Qishloq joylarda namunaviy loyihalar boʻyicha yakka tartibdagi uy-joylar qurish uchun tashqi muhandislik kommunikatsiyalariga ulanish imkoniyati boʻlgan sugʻorilmaydigan hamda unumdorligi past qishloq xoʻjaligi yer uchastkalarini aniqlash qoidalarini tasdiqlash toʻgʻrisida (2464-son)

03.06.2013

Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi Oʻzbekiston Respublikasi Qishloq va suv xoʻjaligi vazirligi Oʻzbekiston Respublikasi Davlat arxitektura va qurilish qoʻmitasining

Qarori

[Oʻzbekiston Respublikasi Adliya vazirligi tomonidan 2013-yil 3-iyunda roʻyxatdan oʻtkazildi, roʻyxat raqami 2464]

Oʻzbekiston Respublikasi Prezidentining 2013-yil 4-yanvardagi PQ–1902-son “Qishloq joylarda namunaviy loyihalar boʻyicha yakka tartibdagi uy-joylar qurilishining 2013-yil Dasturi toʻgʻrisida”gi qarori (Oʻzbekiston Respublikasi qonun hujjatlari toʻplami, 2013-y., 2-son, 17-modda) ijrosini taʼminlash maqsadida Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi, Qishloq va suv xoʻjaligi vazirligi hamda Davlat arxitektura va qurilish qoʻmitasi qaror qiladilar:

1. Qishloq joylarda namunaviy loyihalar boʻyicha yakka tartibdagi uy-joylar qurish uchun tashqi muhandislik kommunikatsiyalariga ulanish imkoniyati boʻlgan sugʻorilmaydigan hamda unumdorligi past qishloq xoʻjaligi yer uchastkalarini aniqlash qoidalari ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga kiradi.

Yer resurslari, geodeziya, kartografiya va davlat kadastri davlat qoʻmitasi raisi S. ARABOV

Toshkent sh.,

2013-yil 20-may,

10-son

Qishloq va suv xoʻjaligi vaziri Z. RUZIYEV

Toshkent sh.,

2013-yil 20-may,

6/1-son

Davlat arxitektura va qurilish qoʻmitasi raisi B. ZOKIROV

Toshkent sh.,

2013-yil 20-may,

2-son

Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi, Qishloq va suv xoʻjaligi vazirligi va Davlat arxitektura va qurilish qoʻmitasining 2013-yil 20-maydagi 10, 6/1, 2-son qaroriga ILOVA

Qishloq joylarda namunaviy loyihalar boʻyicha yakka tartibdagi uy-joylar qurish uchun tashqi muhandislik kommunikatsiyalariga ulanish imkoniyati boʻlgan sugʻorilmaydigan hamda unumdorligi past qishloq xoʻjaligi yer uchastkalarini aniqlash

QOIDALARI

Mazkur Qoidalar Oʻzbekiston Respublikasi Prezidentining 2013-yil 4-yanvardagi PQ–1902-son “Qishloq joylarda namunaviy loyihalar boʻyicha yakka tartibdagi uy-joylar qurilishining 2013-yil Dasturi toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2013-y., 2-son, 17-modda) muvofiq yakka tartibdagi uy-joylar qurish uchun tashqi muhandislik kommunikatsiyalariga ulanish imkoniyati boʻlgan sugʻorilmaydigan hamda unumdorligi past qishloq xoʻjaligi yer uchastkalarini aniqlash tartibini belgilaydi.

I bob. Umumiy qoidalar

1. Qishloq joylarda namunaviy loyihalar boʻyicha yakka tartibdagi uy-joylar qurish uchun tashqi muhandislik kommunikatsiyalariga ulanish imkoniyati boʻlgan sugʻorilmaydigan hamda unumdorligi past qishloq xoʻjaligi yer uchastkalarini aniqlash lozim.

Bunda sugʻorilmaydigan yer uchastkalari deganda sugʻorishni taʼminlay oladigan sugʻorish manbai bilan bogʻlangan doimiy yoki muvaqqat sugʻorish tarmogʻiga ega boʻlmagan yer uchastkalar (lalmi, yaylov, pichanzor, tashlandiq, oʻrmon fondi toifasiga kirmaydigan hamda oxirgi ikki yil davomida tashkilotlar tomonidan foydalanmay boʻsh turgan, maqsadsiz va samarasiz foydalanilayotgan yerlar) tushuniladi.

Unumdorligi past boʻlgan yer uchastkalar tuproqning unumdorlik darajasi boʻyicha bonitet balli 40 dan past boʻlgan qishloq xoʻjaligiga moʻljallangan yer uchastkalardir.

2. Qishloq joylarda namunaviy loyihalar boʻyicha yakka tartibdagi uy-joylar qurish uchun tashqi muhandislik kommunikatsiyalariga ulanish imkoniyati boʻlgan sugʻorilmaydigan hamda unumdorligi past boʻlgan yer uchastkalarini aniqlash boʻyicha joylarda ishchi guruh tuziladi.

3. Ishchi guruh tarkibiga Qoraqalpogʻiston Respublikasi Vazirlar Kengashi, viloyat, tuman (shahar) hokimliklari, Oʻzbekiston Respublikasi Qishloq va suv xoʻjaligi vazirligining hududiy boshqarma va uning boʻlimlari, “Yergeodezkadastr” davlat qoʻmitasining hududiy boshqarma va uning boʻlimlari, “Davarxitektqurilish” qoʻmitasining hududiy boshqarma va uning boʻlimlari, Qoraqalpogʻiston Respublikasi Uy-joy kommunal xizmat koʻrsatish vazirligi hamda viloyatlar uy-joy kommunal xizmat koʻrsatish boshqarmalari va ularning tashkiliy tuzilmasiga kiruvchi tashkilotlar, “Oʻzdaverloyiha” institutining hududiy boʻlimlari, “Oʻzbekneftgaz” MXK hududiy boʻlimlari, “Oʻzbekenergo” AJning hududiy elektr tarmoqlari korxonalari va “Oʻzgidromet” markazining hududiy boʻlinmalarining vakillari kiritiladi.

