Savdo-iqtisodiy va ilmiy-texnikaviy hamkorlik boʻyicha Oʻzbekiston-Latviya hukumatlararo komissiyasini tuzish toʻgʻrisida

11.04.1997

Oʻzbekiston Respublikasi Hukumati va Latviya Respublikasi Hukumati oʻrtasida

Bitim

Oʻzbekiston Respublikasi Hukumati va Latviya Respublikasi Hukumati, bundan buyon Tomonlar deb yuritiladilar,

1992-yilning 18-avgustidagi Oʻzbekiston Respublikasi va Latviya Respublikasi oʻrtasida savdo-iqtisodiy hamkorlik toʻgʻrisidagi Bitimni hamda 1995-yilning 6-iyunidagi Oʻzbekiston Respublikasi Hukumati va Latviya Respublikasi Hukumati oʻrtasida ilmiy-texnikaviy hamkorlik toʻgʻrisidagi Bitimni amalga oshirish maqsadida,

har ikki mamlakat oʻrtasidagi savdo-iqtisodiy va ilmiy-texnikaviy hamkorlikni mustahkamlash va rivojlantirishni istab,

quyidagilar xususida ahdlashib oldilar:

1-modda

Oʻzbekiston Respublikasi va Latviya Respublikasi oʻrtasida savdo-iqtisodiy munosabatlar va ilmiy-texnikaviy aloqalar sohasidagi hamkorlikni rivojlantirish vazifalarini toʻlaqonli va operativ ravishda bajarish maqsadida, Tomonlar quyida “Komissiya” deb yuritiluvchi savdo-iqtisodiy va ilmiy-texnikaviy hamkorlik boʻyicha Oʻzbekiston-Latviya hukumatlararo komissiyasini tuzadilar.

2-modda

Komissiya oʻz faoliyatini mazkur Bitim, shuningdek komissiya tomonidan ishlab chiqilgan va uning dastlabki yigʻilishida tasdiqlangan Oʻzbekiston-Latviya hukumatlararo komissiyasining faoliyat reglamenti toʻgʻrisidagi Nizomga muvofiq amalga oshiradi.

3-modda

Komissiya:

1. Har ikki mamlakatning manfaatdorligini eʼtiborga olgan holda, tenglik va oʻzaro manfaatdorlik asosidagi ikki tomonlama savdo-iqtisodiy hamkorlikni kengaytirish va takomillashtirishga qaratilgan takliflar tayyorlaydi va chora-tadbirlar koʻradi.

2. Oʻzbekiston Respublikasi va Latviya Respublikasi oʻrtasida ilmiy-texnikaviy hamkorlikni kengaytirish va chuqurlashtirishga qaratilgan takliflarni ishlab chiqish, har ikki mamlakatning ilmiy-texnika sohasidagi yutuqlari xususida tegishli maʼlumotlar almashuvida koʻmaklashadi.

3. Har ikki davlatning vazirliklari, idoralari, tashkilotlari, muassasalari va xoʻjalik yurituvchi subyektlari oʻrtasida oʻzaro manfaatlarni ifodalovchi masalalar boʻyicha turli darajadagi hamkorlik dasturlarini ishlab chiqish va bajarishda koʻmaklashadi.

4. Har ikki mamlakat oʻrtasida tuzilgan savdo-iqtisodiy va ilmiy-texnikaviy hamkorlik boʻyicha bitimlar, shuningdek ushbu sohalardagi oʻz qarorlarining bajarilishi jarayonini nazorat qiladi, ularning muvaffaqiyatli ravishda bajarilishiga qaratilgan choralar koʻradi.

4-modda

Komissiyani. Tomonlarning Hukumatlari tayinlaydigan Hamraislar boshqaradilar. Komissiya aʼzolarining shaxsiy tarkibi har bir Tomonning Hamraislari tomonidan tuziladi, uni Tomonlarning Hukumatlari tasdiqlaydi.

Komissiya doirasida savdo-iqtisodiy va ilmiy-texnikaviy hamkorlikning turli yoʻnalishlari boʻyicha kichik komissiyalar va ishchi guruhlari tuzilishi mumkin.

Hamraislar Komissiyadagi oʻz qismlarining shaxsiy tarkibi va undagi keyingi oʻzgarishlar toʻgʻrisida bir-birlarini oʻzaro xabardor qiladilar.

5-modda

Tomonlar quyidagilar xususida kelishib oldilar:

Komissiya oʻz yigʻilishlarini kelishilgan muddatlarda, kamida har yili bir marta oʻtkazadi;

Komissiya yigʻilishlari navbati bilan Oʻzbekistonda va Latviyada oʻtkaziladi, yigʻilishlarda qabul qiluvchi Tomon raislik qiladi;

Komissiya yigʻilishlari zaruratga koʻra, Hamraislar oʻrtasidagi kelishuvga muvofiq, shuningdek Tomonlardan birining murojaatiga binoan oʻtkaziladi;

oʻzaro kelishuvga koʻra Komissiya ishida ishtirok etish uchun har ikki Tomonning konsultantlari va ekspertlari, shuningdek xalqaro tashkilotlar va boshqa mamlakatlarning konsultantlari va ekspertlari taklif etilishi mumkin;

Komissiya yigʻilishlarini oʻtkazish uchun sarflanadigan xarajatlarni mamlakati hududida yigʻilish oʻtkazilayotgan Tomon toʻlaydi;

Komissiya yigʻilishlari qatnashchilari uchun sarflanadigan yoʻl xarajatlari va oʻzga chiqimlar, shu jumladan mehmonxona haqi, shuningdek Komissiyaning doimiy va muvaqqat organlari aʼzolari uchun zaruriy sarf-xarajatlarni oʻz vakillarini xizmat safariga yoʻllagan Tomon toʻlaydi.

6-modda

Ushbu Bitimga Tomonlarning oʻzaro kelishuviga binoan oʻzgartirish va qoʻshimchalar kiritilishi mumkin. Ushbu Bitim cheklanmagan muddatga tuzilmoqda, u imzolangan kunidan boshlab qonuniy kuchga kiradi va Tomonlardan biri ushbu Bitimni harakatdan toʻxtatish niyati toʻgʻrisida boshqa Tomondan yozma ravishda xabarnoma olgan kundan boshlab 6 oy oʻtgunga qadar amalda boʻladi.

Toshkent shahrida 1997-yil 11-aprelda ikki nusxada, har biri oʻzbek, latish va rus tillarida tuzildi, bunda barcha matnlar bir xil kuchga egadir.

Ushbu Bitim qoidalarini talqin qilishda rus tilidagi matndan foydalaniladi.

(imzolar)