10. Oʻzbekiston Respublikasi Tashqi ishlar vazirligi Oʻzbekiston Respublikasi Iqtisodiyot vazirligining buyurtmanomalari boʻyicha koʻrsatib oʻtilgan loyihani amalga oshirishda qatnashuvchi xorijiy mutaxassislarga kirish vizalari rasmiylashtirilishini taʼminlasin.

11. Oʻzbekiston Respublikasi Ichki ishlar vazirligi Oʻzbekiston Respublikasi Iqtisodiyot vazirligining buyurtmanomalari boʻyicha koʻrsatib oʻtilgan loyihani amalga oshirishda ishtirok etuvchi xorijiy mutaxassislarga davlat boji undirilmasdan koʻp martalik vizalar berilishini va muddati uzaytirilishini, shuningdek ular Oʻzbekiston Respublikasida vaqtincha turgan joyi boʻyicha roʻyxatga olinishini va muddati uzaytirilishini taʼminlasin.

12. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

Oʻzbekiston Respublikasi Prezidenti I. KARIMOV

Toshkent sh.,

2013-yil 12-iyun,

168-son