II bob. Sugʻorilmaydigan va unumdorligi past boʻlgan yer uchastkalarini aniqlash

4. Ishchi guruh tomonidan qishloq joylarda namunaviy loyihalar boʻyicha yakka tartibdagi uy-joylar qurish uchun tashqi muhandislik kommunikatsiyalariga ulanish imkoniyati boʻlgan sugʻorilmaydigan hamda unumdorligi past boʻlgan yer uchastkalarini aniqlashda quyidagi ishlar amalga oshiriladi:

sugʻorilmaydigan va unumdorligi past boʻlgan yer uchastkalarni davlat yer kadastri maʼlumotlari va hujjatlari asosida aniqlash;

sugʻorilmaydigan va unumdorligi past boʻlgan yer uchastkalarni uy-joy qurilishi uchun yaroqlilarini tanlab olish;

tashqi muhandislik kommunikatsiya tarmoqlariga ulanish imkoniyatlarini aniqlash;

aniqlangan yer uchastkalarni 1:10000 masshtabdagi xaritalarga tushirish;

har bir aniqlangan massiv boʻyicha yer uchastkasining maydoni, manzili, yerdan foydalanuvchilar va boshqa maʼlumotlarni aniqlash va tahlil qilish.

5. Qishloq joylarda namunaviy loyihalar boʻyicha yakka tartibdagi uy-joylar qurish uchun tashqi muhandislik kommunikatsiyalariga ulanish imkoniyati boʻlgan sugʻorilmaydigan hamda unumdorligi past yer uchastkalarini aniqlash ishlarining natijasi koʻrib chiqilib, ishchi guruh tomonidan tayyorlangan takliflar dalolatnoma bilan rasmiylashtiriladi.

6. Qishloq joylarda namunaviy loyihalar boʻyicha yakka tartibdagi uy-joylar qurish uchun tashqi muhandislik kommunikatsiyalariga ulanish imkoniyati boʻlgan sugʻorilmaydigan hamda unumdorligi past boʻlgan yer uchastkalari toʻgʻrisidagi maʼlumotlar boʻyicha mazkur Qoidalarning 1 va 2-ilovasida keltirilgan jadvallar toʻldiriladi.

7. “Yergeodezkadastr” davlat qoʻmitasining hududiy boshqarmalari tomonidan dalolatnoma va maʼlumotlar umumlashtirilib Qoraqalpogʻiston Respublikasi Vazirlar Kengashi va viloyatlar hokimlariga taqdim etiladi.

8. Qoraqalpogʻiston Respublikasi Vazirlar Kengashi va viloyatlar hokimliklari tomonidan marketing jihatdan oʻrganish natijalari asosida har yili 1-noyabrgacha boʻlgan muddatda “Yergeodezkadastr” davlat qoʻmitasi “Davarxitektqurilish” qoʻmitasi bilan kelishilgan holda tashqi muhandislik kommunikatsiyalariga ulanish imkoniyati boʻlgan sugʻorilmaydigan hamda unumdorligi past boʻlgan yer uchastkalarini aniqlash ishlarining natijasi asosida yer massivlari tanlab olinadi hamda keyinchalik ular namunaviy loyihalar boʻyicha yakka tartibdagi uy-joy va ijtimoiy ahamiyatdagi obyektlar qurish uchun “Qishloq qurilish invest” injiniring kompaniyasiga topshiriladi.

III bob. Yakuniy qoida

9. Mazkur Qoidalar “Oʻzbekenergo” DAK, Oʻzbekiston “Oʻzkommunxizmat” agentligi, “Oʻzbekneftgaz” MXK va Oʻzbekiston Respublikasi Elektr energetikada nazorat boʻyicha davlat inspeksiyasi bilan kelishilgan.

“Oʻzbekenergo” DAK Boshqaruvi raisi I. BASIDOV

2013-yil 15-may,

“Oʻzkommunxizmat” agentligi Bosh direktori U. XALMUXAMEDOV

2013-yil 15-may,

“Oʻzbekneftgaz” MXK Boshqaruvi raisi Sh. FAYZULLAYEV

2013-yil 15-may,

“Oʻzdavenergonazorat” inspeksiyasi boshligʻi A. NIMATULLAYEV

2013-yil 15-may,

Qishloq joylarda namunaviy loyihalar boʻyicha yakka tartibdagi uy-joylar qurish uchun tashqi muhandislik kommunikatsiyalariga ulanish imkoniyati boʻlgan sugʻorilmaydigan hamda unumdorligi past qishloq xoʻjaligi yer uchastkalarini aniqlash qoidalariga 1-ILOVA

Qishloq joylarda namunaviy loyihalar boʻyicha yakka tartibdagi uy-joylar qurish uchun tashqi muhandislik kommunikatsiyalariga ulanish imkoniyati boʻlgan sugʻorilmaydigan hamda unumdorligi past qishloq xoʻjaligi yer uchastkalarini aniqlash qoidalariga 2-ILOVA

(Oʻzbekiston Respublikasi qonun hujjatlari toʻplami, 2013-y., 23-son, 308-modda; 2017-y., 31-son, 786-modda)