Avtomobil yoʻllarining ayrim uchastkalaridan foydalanish toʻgʻrisida

27.03.1998

Oʻzbekiston Respublikasi Hukumati va Qozogʻiston Respublikasi Hukumati oʻrtasida

Bitim

Oʻzbekiston Respublikasi Hukumati va Qozogʻiston Respublikasi Hukumati, bundan keyin Tomonlar deb ataluvchilar,

1994-yil 30-yanvardagi Qozogʻiston Respublikasi, Qirgʻiziston Respublikasi va Oʻzbekiston Respublikasi oʻrtasida Yagona iqtisodiy makonni barpo qilish toʻgʻrisida Shartnomaga, 1997-yil 10-yanvardagi Qozogʻiston Respublikasi, Qirgʻiziston Respublikasi va Oʻzbekiston Respublikasi oʻrtasida abadiy doʻstlik toʻgʻrisida Shartnomaga amal qilib,

mamlakatlar oʻrtasida iqtisodiy hamkorlikning erishilgan darajasiga tayanib,

transport kommunikatsiyalaridan samarali foydalanishni taʼminlashni istab hamda avtomobil yoʻllaridan birgalikda va kelishilgan holda foydalanishning ahamiyati va zaruratini anglab,

transport tizimlari texnologik birliklarini saqlash va transport vositalarini urintirishni kamaytirish zaruratidan kelib chiqib,

yoʻlovchilar va yuklarning erkin koʻchishi uchun shart-sharoit yaratish maqsadida

quyidagilar toʻgʻrisida ahdlashib oldilar:

1-modda

Jetisoy-Chordara avtomobil yoʻlining Oʻzbekiston Respublikasi hududidan oʻtadigan, uzunligi 24,5 kilometrdan iborat, yoʻl qatnov qismining har ikkala tarafida 30 metrlik sanitariya-himoya zonasi boʻlgan uchastkasi Qozogʻiston Respublikasiga oʻn yil muddat bilan vaqtincha foydalanish uchun bepul asosda (toʻlovsiz) beriladi.

Avtomobil yoʻlining bu uchastkasi Chordara suv omborining gʻarbiy qirgʻoqlari boʻylab Maxtali qishlogʻining gʻarbrogʻida joylashgan Qozogʻiston Respublikasining Oʻzbekiston Respublikasi bilan davlat chegarasidan umumiy yoʻnalishi boʻyicha Arnasoy qishlogʻini oralab oʻtib shimoli-sharqqa yoʻnaladi va shimoli-gʻarbda Qozogʻiston Respublikasining Oʻzbekiston Respublikasi bilan davlat chegarasida, Arnasoy tashlamasining dambasidan shimoli-gʻarbga yoʻnalib, Qozogʻiston Respublikasining Oʻzbekiston Respublikasi bilan davlat chegarasiga qadar etib boradi.

2-modda

Sirdaryo-Jizzax avtomobil yoʻlining Qozogʻiston Respublikasi hududidan oʻtadigan, uzunligi 24,3 kilometrdan iborat, yoʻl qatnov qismining har ikkala tarafida 30 metrlik sanitariya-himoya zonasi boʻlgan uchastkasi Oʻzbekiston Respublikasiga oʻn yil muddat bilan vaqtincha bepul asosda (toʻlovsiz) beriladi.

Almati-Bishkek-Toshkent-Termiz M-39 avtomobil yoʻlining mazkur uchastkasi Maxtajan qishlogʻining shimoli-sharqrogʻida Qozogʻiston Respublikasining Oʻzbekiston Respublikasi bilan davlat chegarasidan boshlanib, janubi-gʻarb tomonga umumiy yoʻnalishda Selinnoye qishlogʻi yaqinida Qozogʻiston Respublikasi bilan Oʻzbekiston Respublikasi davlat chegarasi oʻrtasigacha yetib boradi.

3-modda

Tomonlar ushbu Bitimning 1- va 2-moddalarida koʻrsatib oʻtilgan sanitariya-himoya zonasida har qanday maqsaddagi obyektlarni qurmaslik majburiyatini oladilar.

Tomonlar bir-birlariga ushbu Bitimning 1- va 2-moddalarida sanab oʻtilgan avtomobil yoʻllari uchastkalarida yoʻlovchilar va yuklarni erkin tashishga koʻmaklashadigan sharoitlar yaratib beradilar.

Tomonlar ushbu Bitimning 1- va 2-moddalarida koʻrsatib oʻtilgan avtomobil yoʻllari uchastkalarida transport vositalarining kirish-chiqish bojxona maskanlari va punktlarini joylashtirishni tartibga soladilar.

4-modda

Ushbu Bitimga Tomonlarning oʻzaro roziligi boʻyicha ushbu Bitimning ajralmas qismi boʻlib hisoblanadigan alohida protokol bilan rasmiylashtiriladigan oʻzgartish va qoʻshimchalar kiritilishi mumkin.

5-modda

Ushbu Bitim Tomonlarning uni kuchga kiritish uchun davlat ichki protseduralarini bajarib boʻlganliklari toʻgʻrisida bir-birlarini xabardor qilgan kundan boshlab kuchga kiradi.

Shu bilan birgalikda ushbu Bitim 1998-yil 27-martda Toshkent shahrida imzolangan Oʻzbekiston Respublikasi Hukumati va Qozogʻiston Respublikasi Hukumati oʻrtasida Oʻzbekiston Respublikasi va Qozogʻiston Respublikasi avtomobil va temir yoʻl magistrallari boʻyicha borayotganda yoʻlovchi, yuk va bagajlarni tranzit tashish, ularning saqlanishini va xavfsizligini taʼminlash toʻgʻrisida bitimga soʻzsiz amal qilingan taqdirdagina kuchga ega boʻladi.

Bunda Tomonlar oʻz hududlari boʻyicha boshqa Tomon avtotransport vositalarining oʻtishi uchun qulay sharoitlarni taʼminlash yuqorida aytib oʻtilgan bitim boʻyicha oʻzaro majburiyatlarini bajarishning zarur sharti ekanligini tasdiqlaydilar.

Ushbu Bitim oʻn yil davomida amal qiladi, undan keyin Tomonlardan biri tegishli amal qilish davri tugashidan kamida olti oy ilgari uning amal qilishini toʻxtatish toʻgʻrisida xohishini bildirmaguncha oʻz-oʻzidan keyingi davrlarga uzaytiriladi.

Toshkent shahrida 1998-yil 27-martda ikki nusxada, oʻzbek, qozoq va rus tillarida tuzildi, barcha matnlar bir xil kuchga ega.

Ushbu Bitim qoidalarini talqin qilish uchun rus tilidagi matndan foydalaniladi.

(imzolar)